Abija Chuba Aküm
Abijami lenten külen nungi pei o asünga ashi: Yihuda dang Aron jabaso putirtem, anogo tarongba tenla aser milen tashi lir, saka Israel dang nashi pungchitem aser pei sasa yangluba putirtem lir. Metong aser tongbang nungi meketbanga, Yihudai asen Tebu dang ayimten, aser Tebui parnok nem kümzükba agütsü, kechiaser parnok pa dang ajongshi.
13 1Chuba Yeroboam küm tertibuba nung, Abija Yihuda chuba aküm. 2Pai Yirusalem nung küm asem chuba; pa teka Gibea li Uriel tsür Mikaia liasü. Abija aser Yeroboam na tsüngda rara liasü. 3Abijami rara nung tashi tuluba teshimtet nisung meyirijang noklang pezü temeranger den rara tenzük; Yeroboami teshimtet tashi tulu nisung meyirijang noklang ti den pa anema tongbang noktak.
4Abija Efraim tenem lima nung aliba Zemarain tenem nung asünga ashi, “Yeroboam aser Israel ajak, kü dang ya angang! 5Asen Tebu, Israel Tsüngremi, metsü tezüngzüktepba ajanga, Israel chuba menden Dawid aser pa chirtem dang teti asoshi agütsüogo ta nenoki mezüngok ama? a a v5 Metsü tezüngzüktepbaji tazüngponga teti alir tangzük ka liasü; metsüi chiyungtsü benshi, aser teti alir, mesünyaktsü makoktsü tetepba temaitsü liasü. 6Saka Dawid chir Solomon tenzüker, Nebat chir Yeroboami, noktaka pei kibur anema mekang. 7Samesa nisungtem pa den sentepa, tanur aser mulung tsübuba aliba Solomon chir Rehoboam anema apuso, aser pai parnok anema noktaktsü makok.
8Tana nenoki Dawid chirtem ket nung aliba asen Tebu Yimli anema noktaktsü akok ta tebilem; kechiaser nenok telok jenti, aser Yeroboami nenok tsüngrem kümdaktsü yangluba hon agi nashi pungchitem nenok den lir. 9Nenoki asen Tebu putirtem, Aron jabasotem aser Levitem, aridoktsü, aser tangar kintem ama nenok pei putirtem yanglu masü no? Shiba nashi pungchi chanu ka aser san tepung tenet den arudir, tsüngrem masübatem putir ka kümdaktsü akok.
10Saka asen Tebu asenok meyong lir, aser asenoki pa senzüka matoktsü. Pa tenzükba putirtemji Aron jabasotem lir, aser Levitemji pei mapa nung lir. 11Anepdang aser nikongtsü shia parnoki asen Tebu dang tenla arong aser teronem menemtsü liangmesen; aser hon temeja langbang nung amtsük taren ayu, aser nikongtsü shia tsükloka hon milendong tendang. Asenoki asen Tebu mapa benshir, saka nenoki pa senzüka tokogo. 12Ajiang, asen Tebu asen den, asen tama lir, aser pa putirtemi nenok anema ar sangtsü jangzü den lir. Oh Israel nüburtem, nenok tsüraburtem Tsüngrem asen Tebu den terara; kechiaser nenok takok mangutsü.”
13Yeroboami parnok tesülen nungi arutsü asoshi, meketa arü mendanga ata; anungji par temeranger Yihuda anema liasü, aser arü mendakbaji parnok tesülen liasü. 14Yihudai meyipa reprangdang, tongbang pa tejaklen aser tesülen alibaji angu, aser asen Tebu dang ayimten; aser putirtemi jangzü apu. 15Idangji Yihuda nisungtemi ayimten; aser kodang parnoki ayimten, asen Tebui Abija aser Yihuda madang Yeroboam aser Israel ajak alep. 16Israel nüburtem Yihuda madang ajen, aser asen Tebui parnok Yihuda ket nung bendanga agütsü. 17Abija aser par temeranger ajaki parnok jenti tepset; aser Israel teshimtet nisung meyirijang noklang pungu tasü lao. 18Anungji iba mapang nung Israel tamajung aküm, aser Yihuda nungeri takok angu; kechiaser parnoki pei tsüraburtem Tsüngrem, asen Tebu dang imla liasü. 19Abijami Yeroboam aria ao, aser pa nungi yimtitem agi—Bethel aser idakji yim dena, Yeshana aser idakji yim dena, aser Efron aser idakji yim dena.
20Abija taküm piyong Yeroboam joko tashi mali aküm, aser asen Tebui pa alep, aser pa asü. 21Saka Abija tashi tali aküm. Pai tetsür terpezü agi, aser jabaso metsür-ana aser jala tertrok sotsü. 22Tang Abija mapa tanüngba, pa lenmangtem aser otem, ainkar Iddo mepuyangba kaket nung zülua lir.