ମୋହର ଯିବା ତୁମ୍ଭମାନଙ୍କ ମଙ୍ଗଳ ନିମନ୍ତେ

ଯୀଶୁ ସେମାନଙ୍କୁ ସ୍ପଷ୍ଟ କହନ୍ତି ଯେ ସେମାନଙ୍କୁ ସମାଜଗୃହରୁ ବାହାର କରିଦିଆଯିବ ଏବଂ ପରମେଶ୍ୱରଙ୍କ ସେବା କରୁଛନ୍ତି ବୋଲି ଭାବୁଥିବା ଲୋକମାନେ ସେମାନଙ୍କୁ ହତ୍ୟା କରିବେ। ତଥାପି ତାହାଙ୍କ ଚାଲିଯିବା ମଙ୍ଗଳ, କାରଣ ଆତ୍ମା ଦୋଷ ପ୍ରମାଣ କରିବାକୁ ଓ ବାଟ ଦେଖାଇବାକୁ ଆସନ୍ତି। ସେମାନଙ୍କ ଦୁଃଖ ଜଣେ ସ୍ତ୍ରୀର ପ୍ରସବ ବେଦନା ପରି ଆନନ୍ଦରେ ପରିଣତ ହେବ। ପିତା ସେମାନଙ୍କୁ ପ୍ରେମ କରନ୍ତି।

ଅଧ୍ୟାୟ 16।

“ତୁମ୍ଭେମାନେ ଯେପରି ବିଘ୍ନ ନ ପାଅ, ଏଥିପାଇଁ ମୁଁ ତୁମ୍ଭମାନଙ୍କୁ ଏହିସବୁ କହିଅଛି। ସେମାନେ ତୁମ୍ଭମାନଙ୍କୁ ସମାଜଗୃହରୁ ବାହାର କରିଦେବେ; ଆଉ, ଯେଉଁ ସମୟରେ ଯେକେହି ତୁମ୍ଭମାନଙ୍କୁ ବଧ କରିବ, ସେ ଈଶ୍ଵରଙ୍କ ସେବା କରୁଅଛି ବୋଲି ମନେ କରିବ, ଏପରି ସମୟ ଆସୁଅଛି। ସେମାନେ ପିତାଙ୍କୁ କିମ୍ବା ମୋତେ ଜାଣି ନ ଥିବାରୁ ଏହିସବୁ କରିବେ। କିନ୍ତୁ ସେମାନଙ୍କ ସମୟ ଉପସ୍ଥିତ ହେଲେ ମୁଁ ତୁମ୍ଭମାନଙ୍କୁ କହିଥିଲି ବୋଲି ଯେପରି ତୁମ୍ଭେମାନେ ସ୍ମରଣ କର, ଏଥିପାଇଁ ମୁଁ ତୁମ୍ଭମାନଙ୍କୁ ଏହିସବୁ କହିଅଛି। ମୁଁ ତୁମ୍ଭମାନଙ୍କ ସଙ୍ଗରେ ଥିବାରୁ ଆରମ୍ଭରୁ ଏହିସବୁ ତୁମ୍ଭମାନଙ୍କୁ କହି ନ ଥିଲି।

“କିନ୍ତୁ ଏବେ ମୁଁ ମୋହର ପ୍ରେରଣକର୍ତ୍ତାଙ୍କ ନିକଟକୁ ଯାଉଅଛି, ଆଉ ‘ଆପଣ କେଉଁଠାକୁ ଯାଉଅଛନ୍ତି?’ ବୋଲି ତୁମ୍ଭମାନଙ୍କ ମଧ୍ୟରୁ କେହି ମୋତେ ପଚାରୁ ନାହଁ। ବରଂ ମୁଁ ତୁମ୍ଭମାନଙ୍କୁ ଏହିସବୁ କଥା କହିବାରୁ ଦୁଃଖ ତୁମ୍ଭମାନଙ୍କ ହୃଦୟ ପରିପୂର୍ଣ୍ଣ କରିଅଛି। ମୁଁ ତୁମ୍ଭମାନଙ୍କୁ ସତ୍ୟ କହୁଅଛି, ମୋହର ଯିବା ତୁମ୍ଭମାନଙ୍କ ମଙ୍ଗଳ ନିମନ୍ତେ। ମୁଁ ନ ଗଲେ ସେହି ସାହାଯ୍ୟକାରୀ, ପବିତ୍ର ଆତ୍ମା, ତୁମ୍ଭମାନଙ୍କ ନିକଟକୁ ଆସିବେ ନାହିଁ। କିନ୍ତୁ ମୁଁ ଗଲେ ତାହାଙ୍କୁ ତୁମ୍ଭମାନଙ୍କ ନିକଟକୁ ପ୍ରେରଣ କରିବି। ପୁଣି, ସେ ଆସି ପାପ, ଧାର୍ମିକତା ଓ ବିଚାର ବିଷୟରେ ଜଗତକୁ ଦୋଷୀ ବୋଲି ପ୍ରମାଣ କରିବେ: ପାପ ବିଷୟରେ, କାରଣ ସେମାନେ ମୋʼଠାରେ ବିଶ୍ଵାସ କରନ୍ତି ନାହିଁ; ଧାର୍ମିକତା ବିଷୟରେ, କାରଣ ମୁଁ ମୋହର ପିତାଙ୍କ ନିକଟକୁ ଯାଉଅଛି, ଆଉ ତୁମ୍ଭେମାନେ ମୋତେ ଆଉ ଦେଖିବ ନାହିଁ; ବିଚାର ବିଷୟରେ, କାରଣ ଏହି ଜଗତର ଅଧିପତି ବିଚାରିତ ହୋଇଅଛି।

“ତୁମ୍ଭମାନଙ୍କୁ କହିବା ନିମନ୍ତେ ମୋହର ଆହୁରି ଅନେକ କଥା ଅଛି, କିନ୍ତୁ ତୁମ୍ଭେମାନେ ଏବେ ସେହିସବୁ ସହିପାରିବ ନାହିଁ। କିନ୍ତୁ ସେ, ଅର୍ଥାତ୍‍ ସତ୍ୟମୟ ଆତ୍ମା, ଆସି ତୁମ୍ଭମାନଙ୍କୁ ସମସ୍ତ ସତ୍ୟ ପଥରେ କଢ଼ାଇନେବେ। ସେ ଆପଣାଠାରୁ କିଛି କହିବେ ନାହିଁ, ବରଂ ଯାହା କିଛି ଶୁଣନ୍ତି, ତାହା କହିବେ, ପୁଣି, ଯାହା ଆସୁଅଛି, ତାହା ତୁମ୍ଭମାନଙ୍କୁ ଜଣାଇବେ। ସେ ମୋତେ ମହିମାନ୍ଵିତ କରିବେ, କାରଣ ସେ ମୋହର କଥା ନେଇ ତୁମ୍ଭମାନଙ୍କୁ ଜଣାଇବେ। ମୋହର ପିତାଙ୍କର ଯାହା କିଛି ଅଛି, ସେସବୁ ମୋହର; ସେଥିପାଇଁ ମୁଁ କହିଲି, ସେ ମୋହର କଥା ନେଇ ତୁମ୍ଭମାନଙ୍କୁ ଜଣାଇବେ।

“ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଆଉ ଦେଖିବ ନାହିଁ; ପୁଣି, ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଦେଖିବ।”

ତୁମ୍ଭମାନଙ୍କ ଶୋକ ଆନନ୍ଦରେ ପରିଣତ ହେବ

ସେଥିରେ ତାହାଙ୍କ ଶିଷ୍ୟମାନଙ୍କ ମଧ୍ୟରୁ କେହି କେହି ପରସ୍ପର ପଚାରିଲେ, “‘ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଦେଖିବ ନାହିଁ, ପୁଣି, ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଦେଖିବ,’ ଆଉ ‘କାରଣ ମୁଁ ପିତାଙ୍କ ନିକଟକୁ ଯାଉଅଛି,’ ବୋଲି କହି ସେ କଅଣ କହୁଅଛନ୍ତି?” ତେଣୁ ସେମାନେ କହିବାକୁ ଲାଗିଲେ, “‘ଅଳ୍ପ ସମୟ’ ବୋଲି କହି ସେ କଅଣ କହୁଅଛନ୍ତି? ସେ କଅଣ କହୁଅଛନ୍ତି, ତାହା ଆମ୍ଭେମାନେ ଜାଣୁ ନାହୁଁ।”

ସେମାନେ ଯେ ତାହାଙ୍କୁ ପଚାରିବାକୁ ଇଚ୍ଛା କରୁଅଛନ୍ତି, ତାହା ଯୀଶୁ ଜାଣି ସେମାନଙ୍କୁ କହିଲେ, “‘ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଦେଖିବ ନାହିଁ, ପୁଣି, ଅଳ୍ପ ସମୟ ଉତ୍ତାରେ ତୁମ୍ଭେମାନେ ମୋତେ ଦେଖିବ,’ ବୋଲି ମୁଁ ଯାହା କହିଲି, ସେ ବିଷୟରେ କି ତୁମ୍ଭେମାନେ ପରସ୍ପର ପଚାରୁଅଛ?

“ସତ୍ୟ ସତ୍ୟ ମୁଁ ତୁମ୍ଭମାନଙ୍କୁ କହୁଅଛି, ତୁମ୍ଭେମାନେ ରୋଦନ ଓ ବିଳାପ କରିବ, କିନ୍ତୁ ଜଗତ ଆନନ୍ଦ କରିବ। ତୁମ୍ଭେମାନେ ଶୋକ କରିବ, କିନ୍ତୁ ତୁମ୍ଭମାନଙ୍କ ଶୋକ ଆନନ୍ଦରେ ପରିଣତ ହେବ। ସ୍ତ୍ରୀର ପ୍ରସବକାଳ ଉପସ୍ଥିତ ହେବାରୁ ତାହାକୁ ବେଦନା ହୁଏ; କିନ୍ତୁ ଥରେ ସନ୍ତାନ ପ୍ରସବ କଲା ଉତ୍ତାରେ ଜଗତରେ ଏକ ମନୁଷ୍ୟ ଜନ୍ମଗ୍ରହଣ କଲା ବୋଲି ସେ ଆନନ୍ଦିତ ହୋଇ ଆପଣା ଯନ୍ତ୍ରଣା ଆଉ ସ୍ମରଣ କରେ ନାହିଁ। ସେହିପରି ତୁମ୍ଭମାନଙ୍କର ମଧ୍ୟ ଏବେ ଦୁଃଖ ଅଛି, କିନ୍ତୁ ମୁଁ ତୁମ୍ଭମାନଙ୍କୁ ପୁନର୍ବାର ଦେଖିବି, ଆଉ ତୁମ୍ଭମାନଙ୍କ ହୃଦୟ ଆନନ୍ଦିତ ହେବ, ପୁଣି, ତୁମ୍ଭମାନଙ୍କ ଆନନ୍ଦ କେହି ତୁମ୍ଭମାନଙ୍କଠାରୁ ଅପହରଣ କରିବ ନାହିଁ।

ସେହି ଦିନ ତୁମ୍ଭେମାନେ ମୋତେ କିଛି ପଚାରିବ ନାହିଁ। ସତ୍ୟ ସତ୍ୟ ମୁଁ ତୁମ୍ଭମାନଙ୍କୁ କହୁଅଛି, ତୁମ୍ଭେମାନେ ମୋʼ ନାମରେ ମୋହର ପିତାଙ୍କୁ ଯାହା କିଛି ମାଗିବ, ତାହା ସେ ତୁମ୍ଭମାନଙ୍କୁ ଦେବେ। ଏପର୍ଯ୍ୟନ୍ତ ତୁମ୍ଭେମାନେ ମୋʼ ନାମରେ କିଛି ମାଗି ନାହଁ। ମାଗ, ତେବେ ପାଇବ, ଯେପରି ତୁମ୍ଭମାନଙ୍କ ଆନନ୍ଦ ସମ୍ପୂର୍ଣ୍ଣ ହୁଏ।

ମୁଁ ତୁମ୍ଭମାନଙ୍କୁ ଏହିସବୁ ଦୃଷ୍ଟାନ୍ତରେ କହିଅଛି। ମୁଁ ଯେଉଁ ସମୟରେ ଦୃଷ୍ଟାନ୍ତରେ ଆଉ କହିବି ନାହିଁ, ବରଂ ମୋହର ପିତାଙ୍କ ବିଷୟରେ ସ୍ପଷ୍ଟ ରୂପେ ତୁମ୍ଭମାନଙ୍କୁ କହିବି, ଏପରି ସମୟ ଆସୁଅଛି। ସେହି ଦିନ ତୁମ୍ଭେମାନେ ମୋʼ ନାମରେ ମାଗିବ, ଆଉ ମୁଁ ତୁମ୍ଭମାନଙ୍କ ନିମନ୍ତେ ମୋହର ପିତାଙ୍କୁ ନିବେଦନ କରିବି ବୋଲି ତୁମ୍ଭମାନଙ୍କୁ କହୁ ନାହିଁ; କାରଣ ପିତା ସ୍ଵୟଂ ତୁମ୍ଭମାନଙ୍କୁ ପ୍ରେମ କରନ୍ତି, ଯେଣୁ ତୁମ୍ଭେମାନେ ମୋତେ ପ୍ରେମ କରିଅଛ, ଆଉ ମୁଁ ଆମ୍ଭମାନଙ୍କ ପିତାଙ୍କଠାରୁ ଆସିଅଛି ବୋଲି ବିଶ୍ଵାସ କରିଅଛ। ^a ମୁଁ ମୋହର ପିତାଙ୍କଠାରୁ ଆସି ଜଗତରେ ପ୍ରବେଶ କଲି; ପୁନର୍ବାର ମୁଁ ଜଗତ ତ୍ୟାଗ କରି ମୋହର ପିତାଙ୍କ ନିକଟକୁ ଯାଉଅଛି।”

ତାହାଙ୍କ ଶିଷ୍ୟମାନେ କହିଲେ, “ଦେଖନ୍ତୁ, ଏବେ ଆପଣ ସ୍ପଷ୍ଟ ରୂପେ କହୁଅଛନ୍ତି, କୌଣସି ଦୃଷ୍ଟାନ୍ତ ବ୍ୟବହାର କରୁ ନାହାଁନ୍ତି! ଆପଣ ଯେ ସମସ୍ତ ବିଷୟ ଜାଣନ୍ତି, ଆଉ ଆପଣଙ୍କୁ କେହି ପ୍ରଶ୍ନ ପଚାରିବାର ଆବଶ୍ୟକ ନାହିଁ, ଏହା ଏବେ ଆମ୍ଭେମାନେ ଜାଣିଲୁ; ଏଣୁ ଆପଣ ଆମ୍ଭମାନଙ୍କ ପିତାଙ୍କଠାରୁ ଆସିଅଛନ୍ତି ବୋଲି ଆମ୍ଭେମାନେ ବିଶ୍ଵାସ କରୁଅଛୁ।”

ଯୀଶୁ ଉତ୍ତର ଦେଲେ, “ତୁମ୍ଭେମାନେ କି ଏବେ ବିଶ୍ଵାସ କରୁଅଛ?

“ଦେଖ, ଯେଉଁ ସମୟରେ ତୁମ୍ଭେମାନେ ଛିନ୍ନଭିନ୍ନ ହୋଇ ପ୍ରତ୍ୟେକେ ଆପଣା ଆପଣା ଗୃହକୁ ଯିବ ଓ ମୋତେ ଏକାକୀ ଛାଡ଼ିଦେବ, ଏପରି ସମୟ ଆସୁଅଛି — ଆସି ଉପସ୍ଥିତ ହୋଇଅଛି। ତଥାପି ମୁଁ ଏକାକୀ ନୁହେଁ; କାରଣ ମୋହର ପିତା ମୋହର ସଙ୍ଗରେ ଅଛନ୍ତି। ତୁମ୍ଭେମାନେ ଯେପରି ମୋʼଠାରେ ଶାନ୍ତି ପ୍ରାପ୍ତ ହୁଅ, ଏଥିପାଇଁ ମୁଁ ତୁମ୍ଭମାନଙ୍କୁ ଏହିସବୁ କହିଅଛି। ଜଗତରେ ତୁମ୍ଭେମାନେ କ୍ଲେଶ ଭୋଗ କରିବ, କିନ୍ତୁ ସାହସ ଧର — ମୁଁ ଜଗତକୁ ଜୟ କରିଅଛି।”