Noahna Marikhongli Zanga
Ngāhaikasā chi kupa. Noahwui shimkhur eina ramsābing zanga, ithumwui Avāna khāmong shungmi, kala ngashun ngayā hangmatithang ngaleiwui azingwui eina, kazingwui eina tara̱ rā. Kathibing chi lairik hina kharāk eina tamkhui — ngalei kathengtungli khaksui kasui kachiva̱ — kala marikhong akha mang tara̱tungli ngaphonga.
7 1Chieina ithumwui Avāna Noahli hānga, "Na, nashi shimkhur katonga marikhongli zanglu, kaja hi thotli imangāli na khamashunga da ina theihaira. 2Kathara sāyur kachiva̱, avā kala ava̱, paira shini na khalatta khuilu, kala makathara sāyur, avā kala ava̱, paira akha; 3okathui saikorali ara̱-azā ringsang khavai, khamasaiwui vānaoyurla, avā kala ava̱, paira shini khuilu. 4Kaja shinithang thili ina okathuili zimiksho hangmati kala ngayā hangmati kazing romra, kala ina sākakhui kharinga yur saikora ngaleitung eina shimān ngasakra."
5Ithumwui Avāna kakaso athishurda Noahna sāsera.
6Tara̱ kaphong okathuili rā tharan, Noah zingkum shātharuk kāhairasai. 7Ana anaomayara ngarā, apreiva̱ kala athumwui preiva̱ ngarāli ngasoda tara̱ kaphongwui eina yāmshok khavai marikhongli zanga. 8Kathara sāyur kala makathara sāyur, vānaoyur kala ngaleili ngarikazata yur saikora, 9Ithumwui Avāna Noahli kakaso athishurda, avā kala ava̱ khanini khanini Noahli marikhongli rāzanga. 10Shinithangwui thili, tara̱ kaphong okathuili rāshoka. 11Noahwui zingkum shātharukwui kum, kachāng kakhane, zimiksho tharāda shini, chithang ngalāngda, kathuka kahakwui ura̱ saikora ngachakkhaiserhaowa, kala kazingramwui charfabing rakhaowa. 12Zingrot okathuili zimiksho hangmati kala ngayā hangmati tāhaowa.
13Chithang ngalāngda Noah, anaomayara Shem, Ham, Japheth, apreiva̱, kala anaomayara ngarāwui preiva̱ kathum marikhongli zanga. 14Athum kala sāyur ayur-ayā athishurda, sha̱kei ayur-ayā athishurda, ngaleili ngarikazata yur ayur-ayā athishurda, vānao ayur-ayā athishurda, kala angachāng kakā yur saikora marikhongli zanga. 15Kharing khaksui kakā asā khavai saikora khanini khanini Noahli marikhongli rāzanga. 16Ithumwui Avāna ali kakaso athishurda, asā khavai saikorawui avā kala ava̱ zanga; chieina ithumwui Avāna ali shungnamhaowa. 17Tara̱ kaphong okathuili zimiksho hangmatithang phonga; tara̱ pemkāda marikhong khāngkai, kala marikhong ngaleitungwui khamasaili ngayongzata. 18Tara̱na okathuili panglak eina kapungkāhaida, marikhong chi tara̱wui amaili ngayongzata. 19Tara̱ chi okathuili juimeikhangai juimeida, kazingram katongawui azingli khalei kaphung kajuiya saikora khaluimi. 20Tara̱ chi kaphungtungli khuining maga̱da khani shāda juimeida, kaphungbing chi khaluimi. 21Vānao, sha̱kei, ramsā, ngaleili ngamenkazat kachiva̱, kala mi saikora, okathuili ngawokazata manglākapai kachiva̱ thiserhaowa. 22Ngalei kathengli khalei, anātangkhurli kharingwui khakkhā leikahai kachiva̱ thihaowa. 23Ithumwui Avāna ngaleitungli khalei kharinga kachiva̱, mi, sāyur, phara̱-pharā yur, kazingli yongkazat vānao, shimān ngasakserhaida, okathuiwui eina katathaowa. Noah kala ali marikhonglungli ngasobing maningla taiya. 24Kala tara̱na okathuili zimiksho shākha hangphangā yuihaowa.
