ኤርምያስ 19

19 ¹አባታችን እንዲህ አለ፦ ሄደህ የሸክላ ሠሪ ማሰሮ ግዛ፤ ከሕዝቡ ሽማግሌዎችና ከካህናቱ ሽማግሌዎች አንዳንዶቹን ይዘህ፣ ²በሸክላ ስብርባሪ በር መግቢያ ወዳለው ወደ ቤንሂኖም ሸለቆ ውጣ፤ የምነግርህንም ቃል በዚያ ዐውጅ። ^a a v2 ሸክላ ስብርባሪ የተሰበረ የሸክላ ዕቃ ፍንጥርጣሪ ነው፤ በሩም በአቅራቢያው ይጣሉ በነበሩት ስብርባሪዎች ምክንያት ተጠራ።

³እንዲህ በል፦ የይሁዳ ነገሥታት፣ የኢየሩሳሌምም ነዋሪዎች ሆይ፤ የአባታችንን ቃል ስሙ። የሰማይ ሠራዊት አባት፣ የእስራኤል አባት፣ እንዲህ ይላል፦ እነሆ፣ የሚሰማ ሁሉ ጆሮ እስኪቃጨል ድረስ በዚህ ስፍራ ላይ መቅሠፍት አመጣለሁ። ⁴እኔን ስለ ተዉኝ ይህንም ስፍራ ባዕድ ስላደረጉ፣ እነርሱ፣ አባቶቻቸውና የይሁዳ ነገሥታት ለማያውቋቸው ሌሎች አማልክት በዚህ ዕጣን ስላጠኑ፣ ይህንም ስፍራ በንጹሕ ደም ስለ ሞሉት ነው። ⁵ወንዶች ልጆቻቸውን ለበኣል የሚቃጠል መሥዋዕት አድርገው በእሳት ለማቃጠል የበኣልን የኰረብታ መስገጃዎች ሠሩ፤ ይህም ያላዘዝሁት፣ ያልተናገርሁትና በልቤ ያልታሰበ ነገር ነው። ⁶ስለዚህ እነሆ፣ ይህ ስፍራ ከእንግዲህ ቶፌት ወይም የቤንሂኖም ሸለቆ ሳይሆን የእልቂት ሸለቆ ተብሎ የሚጠራበት ቀን ይመጣል፤ ይላል አባታችን። ⁷በዚህ ስፍራ የይሁዳንና የኢየሩሳሌምን ዕቅድ አፈሳለሁ፤ በጠላቶቻቸው ፊት፣ ነፍሳቸውን በሚሹ እጅ በሰይፍ እንዲወድቁ አደርጋለሁ፤ በድናቸውንም ለሰማይ ወፎችና ለምድር አራዊት ምግብ አድርጌ እሰጣለሁ። ^b b v7 እዚህ ላይ “አፈሳለሁ” የሚለው ቃል ኤርምያስ ይዞት የነበረውን የሸክላ ማሰሮ ከሚያመለክተው ቃል ጋር ይመሳሰላል፤ ባዶ የሆነው ማሰሮ የይሁዳን ባዶ የሆነ ዕቅድ ያመለክታል። ⁸ይህችን ከተማ አስፈሪ፣ የመሳለቂያም አደርጋታለሁ፤ በአጠገቧ የሚያልፍ ሁሉ ይደነግጣል፣ በቍስሏም ሁሉ ይሳለቃል። ⁹የወንዶችና የሴቶች ልጆቻቸውን ሥጋ አበላቸዋለሁ፤ ጠላቶቻቸውና ነፍሳቸውን የሚሹ በከበቡትና ባስጨነቋቸው ጊዜ እያንዳንዱ የባልንጀራውን ሥጋ ይበላል።

¹⁰ከዚያም ከአንተ ጋራ በሄዱት ሰዎች ፊት ማሰሮውን ስበር፣

¹¹እንዲህም በላቸው፦ የሰማይ ሠራዊት አባት እንዲህ ይላል፦ አንድ ሰው ዳግመኛ ሊጠገን በማይችል ሁኔታ የሸክላ ሠሪን ዕቃ እንደሚሰብር፣ እንዲሁ ይህን ሕዝብና ይህችን ከተማ እሰብራለሁ፤ ለመቅበርም ሌላ ስፍራ ስለሌለ በቶፌት ይቀብራሉ። ¹²በዚህ ስፍራና በነዋሪዎቹ ላይ የማደርገው ይህ ነው፤ ይላል አባታችን፤ ይህችንም ከተማ እንደ ቶፌት አደርጋለሁ። ¹³የኢየሩሳሌም ቤቶችና የይሁዳ ነገሥታት ቤቶች እንደ ቶፌት ርኩስ ይሆናሉ፤ በጣራቸው ላይ ለሰማይ ሠራዊት ሁሉ ዕጣን ያጠኑባቸው፣ ለሌሎችም አማልክት የመጠጥ ቍርባን ያፈሰሱባቸው ቤቶች ሁሉ ናቸው።

¹⁴አባታችን ትንቢት እንዲናገር ከላከው ከቶፌት ኤርምያስ መጥቶ፣ በአባታችን ቤት አደባባይ ቆሞ ለሕዝቡ ሁሉ እንዲህ አለ፦

¹⁵የሰማይ ሠራዊት አባት፣ የእስራኤል አባታችን እንዲህ ይላል፦ ዐንገታቸውን አደንድነው ቃሌን ለመስማት እምቢ ብለዋልና በዚህች ከተማና በመንደሮቿ ሁሉ ላይ በእርሷ ላይ የተናገርሁትን መቅሠፍት ሁሉ አመጣለሁ።