Ki Ibwaat Kwandanyo Noah
Ki ibwaat Kwandanyo Noah, ak kotoi peek kochoorugei. Ki geer Noah ng'wony eng' chepkugit ak cheptuget kot koweek sogoot ne tuon. Ki teech koroito, ak kole Kwandanyo kole ma kobar kogeny tugul che saptos.
Ng'alaali Kwandanyo eng' mustarisyek 16–17, 21–22
8 1Ago ki ibwaat Kwandanyo Noah, ak tyong'ik tugul che saptos, ak kiyagiik tugul che ki mi ineendet moinget, ak ki iusyi usoonet eng' ng'wony, si kotoi peek kochoorugei. a a v1 Ye mwaei Bukuit ne Tilil kole “ki ibwaat” Kwandanyo, ma nyumnyumei kole kiga libwaatagei — nyumnyumei kole ki yai ko uu chamyennyi ne po arorutyet eng' sait ne kiga kilewen. 2Ki ket kong'iik che kutune peek che po rireet ne oo ak kurgotigap kipsengwet, ak kitononso ropta ne punu kipsengwet. 3Ki testai peek kochoorugei eng' ng'wony, ak ye kagobata peetuusyek pogol ak konom, kochoorugei peek. 4Ki tonon moinget eng' tuloonoogap Ararat, eng' peetuutap taman ak tisap ne po arawet ne po tisap. b b v4 Boishei Ararat komoswekap tuloonook, ma tulwet agenge kityo. 5Ki testai peek kochoorugei kot koit arawet ne po taman; eng' peetuunnyi ne po tai, kimong'ji metowegap tuloonook.
6Ak ye kagobata peetuusyek artam, ki yaat Noah tirisyet ne ki yai eng' moinget, 7Ki iyookto chepkugit, ak kitiriren koweeksei ak koweeksei kot koyaam peek eng' ng'wony. 8Yeityo ki iyookto cheptuget kobun ineendet, si kogeer ngot kaga kochoorugei peek eng' ng'wony komugul. 9Ago ki ma konyoor cheptuget ol ne koteebee keldanyi, ak kiweeksei ole mi ineendet moinget, amu ki mi peek kotuch ng'wony komugul. Yeityo ki chuul eunnyi, ak konam, ak koibu ole mi ineendet moinget. 10Ki kenis peetuusyek tisap alak, ak koiyookto kogeny cheptuget kobun moinget. 11Ki weeksei cheptuget ole mi ineendet ko kagoimen, kotuch soetap mseituni ne leel ne kagocheek eng' kutinnyi, si konai Noah kole kaga kochoorugei peek eng' ng'wony. 12Ki kenis peetuusyek tisap alak, yeityo koiyookto kogeny cheptuget; ak ma koweeksei ole mi ineendet kogeny.
13Eng' kenyiitap Noah ne po pogol lo ak agenge, eng' peetuutap tai ne po arawet ne po tai, ki kagoyaam peek eng' ng'wony. Ki isto Noah angeet ne po moinget, ak kogeer, ak konyoor koga koyaam ng'wony komugul. 14Eng' peetuutap tamanwogik aeng' ak tisap ne po arawet ne po aeng', ki kagoyaam ng'wony kiwong'u.
15Yeityo ki leenji Kwandanyo Noah,
16“Mong' moinget, inyee ak chebyoseng'ung', weeriiguk ak kwonyiigap weeriiguk kobootok. 17Imut kobootok tyong'ik tugul che saptos, uyoon tugul: toriitik, tyong'ik, ak tugul che ichuutegei ng'wony, si kochang'a eng' ng'wony, kosigisye, ak kotesagis eng' ng'wony.”
18Ki mong' anyun Noah, kobooto weeriikyik ak chebyosennyi ak kwonyiigap weeriikyik. 19Ki mong' eng' moinget tyong'ik tugul, ak tugul che ichuutegei ng'wony, ak toriitik tugul, ak tugul che uoti eng' ng'wony, ko uu kergeindonywa.
20Ki teech Noah kaaet ne po Kwandanyo, ak konam eng' tyong'ik tugul che tiliileen ak toriitik tugul che tiliileen, ak koongoi tiseiywek che kibeel eng' paraknyi.
21Ki ng'uchi Kwandanyo ng'uunet ne anyiny, ak kole eng' muguleldanyi, “Ma achuboot kogeny ng'wony amu chii, agot ngot ko ya pwaatetap muguleldap chii kobun ming'inatennyi; ak ma abar kogeny kiy age tugul ne sabei ko uu ye kaayai. c c v21 Ma ki boiboitu Kwandanyo amu ng'uunet ineegei, ago amu tyegyet ne iman ak kong'eetutyet ne ki iboor kagoochinet. 22Agoi ye mi ng'wony, mineet ak keesiet, kaitityet ak lalanyet, kemei ak kaititindo, peet ak kemeut, ma betyontu kogeny.”