Kaibü Bou jungto chem to louashi
Thonbü lem kho himlepbü che ki. Ngüh langenan sepeiashi, Assiria hoba koli shuongei akhümenlabü dogo himashi, hoba ikei kümbü shuong to mühghaü dogo lenbü thonashi. Seneibü Bouei haoen amlang sanoulabü dogo, haoen thüka busim tegü kilabü dogo maangangkei, hoba haoeneibü hek kho hao ka longda dogo chongchingko lauda.
14 1O Israel, kaibü Bou jungto sepeinyu ngaiashi; aishanga no kaibü shabü laüa phaiyetkei.
2Seneibü Bou jungto ngüh lamlean yoa sepeinyu ngaiashi; hoba hao to lenashi, “Küneibü shedbü pendou apbushi hoba onouei kün sungletashi, khei künei küneibü sembung hek lembü kula shanga. 3Assiriabüei kün akhümenlabü; künei koli thüka asetlabü. Künei touje ‘Küneibü mühghaü shuong,’ dogo küneibü ikkümiklei to alaulabü, aishanga bou akibü shuongei ka jungto onou hapda.”
4“Ngei haoeneibü mashikbü maitilabü; ngei haoen amlang sanoulabü, aishanga kü khau haoen jungka bangjung sepeikei. a a v4 Hoseaei lai kho Bouei haoeibü shousi shuong ponpen loula mangsühbü sühko thükenkei: maitian, hoba amlang sanoukubü—haoenei kho keikei dogo aying, lausikei haoeibü maangpon chem phaito sepeibü laüa ki. 5Ngo Israel la nin tegü kilabü; haoei leilang chipen tegü longtilabü hoba Lebanon cedar bu tegü yomang junglabü. 6Haoeibü bhek shuong shoonglabü; haoeibü soneikangbü oliv long tegü kilabü, haoeibü ponlem Lebanon cedar bu tegü kilabü. 7Haoen sepeinyu ngaian kü yeme phanga haanglabü; haoen youshou tegü olinlabü hoba semlüh long tegü longtilabü, hoba haoeneibü nyen Lebanon ih tegü kilabü. 8O Efraim, heangsho shuong yoa ngei touje ai kümla? Ngeikei no to jongaida hoba no to lombo kida. Ngo olinbü busim tegü ki; kaibü hek kü ka longda.”
9Aoei songbüdobü ki, haoei habü thu ho ditentiashi; aoei ditenbü ki, haoei khübü ngetiashi. Aishanga seneibü Bou lamnyu shuong ngühmai ki, hoba saopobü shuongei kho danko paida, lausikei ngühkhüm lulimbü shuongei kho danko phaiyetlabü.
