Haokaphok 8

8 ¹Kha ithumwui Avāna Noah, ali ngasoda marikhongli khalei kharing yur saikora kala sha̱kei saikorali phaningunga, kala okathuitungli masi akha phanngasaka, chieina tara̱ hanung haophoka. ^a a v1 Torkhrāna ithumwui Avā "phaningunga" da hānga tharan, ana malaihairasai da khangamana — kha atam kapangsang eina awui kadhara lukhamashan tākam eina ot sai da khangana. ²Kathukawui ura̱ kala kazingramwui charfa shunghaowa, kala kazingramwui eina kazing rothuihaowa. ³Tara̱na okathuiwui eina hanungchingda, zimiksho shākha hangphangāthang kākashung eina tāhaowa. ⁴Kachāng kashinewui tharāda kashinethang eina marikhong chi Ararat kaphungbingli ngasāmhaowa. ^b b v4 Ararat hina phungrei shong akha khangana, phungreiton akha maning khangamana. ⁵Tara̱na kachāng katharā eina tangda hanungchingda, kachāng katharāwui kharethang eina kaphungtonbing theiphokhaowa.

⁶Zimiksho hangmatithang kākashung eina, Noahna marikhongli sākahai charfa chi shomi, ⁷ana hangkhā akha chihovāda, okathuiwui eina tara̱ thengkahai eina tangda hangkhā chi yongung yongvā sai. ⁸Chiwui thili ngaleiwui amaili tara̱ nemhaira da yangkhavai, ana nāsha̱ chi awui eina chihovā. ⁹Kha nāsha̱ chiya aphei khangasām khavai pam masamphangmiwui vang marikhongli awuili latunghaowa, kaja okathui katonga amaili aruila tara̱ leilakthuwa. Chieina ana apāng khangkāda chi khuilaga marikhongli awuili khuiratunghaowa. ¹⁰Aruila zimiksho shinithang ngaraida, latluida marikhongwui eina nāsha̱ chi chihovā. ¹¹Chithang ngazin nāsha̱ chi akhamorli rāmshai kahai oliverong anah akha zangda awuili latunghaowa, chieina okathuiwui eina tara̱ hanunghairasai da Noahna thei. ¹²Aruila zimiksho shinithang ngaraida, chiwui thili nāsha̱ chi latluida chihovā; kha aruila awuili malatungluithuwa.

¹³Noahwui zingkum shākatharuka kala khare kum, kachāng kharewui kharethang eina okathuiwui eina tara̱ thenghairasai. Noahna marikhongwui faror chi khuithuihaida, yangshoklaga ngaleiwui amai thenghairasai da thei. ¹⁴Kachāng kakhanewui maga̱da kashinethang eina okathui thengserhaowa.

¹⁵Chiwui thili ithumwui Avāna Noahli hānga,

¹⁶"Na, nali ngasoda napreiva̱, nanaomayara ngarā kala nanaomayara ngarāwui preiva̱ ngarā, marikhongwui eina shoklu. ¹⁷Nali ngasoda kharing yur kachiva̱, asā khavai saikora, vānao, sāyur, ngaleitungli ngarikazata saikora khuishoklu, chieina athumna okathuili okthuida, athei matheida, ngaleitungli mataisangranu."

¹⁸Chieina Noah, awui naomayara ngarā, apreiva̱, kala athumwui preiva̱ ngarā ngasoda shokhaowa. ¹⁹Sāyur kachiva̱, ngarikazata yur kachiva̱, vānaoyur kachiva̱, okathuili ngawokazata saikora, ayur-ayā athishurda marikhongwui eina shokhaowa.

²⁰Noahna ithumwui Avāli hanphut akha sākhuida, kathara sāyur saikora kala kathara vānaoyur saikorawui eina kaikha khuilaga, hanphuttungli rikkatā kachigat chigata.

²¹Ithumwui Avāna nganamkaphā chi nganamlaga awui ningli hānga, "Ina miwui vang ngaleili khangatei makhonluimara, thoukai miwui ningwui chukkhamaja chi nganuilakha eina thuida makaphāna, kala ina sākahai thāda kharing yur kachiva̱ khangatei mashimān ngasakluimara. ^c c v21 Ithumwui Avā chiya angai chikhalatta eina ningyāng ungmana, kha kachigat china tāphokmi kahai shitkasang khorum kala hamsang chiwui vang eina ningyāng ungngasaka. ²²Okathui ringchingda, athā yaowui atam kala māhā zāwui atam, khamakui kala kasā, lumkachāng kala sikachāng, ngashun ngayā khangatei mavānluimara."