Avāna Hamnao Sāteka
Ithumwui Avāwui tui athishurda Jeremiahna kathānabingli naongarābingli meili khanmiyang kahai tampākli hokhuilaga, chili Shaokathatwui tampāk da ming mishit, kala athumwui mangāli ngaleiham akha sātekmihaowa. Ham kasemawui ham chi thāda maningmana, hiya sāluishitrarmara. Chiwui thili ana Prohowui shimwui tungkhomli ungluiya.
19 1Ithumwui Avāna hithāda hānga: Vālaga ham kasemawui leikhon hamnao akha lolu, kala mibingwui khararnaobing kaikhana kala pāngmonbingwui khararnaobing kaikhana khuiunglaga, 2kala Ham-katekwui Ngaveiwui khāmongli khalei Hinnomwui naomayarawui tampākli shoklu, kala chili ina nali hāngki kaji tui chi phongmilu. a a v2 Ham katek chiya leikhon hamwui akaithang katek akaina; ngavei chi awui khavaknaoli horyāng kahai ham katekbing chiwui vang eina holuina.
3Hānglu: Ithumwui Avāwui tui chi nganālu, O Judahwui awungabing kala Jerusalemwui mibing. Saikorawui Avā, Israelwui Avāna hithāda hānga: Yanglu, apam hili ina chithākha kalākashi khuikharāna, chithākha kashā kachiva̱wui khanā tingteilāra. 4Kaja athumna ili horhaowa, kala apam hili makathei ngasaka, kala athum, avā ngarā, kala Judahwui awungabingna matheikasa khangatei varebingli chili nganamkaphā riktai, kala apam hili khayon makhalei ashee eina pemda kahaina. 5Athumwui naomayarabing chi Baalwui vang rikkatā kachigat sākhavai meili riktā khavai, athumna Baalwui kaphung kajuipam sakai; chi ina makasomana, mahangtāmana, kala kaphaningla maphaningmana. 6Chiwui vang eina yanglu, zimiksho chi rārāli, da ithumwui Avāna hānga, chitharan apam hili Topheth kala Hinnomwui naomayarawui tampāk da maholuiki kaji, kha Shaokathatwui tampāk da hoki kajina. 7Apam hili ina Judah eina Jerusalemwui khangarān chi heishokra, kala athumwui yangkashebingwui mangāli, athumwui manglā kharing phākabingwui pāng eina, raighai eina athumli pitā ngasakra. Kala ina athumwui kathingun chi khamasaili yongkazata vānaobing kala okathuili khalei sāyurbingwui kashakazā sāmira. b b v7 Chili "heishok" kaji tui chi Jeremiahna khuikahai leikhon hamnao kaji tuiwui khon thāda shokngasaka — hamnao kavā chi Judahwui khangarān kavā chiwui khamatui thāna. 8Kala ina keinung hili khangachee kala kasir khavaipam ngasā ngasakra; awuili kānkhava kachiva̱na ngacheera, kala awui khamā saikorawui vang kasirora. 9Kala ina athumli athumwui naomayarabing kala ngalāva̱bingwui asā shai ngasakra, kala athumwui yangkashebing kala athumwui manglā kharing phākabingna athumwuitungli khuikharā kuinam kala kachot atamli, kachichāna khongnainaowui asā shaira.
10Chiwui thili na eina ngasoda vākabingwui mangāli nana hamnao chi sātekra,
11kala athumli hānglu: Saikorawui Avāna hithāda hānga: Khipānakha ham kasemawui ham asā sāteklaga makāluiphalung ngasak makhavai thāda, ina mibing hi kala keinung hili chithāda sātekra. Kala athumna Tophethli chifara, kaja chifa khavai apam khangatei maleimana. 12Apam hi kala chiwui kapān mibingli ina hithāda sāra, da ithumwui Avāna hānga, keinung hili Topheth thāda ngasakra. 13Jerusalemwui shimbing kala Judahwui awungabingwui shimbing, athumna shimtungli kazingramwui ashangva̱ saikorali nganamkaphā riktai kala khangatei varebingli mangkachigat heishok kahai shim saikora chi, Topheth thāda makatharpam ngasakra.
14Chiwui thili Jeremiah, ithumwui Avāna phongkhami khavai chihovā kahai Tophethwui eina rāda, ithumwui Avāwui shimwui kayāngli nganingda mibing saikorali hānga:
15Saikorawui Avā, ithumwui Israelwui Avāna hithāda hānga: Yanglu, ina keinung hi kala awui keinungbing saikorawuitungli, chiwuitungli ina hangtā kahai kalākashi saikora khuikharāna, kaja athumna akahung ngakaishida iwui tui nganā khavai mamayāmana kahaina.
