Nna anyị Na-ekpe Fero Ikpe

Fero bụ nnukwu anụ ọjọọ nke osimiri, na-ekwu na Naịl bụ nke ya n'ihi na ọ bụ ya mere ya. Nna anyị ji nko kọọ agba ya, dọkpụrụ ya n'ime ọzara. Ijipt bụụrụ Izrel ahịhịa achara na-agbaji agbaji. Mgbe ọ tọgbọrọ n'efu afọ iri anọ, ọ ga-alọghachi dị ka alaeze kachasị ala.

Isi 29.

Nʼafọ nke iri, nʼọnwa nke iri, nʼụbọchị nke iri na abụọ, okwu Nna anyị rutere m, sị:

Nwa nke mmadụ, chee ihu gị megide Fero eze Ijipt, buokwa amụma megide ya na Ijipt niile.

Kwuo ma sị: Nke a bụ ihe Nna anyị, Onye kachasị elu, na-ekwu, sị: “Lee, mụ onwe m na-emegide gị, Fero eze Ijipt, gị nnukwu anụ mmiri dina nʼetiti iyi gị niile, onye na-asị, ‘Naịl m bụ nke m; emeere m onwe m ya.’ Ma m ga-etinye nko nʼagba gị, meekwa ka azụ nke iyi gị niile rapara nʼakpịrịkpa gị; aga m esite nʼetiti iyi gị niile dọpụta gị, ya na azụ niile nke iyi gị rapara nʼakpịrịkpa gị. Aga m atụfu gị nʼọzara, gị na azụ niile nke iyi gị. Ị ga-ada nʼọhịa mepere emepe; a gaghị achịkọta gị maọbụ tụtụkọta gị. Enyela m gị anụ ọhịa na nnụnụ nke eluigwe ka ị bụrụ nri. Mgbe ahụ, ndị niile bi nʼIjipt ga-amata na mụ onwe m bụ Nna anyị, nʼihi na ha abụrụla mkpanaka achara nye ụlọ Izrel. Mgbe ha jidere gị nʼaka, ị gbajiri waa, dọwaa ubu ha; mgbe ha dabere nʼahụ gị, ị gbajiri mee ka ụkwụ ha daa mba.”

Ya mere, Nna anyị, Onye kachasị elu, na-ekwu, sị: Lee, ana m eweta mma agha megide gị, aga m ebipụkwa mmadụ na anụmanụ site nʼime gị.

Ala Ijipt ga-aghọ ebe tọgbọrọ nʼefu na mkpọmkpọ ebe, ha ga-amatakwa na mụ onwe m bụ Nna anyị—nʼihi na Fero kwuru, sị, “Naịl bụ nke m; emere m ya.”

“Ya mere, mụ onwe m na-emegide gị na iyi gị niile, aga m emekwa ka ala Ijipt ghọọ mkpọmkpọ ebe na ebe tọgbọrọ nʼefu kpamkpam, site nʼAswan ruo nʼoke ala Kush. Ụkwụ mmadụ ọbụla agaghị agafe ya, ụkwụ anụmanụ ọbụla agaghịkwa agafe ya; ọ dịghị onye ga-ebi nʼebe ahụ ruo afọ iri anọ. Aga m eme ala Ijipt ka ọ bụrụ ebe tọgbọrọ nʼefu nʼetiti ala ndị tọgbọrọ nʼefu, meekwa obodo ya niile ka ha bụrụ mkpọmkpọ ebe nʼetiti obodo ndị e tikpọrọ etikpọ ruo afọ iri anọ. Aga m achụsa ndị Ijipt nʼetiti mba dị iche iche, fesasịakwa ha nʼala niile.”

Nʼihi na Nna anyị, Onye kachasị elu, na-ekwu, sị: “Na ngwụcha afọ iri anọ ahụ, aga m achịkọta ndị Ijipt site na mba ndị ahụ ebe a chụsasịrị ha. Aga m eweghachi akụnụba Ijipt, kpọghachikwa ha nʼala Patros, ala nna ha, nʼebe ahụ ha ga-abụ alaeze dị ala. Ọ ga-abụ alaeze dịkarịsịrị ala nʼetiti alaeze niile, ọ gaghịkwa ebuli onwe ya elu karịa mba ndị ọzọ ọzọ. Aga m eme ka ha dị nta nke ukwuu nke na ha agaghịkwa achị mba ndị ọzọ. Ijipt agaghịkwa abụ ihe ntụkwasị obi nye ụlọ Izrel ọzọ, kama ọ ga-abụ ihe ncheta nke ikpe ọmụma ha mgbe ọbụla ha chigharịrị chee ya ihu. Mgbe ahụ, ha ga-amata na mụ onwe m bụ Nna anyị, Onye kachasị elu.”

Nʼafọ nke iri abụọ na asaa, nʼọnwa mbụ, nʼụbọchị mbụ, okwu Nna anyị rutere m, sị:

Nwa nke mmadụ, Nebukadneza eze Babilọn mere ka ndị agha ya rụsie ọrụ ike megide Taịa. Isi ọbụla kwọrọ nkwọcha, ubu ọbụla fọrọ afọ, ma ya na ndị agha ya enwetaghị ụgwọ ọrụ ọbụla site na Taịa nʼihi ọrụ o mere megide ya. Ya mere, Nna anyị, Onye kachasị elu, na-ekwu, sị: Lee, ana m enye Nebukadneza eze Babilọn ala Ijipt. Ọ ga-ebupụ akụ ya, kwakọrọ ihe ya a kwatara nʼagha, kwakọrọkwa ihe o kwatara—ya bụ ụgwọ ọrụ ndị agha ya. Dị ka ụgwọ ọrụ ya maka ọrụ o mere, enyela m ya ala Ijipt, nʼihi na ọ bụ maka m ka ha rụrụ ya, ka Nna anyị, Onye kachasị elu, kwupụtara.

Nʼụbọchị ahụ, aga m eme ka mpi pupụta nye ụlọ Izrel, aga m emekwa ka ọnụ gị saghee nʼetiti ha. Mgbe ahụ, ha ga-amata na mụ onwe m bụ Nna anyị. ^a