ପିତା କୁମ୍ଭ ଭାଙ୍ଗି ପକାନ୍ତି

ଆମ୍ଭମାନଙ୍କ ପିତାଙ୍କ ବାକ୍ୟରେ ଯିରିମିୟ ପ୍ରାଚୀନମାନଙ୍କୁ ସେହି ଉପତ୍ୟକାକୁ ନେଇଯାଆନ୍ତି ଯେଉଁଠାରେ ପିଲାମାନଙ୍କୁ ପୋଡ଼ାଯାଇଥିଲା, ତାହାର ନାମ ହତ୍ୟା ଉପତ୍ୟକା ରଖନ୍ତି, ଏବଂ ସେମାନଙ୍କ ସାମ୍ନାରେ ଏକ ମାଟି କଳସ ଭାଙ୍ଗି ଚୂର୍ଣ୍ଣ କରନ୍ତି। କୁମ୍ଭାରର ପାତ୍ର ପରି ନୁହେଁ, ଏହାକୁ ପୁଣି ଗଢ଼ାଯାଇ ପାରିବ ନାହିଁ। ସେ ଏହି ବାର୍ତ୍ତା ମନ୍ଦିର ପ୍ରାଙ୍ଗଣକୁ ଫେରାଇ ନିଅନ୍ତି।

ଅଧ୍ୟାୟ 19।

ଆମ୍ଭମାନଙ୍କ ପିତା ଏହା କହିଲେ, ତୁମ୍ଭେ ଯାଇ କୁମ୍ଭକାରଠାରୁ ଗୋଟିଏ ମୃତ୍ତିକାର ପାତ୍ର କ୍ରୟ କର, ପୁଣି ଲୋକମାନଙ୍କ ପ୍ରାଚୀନବର୍ଗ ମଧ୍ୟରୁ କେତେକ ଓ ଯାଜକମାନଙ୍କ ପ୍ରାଚୀନବର୍ଗ ମଧ୍ୟରୁ କେତେକଙ୍କୁ ସଙ୍ଗରେ ନିଅ, ଆଉ ଠିକରା-ଦ୍ଵାରର ପ୍ରବେଶ ସ୍ଥାନରେ ଥିବା ବିନ୍‍-ହିନ୍ନୋମର ଉପତ୍ୟକାକୁ ବାହାରି ଯାଅ, ପୁଣି ମୁଁ ତୁମ୍ଭକୁ ଯେଉଁ ବାକ୍ୟ କହିବି, ତାହା ସେଠାରେ ପ୍ରଚାର କର। ^a

କୁହ, ହେ ଯିହୂଦାର ରାଜାଗଣ ଓ ଯିରୂଶାଲମ ନିବାସୀମାନେ, ତୁମ୍ଭେମାନେ ଆମ୍ଭମାନଙ୍କ ପିତାଙ୍କ ବାକ୍ୟ ଶୁଣ। ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ପିତା ଏହା କହନ୍ତି, ଦେଖ, ଆମ୍ଭେ ଏହି ସ୍ଥାନ ଉପରେ ଏପରି ବିପତ୍ତି ଆଣିବା ଯେ, ତାହା ଯେଉଁମାନେ ଶୁଣିବେ, ସେମାନଙ୍କ ପ୍ରତ୍ୟେକର କର୍ଣ୍ଣ ଝାଁ ଝାଁ ହେବ। କାରଣ ସେମାନେ ଆମ୍ଭକୁ ପରିତ୍ୟାଗ କରି ଏହି ସ୍ଥାନକୁ ଅପରିଚିତ କରିଅଛନ୍ତି, ଆଉ ଯେଉଁ ଅନ୍ୟ ଦେବତାମାନଙ୍କୁ ସେମାନେ କିମ୍ବା ସେମାନଙ୍କ ପିତୃପୁରୁଷଗଣ ଓ ଯିହୂଦାର ରାଜାଗଣ ଜାଣି ନ ଥିଲେ, ସେମାନଙ୍କ ଉଦ୍ଦେଶ୍ୟରେ ଏଠାରେ ଧୂପ ଜ୍ଵଳାଇଅଛନ୍ତି, ପୁଣି ଏହି ସ୍ଥାନକୁ ନିର୍ଦ୍ଦୋଷ ଲୋକଙ୍କ ରକ୍ତରେ ପରିପୂର୍ଣ୍ଣ କରିଅଛନ୍ତି। ପୁଣି ସେମାନେ ଆପଣା ପୁତ୍ରମାନଙ୍କୁ ବାଲ୍‍ଦେବ ଉଦ୍ଦେଶ୍ୟରେ ହୋମବଳି ରୂପେ ଅଗ୍ନିରେ ଦଗ୍ଧ କରିବା ନିମନ୍ତେ ବାଲ୍‍ଦେବର ଉଚ୍ଚସ୍ଥଳୀ ନିର୍ମାଣ କରିଅଛନ୍ତି—ଯାହା ଆମ୍ଭେ କେବେ ଆଜ୍ଞା କରି ନାହୁଁ କି ନିରୂପଣ କରି ନାହୁଁ, କିଅବା ଯାହା ଆମ୍ଭ ମନରେ ଉଦୟ ହୋଇ ନାହିଁ। ଏଥିପାଇଁ ଦେଖ, ଏପରି ସମୟ ଆସୁଅଛି, ଆମ୍ଭମାନଙ୍କ ପିତା କହନ୍ତି, ଯେତେବେଳେ ଏହି ସ୍ଥାନ ଆଉ ତୋଫତ୍‍ କିମ୍ବା ବିନ୍‍-ହିନ୍ନୋମର ଉପତ୍ୟକା ବୋଲି ଖ୍ୟାତ ନ ହୋଇ ହତ୍ୟାର ଉପତ୍ୟକା ବୋଲି ଖ୍ୟାତ ହେବ। ଆମ୍ଭେ ଏହି ସ୍ଥାନରେ ଯିହୂଦା ଓ ଯିରୂଶାଲମର ସଙ୍କଳ୍ପ ଶୂନ୍ୟ କରିବା, ଆଉ ସେମାନଙ୍କ ଶତ୍ରୁଗଣ ସମ୍ମୁଖରେ, ଯେଉଁମାନେ ସେମାନଙ୍କ ପ୍ରାଣ ଅନ୍ଵେଷଣ କରନ୍ତି, ସେମାନଙ୍କ ହସ୍ତ ଦ୍ଵାରା ସେମାନଙ୍କୁ ଖଡ଼୍ଗରେ ନିପାତ କରିବା। ପୁଣି ସେମାନଙ୍କ ଶବ ଆକାଶର ପକ୍ଷୀଗଣ ଓ ପୃଥିବୀର ପଶୁଗଣର ଭକ୍ଷ୍ୟ ରୂପେ ଦେବା। ^b ପୁଣି ଆମ୍ଭେ ଏହି ନଗରକୁ ବିସ୍ମୟର ଓ ଶିଷ୍‍ ଶବ୍ଦ କରିବାର ବିଷୟ କରିବା; ତହିଁ ନିକଟ ଦେଇ ଗମନ କରିବା ପ୍ରତ୍ୟେକ ଲୋକ ଆଚମ୍ବିତ ହୋଇ ତାହାର ସକଳ କ୍ଷତ ଦେଖି ଶିଷ୍‍ ଶବ୍ଦ କରିବେ। ଆଉ ସେମାନଙ୍କ ଶତ୍ରୁଗଣ ଓ ସେମାନଙ୍କ ପ୍ରାଣ ଅନ୍ଵେଷଣକାରୀମାନେ ଅବରୋଧ ଓ ସଙ୍କଟ ସମୟରେ ସେମାନଙ୍କୁ ଯେଉଁ କ୍ଳେଶ ଦେବେ, ସେଥିରେ ଆମ୍ଭେ ସେମାନଙ୍କୁ ଆପଣା ପୁତ୍ର ଓ କନ୍ୟାମାନଙ୍କ ମାଂସ ଭୋଜନ କରାଇବା, ଆଉ ପ୍ରତ୍ୟେକେ ଆପଣା ପ୍ରତିବାସୀର ମାଂସ ଭୋଜନ କରିବ।

ତେବେ ତୁମ୍ଭ ସଙ୍ଗରେ ଯାଉଥିବା ଲୋକମାନଙ୍କ ସମ୍ମୁଖରେ ତୁମ୍ଭେ ସେହି ପାତ୍ର ଭାଙ୍ଗି ପକାଅ,

ପୁଣି ସେମାନଙ୍କୁ କୁହ, ସ୍ଵର୍ଗୀୟ ବାହିନୀଗଣର ପିତା ଏହା କହନ୍ତି, କେହି କୁମ୍ଭକାରର ପାତ୍ର ଯେପରି ଭାଙ୍ଗି ପକାଏ, ଯାହା ଆଉ କେବେ ଯୋଡ଼ା ଯାଇ ନ ପାରେ, ସେହିପରି ଆମ୍ଭେ ଏହି ଲୋକ ଓ ଏହି ନଗରକୁ ଭାଙ୍ଗି ପକାଇବା। ଆଉ ପୋତିବା ପାଇଁ ଅନ୍ୟ ସ୍ଥାନ ନ ଥିବାରୁ ସେମାନେ ତୋଫତ୍‍ରେ ଶବ ପୋତିବେ। ଆମ୍ଭେ ଏହି ସ୍ଥାନ ଓ ତହିଁର ନିବାସୀମାନଙ୍କ ପ୍ରତି ଏହିପରି କରିବା, ଆମ୍ଭମାନଙ୍କ ପିତା କହନ୍ତି—ଏହି ନଗରକୁ ତୋଫତ୍‍ ତୁଲ୍ୟ କରିବା। ଆଉ ଯିରୂଶାଲମର ଗୃହସମୂହ ଓ ଯିହୂଦାର ରାଜାଗଣର ଗୃହସମୂହ ତୋଫତ୍‍ ପରି ଅଶୁଚି ହେବ—ଯେଉଁ ସକଳ ଗୃହର ଛାତ ଉପରେ ସେମାନେ ଆକାଶସ୍ଥ ସମୁଦାୟ ବାହିନୀ ଉଦ୍ଦେଶ୍ୟରେ ଧୂପ ଜ୍ଵଳାଇଅଛନ୍ତି ଓ ଅନ୍ୟ ଦେବତାମାନଙ୍କ ଉଦ୍ଦେଶ୍ୟରେ ପେୟ-ନୈବେଦ୍ୟ ଢାଳିଅଛନ୍ତି।

ଏଥିଉତ୍ତାରେ ଆମ୍ଭମାନଙ୍କ ପିତା ଯିରିମିୟଙ୍କୁ ଭବିଷ୍ୟଦ୍‍ବାକ୍ୟ କହିବା ନିମନ୍ତେ ଯେଉଁ ତୋଫତ୍‍କୁ ପ୍ରେରଣ କରିଥିଲେ, ସେଠାରୁ ସେ ଆସି ଆମ୍ଭମାନଙ୍କ ପିତାଙ୍କ ଗୃହର ପ୍ରାଙ୍ଗଣରେ ଠିଆ ହୋଇ ସମସ୍ତ ଲୋକଙ୍କୁ କହିଲେ,

ସ୍ଵର୍ଗୀୟ ବାହିନୀଗଣର ପିତା, ଇସ୍ରାଏଲର ଆମ୍ଭମାନଙ୍କ ପିତା ଏହା କହନ୍ତି, ଦେଖ, ଆମ୍ଭେ ଏହି ନଗର ବିରୁଦ୍ଧରେ ଯେଉଁ ସକଳ ବିପତ୍ତି ଘୋଷଣା କରିଅଛୁ, ତାହା ଏହି ନଗର ଓ ତହିଁର ଉପନଗରସମୂହ ଉପରେ ଆଣିବା, କାରଣ ସେମାନେ ଆପଣା ଆପଣା ଗ୍ରୀବା ଶକ୍ତ କରି ଆମ୍ଭ ବାକ୍ୟ ଶୁଣିବାକୁ ଅସମ୍ମତ ହୋଇଅଛନ୍ତି।