Ephraim awui Tekhamatei eina Kongluihai
Ephraimli kharāda chiha, ara thira, them kathembingna sākahai meoma̱ kala malaiwui eina shokkahai lan leia. Ithumwui Avāna athumli anao tukthui kahai singom ava̱ thāda samphangra da hānga. Kathewui ramwui eina ngatangmi kaji tui akha ngalāngda kāhao, chiwui thili khanganāmna kahaka eina tonga.
13 1Ephraimna hāng tharan, ngacheerarang leihaowa; Israelli a masot chikatasai. Kha Baal eina a yonkahai sāhaowa, kala a thihaowa.
2Ara athumna morei taisang taisangda sāhaira, athum khalattawui vang meoma̱ sem kasā sākhui; lupā meoma̱bing athum khalattawui thangkhamei eina semkakhui, saikora chi them kathembingwui otsakna. Hibingli athumna hānga, "Pha̱kaphayā kachigatbingna seinaobingli khamaya̱ sāranu!" 3Chiwui vang eina athum ngathor leichui thāda ngasāra, ngathor shimānthui ikra̱ thāda, lanpum eina phankazata lanji thāda, kala charfakhur eina shok meikhut thāda.
4Kha I nawui Avāna, Egypt ngaleiwui eina nali thānkashokkasa; nana iwui eina maningla khangatei Avā matheimana, kala iwui eina maningla huikhame khangatei maleiluimana. 5Lamhāngli, kazing kāng kasā ngaleili nali theikahai chi Ilaka. 6Ina athumli phaui tharan athum penlakhaowa; athum penlakhaowa, kala athumwui ning langsoi; chiwui vang eina athumna ili malaihaowa. 7Chieina ina athumli kazingkha̱ thāda ngasāhaira; kuirāng thāda shongfa ngasunli ina rimpama. 8Anao tukthui kahai singom ava̱ thāda ina athumli yuira; athumwui ningwui kharom ina serkhākra. Chili ina kazingkha̱ thāda athumli tukshaira, ram sāyur akhana serkazam kasā thāda.
9Israel, na ili, nawui ngachonkhameli ngakaishiwui vang eina, nakhalattali sākashimān rāhaira. 10Nawui keinung saikorali nali huikhui khavai, ara nawui awunga kali leikhala? "Ili awunga kala wungnaobing milu" da nana kahāng nawui khamungabing kali leikhala? 11Iwui malung kasāli ina nali awunga misai, kala iwui malungkhavātli ali khuithuimihaowa.
12Ephraimwui khayonkhamāng mahor namda lei; awui morei kazipsang kahaina. 13Naokhara̱wui kachot ali yuira, kha a mangkhama̱ naomayara akhana; khikhalajila atam kharā tharan, a naopamwui shokpamli mashokluimana. a a v13 Hi machut chiya, naosak akhana pharā atamli shok mahaingaiwui pong chi hina — Ephraim ningngateichaohai kajili kakao kakhanang chili ngahānkā khavai mangkhama̱ pemtinghaira.
14Kathewui ramwui pangshap eina ina athumli ngatangmira; kathi eina ina athumli huimira. O Kathi, nawui kazātyur kali leikhala? O Kathewui ram, nawui kashimān kali leikhala? Lukhamashan chi imik eina ngathumda lei. b b v14 Jishu Kathewui ram eina ringshok tharan, ithumwui Avāna tui hibing chi mathānwui khavao sākhangasa — Paulna chi latunghānga: "Kathi, nawui kathiri khipamli leida?" Kathewui ramna, ithumwui Avā ngatang khavai rā naongarā chili mahomshapmana.
15A khawo ngachaili nganaozao hailala, zingshoshongwui masi, lamhāngwui eina shokkahai ithumwui Avāwui masi chi rāra. Awui ura̱ok masāvaimara, kala awui ura̱ thenghaora; zingshoshongwui masina awui kazipshim eina aman kasak ot saikora ngaponra. 16Samariana awui khayonkhamāng phungra, khikhalajila ana awui Avāli ngakaishihaira. Athum raighai eina pitāra; athumwui naoshinaoli ngapokazamthatra, kala athumwui nao khavai sha̱naobingli awuk rāmphutmira.
