Abijahna Wungpamkhongli Pama
Abijahna kongwui ngasharli awui kahāng vaoshokta hānga: Judahli Aaronwui pāngmonbing, ngathor ngazin kachiwui nganamkaphā kala thaomei leichinga, Israelli mukvānao kala athum khalattana kapangkhui pāngmonbing leia. Mangāshong khanukshongli ngaphankhuikahai tharan, Judahna ithumwui Avāli ngakaoda maikashi samphanga, kaja athumna ali chihama.
13 1Jeroboam awungana mungda tharāda kachishata kum Abijahna Judahli mungphoka. 2Ana Jerusalemli zingkum kathum munga; awui ava̱va̱ chi Gibeahwui Urielwui naongalāva̱ Micaiahna. Abijah eina Jeroboamna rai ngarara. 3Abijahna kapangkhui raikapinga pangshap khalei mi lakh mati eina rai ngarara; kha Jeroboamna kapangkhui raikapinga pangshap khalei mi lakh chishat eina ali ngarar khavai ngarānhaowa.
4Abijahna Ephraimwui kaphungramli khalei Zemaraim Kaphungli nganinglaga hānga, "Nganālu, O Jeroboam kala Israelnao saikora! 5Israelwui Vare ithumwui Avāna Davidli kala awui naomayarabingli Israelwui wungpamkhong machi tuingashit akha eina mashimānda mihaira kaji nathum matheimala? a a v5 Machi kadhara hiya kathar kala mashimānda khalei ngashit akhana; machina kashakazā chi leishon ngasakta, kala mashimān khalei, machatmarawui khokkha akhali laklaka. 6Kha David nao Solomonwui rao Nebatwui nao Jeroboamna ngakarthuida awui akhavāli thuingarara. 7Aremawui mibing ali kuimareida rākazipta, Solomonwui nao Rehoboamli ngaruka; ana nganui kala malung tahaida, athumli mangasungrarmana.
8Ara nathum mi kachungkha mavāt, kala Jeroboamna nathumwui varebing sākhavai sākahai sinā seinaobing nathumli leisai kaji, nathumna Davidwui naomayarabingwui pāngli khalei ithumwui Avāwui wungram chi ngasung shaphaira da phaninga. 9Nathumna ithumwui Avāwui pāngmonbing, Aaronwui naomayarabing kala Levinaobingli mangashamserhaimala? Kala yur kateibing thāda nathum khalattawui vang pāngmonbing sākhuihaira. Kachikathāna mukvānao akha kala yaovā shini ngasoda kharā a chi, vare maningbingwui pāngmon ngasāshaphaira.
10Kha ithumwui Avā hi ithumwuina, kala ithumna ali mahorhaimana. Ali otram khangatha̱ pāngmonbing chiya Aaronwui naomayarabingna, kala Levinaobingna athumwui ot sāda lei. 11Ngathor kachi kala ngazin kachida athumna ithumwui Avāli rikkatā kachigat kala nganamkaphā thao riktāra; sinā kachanga tabletungli khamui ngaherda ngaher eina haida, sinā thaomeishong chila ngazin kachida kāparhaida horvāra. Ithumna ithumwui Avāwui ningkhami chi mayona, kha nathumna ali horhaira. 12Yanglu, ithumwui Avā hi ithumwui kathāna sāda ithumli ngasoda lei, kala awui pāngmonbingna nathumli ningkhangashar khongkhavai talla̱ singda lei. O Israelnaobing, nathumwui avāva̱ ngarāwui Vare ithumwui Avāli rai masāalu, kaja nathumna mayuimara."
13Jeroboamna Judahwui khanukshong eina kharā khavai kuimareida rimkapam chihovai; hithada Jeroboamwui raimibing Judahwui mangāshongla lei, kha rimkapam chi Judahwui khanukshongla lei. 14Judahna ngareiungda yang tharan, mangāshongla khanukshongla rai rāhaira kaji theihaoda, ithumwui Avāli ngakaowa; kala pāngmonbingna talla̱ khonga. 15Judahwui mibingna panglāk eina raikhon vaowa, kala athumna vao tharan, ithumwui Avāna Abijah kala Judahwui mangāli Jeroboam kala Israelnao saikorali sāthata. 16Israelnaobing Judahwui mangāli yāmhaowa, kala ithumwui Avāna athumli Judahwui pāngli sangmihaowa. 17Abijah kala awui raimibingna athumli reikhamatai eina sāthata; Israelwui kapangkhui mi lakh phangā thida pitai. 18Chithāda atam chili Israelli maishi ngasaka, kala Judahna yuihaowa, khikhalajila athumna ithumwui Avā, athumwui avāva̱ ngarāwui Vareli chihama. 19Abijahna Jeroboamli kharomvai, awui eina Bethel eina chiwui kha̱bing, Jeshanah eina chiwui kha̱bing, kala Ephron eina chiwui kha̱bing, keinungbing chi akhui.
20Jeroboamna Abijahwui thotli pangshap masamphangluirarmana, kala ithumwui Avāna ali sāthata, kala a thihaowa. 21Kha Abijahna reisanga. Ngalā tharāda mati ana ngashira, awui naomayara chi maga̱da khani kala awui naongalāva̱ chi tharāda tharuk phara. 22Abijahwui kasā khavā, awui shongfa kala kahāngbing, Iddo marānwui Lairikli kapiserhaida lei.
