Ezekiel 29

29 ¹Zingkum katharāwui, kachang katharāwui zimiksho tharāda kakhanethang, ithumwui Avāwui tui chi ili rāhānga:

²Miwui naomayara, Egyptwui awunga Pharaohshong ngareivāda, ashong kala Egypt saikorashong makhamayā tui marānlu.

³Matuida hānglu: Proho Avāna hithāda hānga: "Yanglu, Egyptwui awunga Pharaoh, ina nali mamayāmana, na reikhamataia sārei nawui ra̱shong ngachaili ngasopama, hithāda kahāng: 'Iwui Nile iwuina; ina I khalattawui vang chi sākahaina.' ⁴Kha ina namakhāli khānghui hokkhuira, kala nawui ra̱shongwui khaibing nawui asāli shurching ngasakra; nawui ra̱shongwui khai saikora nawui asāli shurchingda, nawui ra̱shong alungwui eina nali horkhuira. ⁵Ina na kala nawui ra̱shongwui khai saikorali lamhāngli horvāhaora. Khamashā lamli na pitāra; nali khipākhana mazipmara kala makazipkhuimara. Sāyur kala khamasaiwui vānaobingli nali kashakazā ina mihaira. ⁶Chitharan Egyptwui kapam saikorana I Avāna da theira, kaja athum Israelwui shimkhurli titi khāmshui sākahaina. ⁷Athumna nali yonkhui tharan, na tekhaida athumwui yartuili serkazama; kala athumna nawuili shai tharan, na sātekmida athumwui phei nganuk ngasaka."

⁸Chiwui vang eina Proho Avāna hithāda hānga: Yanglu, ina nawuitungli raighai khuirāhaora, kala ina nawui eina mi kala sā katathaora.

⁹Egyptwui ngalei ramcho eina ja̱tā sāhaora, chieina athumna I Avāna da theira. Kaja Pharaohna hānga, "Nile iwuina; ina chi sākahaina."

¹⁰"Chiwui vang eina, ina nali kala nawui ra̱shongli mamayāmana, kala ina Syenewui eina haophoklaga Cushwui thariwui eina tangda Egyptwui ngalei ramcho eina ngachakyāng sāngasakra. ¹¹Mi phei akhala chiwuili makānmara, sā phei akhala chiwuili makānmara; zingkum hangmatiwui vang chili khipākha mapammara. ¹²Ina Egyptwui ngalei ramcho sākahai ngaleibingwui ngachaili ramcho sāngasakra, kala awui keinungbing ramcho sākahai keinungbingwui ngachaili zingkum hangmatiwui vang ramcho sāra. Ina Egyptnaobingli yurbingwui ngachaili chaiyāngmihaora, kala ngalei apam kachiva̱li chaivāhaora."

¹³Kaja Proho Avāna hithāda hānga: "Zingkum hangmatiwui khanaoli, athum chaiyāngva kahai mibingwui eina Egyptnaobingli ina kazipkhuira. ¹⁴Ina Egyptwui lan hanmiluishitra, kala athumli athumwui luinganai ngalei Pathros ngaleili ungmira, kala chili athum khangazana wungram sāra. ¹⁵Chi wungram saikorawui ngachaili ngazanmeikap sāra, yurbingwui tungli khalatta majuiluimara. Ina athumli kateo ngasakra, chieina athumna yurbingwui tungli mamungluimara. ¹⁶Egypt Israelwui shimkhurwui ninghorsang khavai maleiluimara, kha athum ashong ngareivā tharan athumwui khayonkhamāng phaningungching khavaina. Chitharan athumna I Proho Avāna da theira."

¹⁷Zingkum maga̱da kashinewui, kachang kharewui zimiksho kharethang, ithumwui Avāwui tui chi ili rāhānga:

¹⁸Miwui naomayara, Babylonwui awunga Nebuchadnezzarna awui raimibingli Tyrewuitungli panglāk eina ot sāngasaka. Kui kachiva̱ ngakoklaga, yārtui kachiva̱ sānui shonhaida, chithālala Tyrewui eina ana kala awui raimibingna ali ngararda ot sākahaiwui vang ngalangman samphangmana. ¹⁹Chiwui vang eina Proho Avāna hithāda hānga: Ara ina Egypt ngalei chi Babylonwui awunga Nebuchadnezzarli mira. Ana awui lan khuitāserhaora, awui otyur ngaponkhuihaora, awui aman ngapaikhuiserra; chi awui raimibingwui ngalangmanna. ²⁰Ana ot sākahaiwui ngalangman thāda, ina ali Egypt ngalei mihaira, kaja athumna iwui vang chi sāhaira, da Proho Avāna hānga.

²¹Chi zimiksholi ina Israelwui shimkhurwui vang angaji akha phorngasakra, kala athumwui ngachaili nakhamor shomira. Chieina athumna I Avāna da theira. ^a a v21 Angaji phorkahai hiya sāshap khavai kala huikhamewui machut akhana; chi ithumwui Avāna Davidwui atheili pharā kahai Jishuwui alungli phākhui kahai huikhamewui angajili shingāwui vang chichuina.