Nathumwui Avāwui shimli rālu
Kaphāngnao chi kahona. Tui chipāngda latlu, Assyria kala siguina mahuimirar da phonglu, pāng eina sākahai otli vare da hohaolu. Ithumwui Avāna athumli ningkhami eina leishira, ikra̱ thāda ngasāra da ngashita, kala athumwui athei ali eina shoka da ngathalak eina hānga.
14 1O Israel, nathumwui Avāli mai ngareiunglu; kaja nathumwui moreibing chiwui vang eina nathum phei ngaphokhaira.
2Tui khuirāda ithumwui Avāli mai ngareiunglu; ali hithāda hānglu: "Ithumwui khayonkhamāng saikora khuithuiulu, kala lukhamashan eina ithumli khuimilu, chithākha ithumna ithumwui morchaiwui athei chigatra. 3Assyriana ithumli mahuimirarmana; ithumna sigui matongmara. Ithumna ara 'Ithumwui varebing' da ithum khalattawui pāng eina sākahai otli mahāngluimara, kaja avāva̱ makhalei china nawui lungli avāwui lukhamashan pemting samphanga."
4"Ina athumwui ning khangachei raimira; ina athumli aman mamila leishira, kaja iwui malungkhavāt athumwui eina vānhaira. a a v4 Hosea china Avāna awui naongarā ali katang khuirā ningkachāng kahai apamli kupra: raimihaida, kala aman mamila leishihai — athumna chi samphang khavai sāwui vang maningmana, kha awui ning shimli ngareiungwui vang eina. 5Ina Israelwui vang ikra̱ thāra; ana timrāwon thāda awon wonra, kala Lebanonwui cedarthing thāda angayung sa̱ra. 6Awui ashonbing ngapānvāra; awui tekhamatei oliverong thāra, awui nganam Lebanonwui cedarthing thāra. 7Athumna ngareiungda iwui khaya̱li pamra; athumna mā thāda mataisangra kala drakhārong thāda awon wonra, kala athumwui ming Lebanonwui drakhāra̱ thāra. 8"O Ephraim, ina meoma̱ eina ara khisā leira? Ina nali ngahānkāra kala nali mayonkhamera. Ina khamateka cypressthing kathāna; nawui athei iwui eina kharāna."
9Thangkhama a china hāngda khalei hi theishingkhuiranu; ning kazang a china chi theikhuiranu. Kaja ithumwui Avāwui apong khamashungana, kala khangarongabingna chili zatra, kha ngakaikashebing china chili phei ngaphokra.
