ମିସର ନିମନ୍ତେ ବିନାଶର ଦିନ

ମିସର ଓ ତାହାର ମିତ୍ରମାନଙ୍କ ଉପରେ ଏକ ହାହାକାର ଗୀତ। ଏଥିରେ ନଗର ପରେ ନଗରର ନାମ ଆସେ: ନୋଫ, ନୋ, ସୀନ, ତଫନେହେସ। ସେଗୁଡ଼ିକରେ ନିଆଁ ଲଗାଯାଏ କିମ୍ବା ସେମାନଙ୍କ ଲୋକଙ୍କୁ ବନ୍ଦୀ କରି ନିଆଯାଏ। ଆମର ପିତା ଫାରୋର ବାହୁ ପୂର୍ବରୁ ଭାଙ୍ଗି ଦେଇଛନ୍ତି, ଆଉ ତାହା ପଟି ବନ୍ଧାଯିବ ନାହିଁ। ବରଂ ଖଡ଼୍ଗ ବାବିଲର ହାତରେ ଦିଆଯାଏ।

ଅଧ୍ୟାୟ 30।

ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା:

ହେ ମନୁଷ୍ୟପୁତ୍ର, ଭାବବାଣୀ ପ୍ରଚାର କରି କୁହ, ପ୍ରଭୁ ପିତା ଏହି କଥା କହନ୍ତି, “ତୁମ୍ଭେମାନେ ବିଳାପ କରି କୁହ, ‘ହାୟ, ସେହି ଦିନ!’ କାରଣ ସେହି ଦିନ ନିକଟବର୍ତ୍ତୀ, ଆମ୍ଭମାନଙ୍କ ପିତାଙ୍କ ଦିନ ନିକଟବର୍ତ୍ତୀ— ତାହା ମେଘାଚ୍ଛନ୍ନ ଦିନ, ଜାତିଗଣ ନିମନ୍ତେ ବିନାଶର ସମୟ। ମିସର ବିରୁଦ୍ଧରେ ଖଡ୍ଗ ଆସିବ, ଆଉ ମିସରରେ ହତ ଲୋକମାନେ ପତିତ ହେବା ବେଳେ, ସେମାନେ ତାହାର ଐଶ୍ଵର୍ଯ୍ୟ ବହିନେବା ବେଳେ ଓ ତାହାର ଭିତ୍ତିମୂଳ ଉତ୍ପାଟିତ ହେବା ବେଳେ କୂଶରେ ଯାତନା ହେବ। କୂଶ, ପୂଟ ଓ ଲୂଦ, ସମଗ୍ର ଆରବ, ଲୂବୀୟା ଓ ନିୟମ-ଦେଶର ଲୋକମାନେ ସେମାନଙ୍କ ସହିତ ଖଡ୍ଗ ଦ୍ଵାରା ପତିତ ହେବେ। ଆମ୍ଭମାନଙ୍କ ପିତା ଏହି କଥା କହନ୍ତି, “ଯେଉଁମାନେ ମିସରକୁ ସମର୍ଥନ କରନ୍ତି, ସେମାନେ ପତିତ ହେବେ, ଆଉ ତାହାର ଗର୍ବିତ ବଳ ଅଧଃପତିତ ହେବ; ମିଗ୍ଦୋଲଠାରୁ ସିବେନୀ ପର୍ଯ୍ୟନ୍ତ ସେମାନେ ତାହା ମଧ୍ୟରେ ଖଡ୍ଗ ଦ୍ଵାରା ପତିତ ହେବେ, ଏହା ପ୍ରଭୁ ପିତା କହନ୍ତି। ଧ୍ଵଂସିତ ଦେଶସମୂହ ମଧ୍ୟରେ ସେମାନେ ଧ୍ଵଂସିତ ହେବେ, ଆଉ ଉଚ୍ଛିନ୍ନ ନଗରସମୂହ ମଧ୍ୟରେ ତାହାର ନଗରସମୂହ ପଡ଼ିରହିବ। ଯେତେବେଳେ ଆମ୍ଭେ ମିସରରେ ଅଗ୍ନି ଲଗାଇବା ଓ ତାହାର ସମସ୍ତ ସାହାଯ୍ୟକାରୀ ଭଗ୍ନ ହେବେ, ସେତେବେଳେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ।

ସେହି ଦିନ ନିଶ୍ଚିନ୍ତ କୂଶକୁ ଭୟଭୀତ କରିବା ନିମନ୍ତେ ଦୂତଗଣ ଜାହାଜରେ ଚଢ଼ି ଆମ୍ଭ ସମ୍ମୁଖରୁ ବାହାରିଯିବେ, ଆଉ ମିସରର ଦିନରେ ସେମାନଙ୍କୁ ଯାତନା ଆକ୍ରାନ୍ତ କରିବ; କାରଣ ଦେଖ, ତାହା ନିଶ୍ଚୟ ଆସୁଅଛି।

ପ୍ରଭୁ ପିତା ଏହି କଥା କହନ୍ତି, “ଆମ୍ଭେ ବାବିଲର ରାଜା ନବୂଖଦ୍‌ନିତ୍ସରଙ୍କ ହସ୍ତ ଦ୍ଵାରା ମିସରର ଲୋକସମୂହକୁ ଲୁପ୍ତ କରିବା। ସେ ଓ ତାହାଙ୍କ ସଙ୍ଗେ ଥିବା ତାହାଙ୍କ ସୈନ୍ୟଦଳ, ଯେଉଁମାନେ ଜାତିଗଣ ମଧ୍ୟରେ ଅତି ନିଷ୍ଠୁର, ଦେଶ ବିନାଶ କରିବା ନିମନ୍ତେ ଅଣାଯିବେ; ସେମାନେ ମିସର ବିରୁଦ୍ଧରେ ଆପଣାମାନଙ୍କ ଖଡ୍ଗ ବାହାର କରିବେ ଓ ହତ ଲୋକରେ ଦେଶ ପରିପୂର୍ଣ୍ଣ କରିବେ। ଆମ୍ଭେ ନୀଲ ନଦୀର ସ୍ରୋତସମୂହ ଶୁଷ୍କ କରିବା ଓ ଦେଶକୁ ଦୁରାଚାରୀମାନଙ୍କ ନିକଟରେ ବିକ୍ରୟ କରିବା; ଆମ୍ଭେ ବିଦେଶୀମାନଙ୍କ ହସ୍ତ ଦ୍ଵାରା ଦେଶ ଓ ତନ୍ମଧ୍ୟସ୍ଥ ସମସ୍ତ ବସ୍ତୁ ଧ୍ଵଂସ କରିବା। ଆମ୍ଭେ ପିତା ଏହା କହିଅଛୁ।”

ପ୍ରଭୁ ପିତା ଏହି କଥା କହନ୍ତି, “ଆମ୍ଭେ ପ୍ରତିମାସମୂହ ବିନାଶ କରିବା ଓ ମେମ୍ଫୀସରୁ ଅସାର ମୂର୍ତ୍ତିସମୂହ ଲୁପ୍ତ କରିବା। ମିସର ଦେଶରେ ଆଉ କୌଣସି ଅଧିପତି ରହିବ ନାହିଁ, ଆଉ ଆମ୍ଭେ ସମୁଦାୟ ଦେଶରେ ଭୟ ବ୍ୟାପ୍ତ କରିବା। ^a ଆମ୍ଭେ ପଥ୍ରୋଷକୁ ଧ୍ଵଂସ କରିବା, ସୋୟନରେ ଅଗ୍ନି ଲଗାଇବା ଓ ଥେବସ ଉପରେ ଦଣ୍ଡାଜ୍ଞା ଆଣିବା। ^b ଆମ୍ଭେ ମିସରର ଦୁର୍ଗ ପଲୂସୀୟମ ଉପରେ ଆପଣା କ୍ରୋଧ ଢାଳିବା ଓ ଥେବସର ଲୋକସମୂହକୁ ଉଚ୍ଛିନ୍ନ କରିବା। ଆମ୍ଭେ ମିସରରେ ଅଗ୍ନି ଲଗାଇବା; ପଲୂସୀୟମ ଯାତନାରେ ଛଟପଟ ହେବ, ଥେବସ ଭଗ୍ନ ହେବ, ଆଉ ମେମ୍ଫୀସ ଦିନ ବେଳେ ଶତ୍ରୁମାନଙ୍କ ସମ୍ମୁଖୀନ ହେବ। ହେଲିଓପଲିସ ଓ ପୀବେଶତର ଯୁବକମାନେ ଖଡ୍ଗ ଦ୍ଵାରା ପତିତ ହେବେ, ଆଉ ନଗରସମୂହ ନିଜେ ବନ୍ଦୀତ୍ଵକୁ ଯିବେ। ତହପନ୍‌ହେଷରେ, ଯେତେବେଳେ ଆମ୍ଭେ ସେଠାରେ ମିସରର ଯୁଆଳି ଭାଙ୍ଗିବା, ସେତେବେଳେ ଦିନ ଅନ୍ଧକାରମୟ ହେବ, ଆଉ ତାହା ମଧ୍ୟରେ ତାହାର ଗର୍ବିତ ବଳ ଶେଷ ହେବ। ମେଘ ତାହାକୁ ଆଚ୍ଛାଦନ କରିବ, ଆଉ ତାହାର କନ୍ୟା-ନଗରସମୂହ ବନ୍ଦୀତ୍ଵକୁ ଯିବେ। ଏହିରୂପେ ଆମ୍ଭେ ମିସର ଉପରେ ଦଣ୍ଡାଜ୍ଞା ଆଣିବା। ତେବେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ।”

ପିତା ଫାରୋର ବାହୁ ଭାଙ୍ଗନ୍ତି

ଏକାଦଶ ବର୍ଷର ପ୍ରଥମ ମାସର ସପ୍ତମ ଦିନରେ ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହେଲା:

ହେ ମନୁଷ୍ୟପୁତ୍ର, ଆମ୍ଭେ ମିସରର ରାଜା ଫାରୋର ବାହୁ ଭାଙ୍ଗିଅଛୁ; ଆଉ ଦେଖ, ଖଡ୍ଗ ଧରିବା ପାଇଁ ଯଥେଷ୍ଟ ବଳବାନ ହେବା ନିମନ୍ତେ ଆରୋଗ୍ୟ ଲାଗି ତାହା ବନ୍ଧାଯାଇ ନାହିଁ କିମ୍ବା ଖପୁରୀ ଦିଆଯାଇ ନାହିଁ। ଏଣୁ ପ୍ରଭୁ ପିତା ଏହି କଥା କହନ୍ତି, “ଦେଖ, ଆମ୍ଭେ ମିସରର ରାଜା ଫାରୋର ବିପକ୍ଷ ଅଟୁ। ଆମ୍ଭେ ତାହାର ଉଭୟ ବାହୁ—ବଳବାନ ଓ ଭଗ୍ନ ଉଭୟ—ଭାଙ୍ଗିବା ଓ ତାହାର ହସ୍ତରୁ ଖଡ୍ଗ ପକାଇ ଦେବା। ଆମ୍ଭେ ମିସରୀୟମାନଙ୍କୁ ଜାତିଗଣ ମଧ୍ୟରେ ଛିନ୍ନଭିନ୍ନ କରିବା ଓ ନାନା ଦେଶରେ ସେମାନଙ୍କୁ ବିକ୍ଷିପ୍ତ କରିବା। ଆମ୍ଭେ ବାବିଲର ରାଜାଙ୍କ ବାହୁ ସବଳ କରିବା ଓ ଆପଣା ଖଡ୍ଗ ତାହାଙ୍କ ହସ୍ତରେ ଦେବା, ମାତ୍ର ଆମ୍ଭେ ଫାରୋର ବାହୁ ଭାଙ୍ଗିବା, ତହିଁରେ ଫାରୋ ବାବିଲର ରାଜାଙ୍କ ସମ୍ମୁଖରେ ମୃତ୍ୟୁ-ଆସନ୍ନ ଲୋକ ପରି ଆର୍ତ୍ତନାଦ କରିବ। ଆମ୍ଭେ ବାବିଲର ରାଜାଙ୍କ ବାହୁ ସବଳ କରିବା, ମାତ୍ର ଫାରୋର ବାହୁ ପତିତ ହେବ। ଯେତେବେଳେ ଆମ୍ଭେ ଆପଣା ଖଡ୍ଗ ବାବିଲର ରାଜାଙ୍କ ହସ୍ତରେ ଦେବା ଓ ସେ ମିସର ଦେଶ ବିରୁଦ୍ଧରେ ତାହା ବିସ୍ତାର କରିବେ, ସେତେବେଳେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ। ଆମ୍ଭେ ମିସରୀୟମାନଙ୍କୁ ଜାତିଗଣ ମଧ୍ୟରେ ଛିନ୍ନଭିନ୍ନ କରିବା ଓ ନାନା ଦେଶରେ ସେମାନଙ୍କୁ ବିକ୍ଷିପ୍ତ କରିବା। ତେବେ ସେମାନେ ଜାଣିବେ ଯେ ଆମ୍ଭେ ପିତା ଅଟୁ।”