Wendanyu ko Myee Agobo Okweek
Koleenji Jeso icheek komyee kole koonei icheek eng' sinagogisyek, ak kobar icheek piik che parei kole igoitoi poisyet Kamuktaindet. Ago wendanyi ko myee, amu nyoonu Kabuuset ne Tiliil kobaoryan ak kondochin icheek. Koweek riagutyennywa koek boiboiyet, ko uu sigisyetap kwony. Namei Kwanda icheek.
16 1“Kaamwaiwok tuguuchu tugul, si matobek. 2Oonei okweek eng' sinagogisyek; ago nyoonei sait, ne tuun kobwaat chii age tugul ne parei okweek kole igoitoi poisyet Kamuktaindet. 3Yaei niito amu ma kingen Kwanda anan anee. 4Ago kaamwaiwok niito si ye nyoonei saitnywa, obwaat ale kaamwaiwok. Ki ma amwaiwok niito kobooch taunet, amu ki atebi kobootok.
5“Ago nguno awendi ole mi ineendet ne ki iyook anee, ak mami chii age eng' okweek ne teebe, ‘Iwendi ano?’ 6Ago amu kaamwaiwok tuguuchu, kaanyiit arageneet muguleldang'wong'. 7Amwaiwok iman ale: wendanyu ko myee agobo okweek. Ngot ma awo, ma nyoonji okweek Kagaigaindet, Kabuuset ne Tiliil. Ago ngot awo, ayoogu ineendet kobwa okweek. 8Ak ye nyoonu ineendet, kobaoryanji ng'wony agobo tengekto ak imanda ak kirwoogutyet: 9agobo tengekto, amu ma iyan icheek anee; 10agobo imanda, amu awendi Kwandanyu ak ma ogeera kogeny; 11agobo kirwoogutyet, amu kagirwookyi laitoryatap ng'wonyuni.
12“Ta atinye tuguuk che chaang' che amwaiwok, ago ma omuuchi oib nguno. 13Ago ye nyoonu ineendet, Kabuusetap imanit, kondochin okweek koba imanit tugul. Ma ng'alaalei eng' ineegei, ago ng'alaalei ne kasei, ak komwaiwok ne nyoonei. 14Itoroora ineendet, amu namei ne po anee ak komwaiwok. 15Tuguuk tugul che tinyei Kwandanyu ko po anee; nooto si ka ale namei ne po anee ak komwaiwok.
16“Kitigin si ma ogeera kogeny; yeityo kitigin ogeera kogeny.”
Koweek Arageneng'wong' Koek Poiboiyet
17Ki teebegei anyun kasubikyik alak icheegei, koleenji, “Ibooru nee kole: ‘Eng' sait ne ming'in ma ogeera, ak yeityo eng' sait ne ming'in ogeera,’ ak, ‘Amu awendi Kwanda’?” 18Ki le anyun, “Ibooru nee kole, ‘sait ne ming'in’? Ma kingen ne mwaei.”
19Ki ngen Jeso kole machei koteep ineendet, ak koleenji icheek, “Oteebegei okweek ne amwae ye ale, ‘Eng' sait ne ming'in ma ogeera, ak yeityo eng' sait ne ming'in ogeera’?
20“Amwaiwok iman, iman ale: oriirtos ak oteiye, ago paibai ng'wony. Oaragendos, ago koweek arageneeng'wong' koek poiboiyet. 21Kwony ne mi labotik kogas ng'wanindo amu kagonyo saitnyi; ago ye kagosich lakweet, koutye nyalilda, amu koboiboen amu kagisich chii eng' ng'wony. 22Otinye anyun okweek arageneet nguno, ago ageerok kogeny, ak koboiboitu muguleldang'wong', ak mami chii age ne namei poiboiyeng'wong'.
23Eng' peetuunooto ma oteebe kiy age tugul. Amwaiwok iman, iman ale: ne osoom Kwandanyu tugul eng' kainennyu, kogoonok. 24Agoi nguno ma osoom kiy age tugul eng' kainennyu. Osoom, ak onyooru, si kosulda poiboiyeng'wong'.
25Kaamwaiwok tuguuchu eng' kalewen. Nyoonei sait, ne tuun ma ang'alaal kogeny eng' kalewen, ago amwaiwok komyee agobo Kwandanyu. 26Eng' peetuunooto osoom eng' kainennyu, ak ma amwaiwok ale asoome Kwandanyu agobo okweek; 27amu chamok Kwanda ineegei, amu kochama okweek ak koyan ale ki apunu Kwandanyo. a a v27 Mwachi Jeso kasubik kole chamei icheek Kwanda ineegei — ma eng' loo, ma kobunu Jeso ne ki egu kandoindet ne ma machei. Chamyetap icheek agobo Jeso ak iyanet ne po nyonetnyi ne kobunu Kwanda kiga koinde icheek eng' chamyetap Kwanda ineegei. 28Ki apunu Kwandanyu ak achut ng'wony; kogeny, aistoi ng'wony, awendi Kwandanyu.”
29Ki le kasubikyik, “Nguno ing'alaalei komyee ak ma iboisyee kalewen age tugul! 30Nguno kingen ale ingen tuguuk tugul ak ma imache chii age ne teebe okweek teebutik; nooto si kiyan ale ki ipunu Kwandanyo.”
31Ki wolu Jeso, kole, “Oyan nguno?
32“Keer, nyoonei sait — kagonyo — ne tuun kiyesta okweek, age tugul koba ye koonnyi, oleen anee aneege. Ago ma ami aneege; mi Kwandanyu kobooto anee. 33Kaamwaiwok niito si otinye kaalyeet eng' anee. Eng' ng'wony onyooru nyalilda, ago ogimit mugulelwekwok — kaaterter anee ng'wony.”