ஆதியாகமம் 7

7 ¹ பின்பு எங்கள் பிதா நோவாவை நோக்கி: "நீயும் உன் குடும்பத்தார் அனைவரும் பேழைக்குள் வாருங்கள்; இந்தத் தலைமுறையில் எனக்கு முன்பாக நீ நீதிமானாயிருக்கிறதை நான் கண்டேன். ² சுத்தமான சகல மிருகங்களிலும் ஏழேழு ஜோடிகளையும், ஆணும் அதின் பெட்டையுமாக, சுத்தமல்லாத மிருகங்களில் ஒரு ஜோடியையும், ஆணும் அதின் பெட்டையுமாக உன்னோடே கூட்டிக்கொள். ³ ஆகாயத்துப் பறவைகளிலும் ஏழேழு ஜோடிகளை, ஆணும் பெண்ணுமாக, பூமியனைத்தின்மேலும் அவைகளின் வித்தை உயிரோடே காக்கும்படி கூட்டிக்கொள். ⁴ ஏனெனில் இன்னும் ஏழு நாட்களுக்குப் பின்பு, நான் நாற்பது பகலும் நாற்பது இரவும் பூமியின்மேல் மழையை வருஷிக்கப்பண்ணி, நான் உண்டாக்கின உயிருள்ள யாவையும் தரையின்மேல் இராதபடிக்கு அழித்துப்போடுவேன்" என்றார்.

⁵ எங்கள் பிதா தனக்குக் கட்டளையிட்டபடியெல்லாம் நோவா செய்தான்.

⁶ பூமியின்மேல் ஜலப்பிரளயம் வந்தபோது, நோவா அறுநூறு வயதுள்ளவனாயிருந்தான். ⁷ நோவா ஜலப்பிரளயத்தின் தண்ணீருக்குத் தப்பும்படி, தன் குமாரரோடும், தன் மனைவியோடும், தன் குமாரரின் மனைவிகளோடும் பேழைக்குள் பிரவேசித்தான். ⁸ சுத்தமான மிருகங்களிலும், சுத்தமல்லாத மிருகங்களிலும், பறவைகளிலும், தரையின்மேல் ஊரும் எல்லாவற்றிலும், ⁹ எங்கள் பிதா நோவாவுக்குக் கட்டளையிட்டபடியே, ஆணும் பெண்ணுமாக இரண்டிரண்டாய் நோவாவினிடத்தில் பேழைக்குள் வந்தன. ¹⁰ ஏழு நாட்களுக்குப் பின்பு, ஜலப்பிரளயத்தின் தண்ணீர் பூமியின்மேல் வந்தது. ¹¹ நோவாவின் ஆயுசின் அறுநூறாம் வருஷம் இரண்டாம் மாதம் பதினேழாம் தேதியாகிய அந்நாளிலே, மகா ஆழத்தின் ஊற்றுக்கண்களெல்லாம் பிளந்தன, வானத்தின் மதகுகளும் திறவுண்டன. ¹² நாற்பது பகலும் நாற்பது இரவும் பூமியின்மேல் மழை பெய்தது.

¹³ அந்நாளிலேதானே நோவாவும், அவன் குமாரராகிய சேம், காம், யாப்பேத் என்பவர்களும், நோவாவின் மனைவியும், அவன் குமாரரின் மூன்று மனைவிகளும் பேழைக்குள் பிரவேசித்தார்கள். ¹⁴ அவர்களும், தங்கள் தங்கள் ஜாதியின்படி சகல காட்டுமிருகங்களும், தங்கள் தங்கள் ஜாதியின்படி சகல நாட்டுமிருகங்களும், தங்கள் தங்கள் ஜாதியின்படி பூமியின்மேல் ஊரும் சகல பிராணிகளும், தங்கள் தங்கள் ஜாதியின்படி சகல பறவைகளும், சிறகுள்ள யாவையும் பிரவேசித்தன. ¹⁵ ஜீவசுவாசமுள்ள மாம்சமான யாவும் இரண்டிரண்டாய் நோவாவினிடத்தில் பேழைக்குள் வந்தன. ¹⁶ எங்கள் பிதா அவனுக்குக் கட்டளையிட்டபடியே, சகல மாம்சத்திலுமுள்ள ஆணும் பெண்ணும் பிரவேசித்தன. பின்பு எங்கள் பிதா அவனை உள்ளே அடைத்தார். ¹⁷ பூமியின்மேல் நாற்பது நாள் ஜலப்பிரளயம் நிலைத்திருந்தது; தண்ணீர் பெருகி, பேழையை மேலே தூக்கி, அதைத் தரையிலிருந்து உயர எழும்பப்பண்ணிற்று. ¹⁸ தண்ணீர் பூமியின்மேல் மிகவும் பலங்கொண்டு பெருகிற்று; பேழை தண்ணீரின்மேல் மிதந்து சென்றது. ¹⁹ தண்ணீர் பூமியின்மேல் இன்னும் அதிகமதிகமாய்ப் பெருகி, வானத்தின்கீழ் எங்குமுள்ள உயர்ந்த மலைகளெல்லாம் மூடப்பட்டன. ²⁰ தண்ணீர் மலைகளுக்கு மேலாக ஏறக்குறைய இருபத்திரண்டு அடி உயரம் பெருகி, அவைகளை மூடிற்று. ²¹ பூமியின்மேல் நடமாடின சகல ஜீவன்களும் மடிந்தன: பறவைகளும், நாட்டுமிருகங்களும், காட்டுமிருகங்களும், பூமியின்மேல் திரளாய் ஊரும் சகல பிராணிகளும், சகல மனுஷரும் மடிந்தனர். ²² வெட்டாந்தரையிலிருந்த யாவற்றிலும், நாசியில் ஜீவசுவாசமுள்ள யாவும் மரித்தன. ²³ எங்கள் பிதா தரையின்மேலிருந்த உயிருள்ள யாவையும், மனுஷர் முதல் மிருகங்கள், ஊரும் பிராணிகள், ஆகாயத்துப் பறவைகள்வரையிலும் அழித்துப்போட்டார்; அவைகள் பூமியிலிருந்து அழிக்கப்பட்டன; நோவாவும் அவனோடே பேழையில் இருந்தவர்களும் மாத்திரம் மீந்திருந்தார்கள். ²⁴ தண்ணீர் பூமியின்மேல் நூற்றைம்பது நாள் மிகுதியாயிருந்தது.