Shishaki Yirusalem Anema Rara
Yimli kümzüka külen, Rehoboami asen Tebu ozüng senzüka toktsü, aser Ijip chuba Shishaki Tebu ki oset bener ao. Jangja shitet, nenoki ni senzüka toktsü, anungji ni nenok senzüka toktsütsü, chuba aser pa tongtipurtem pei sasa temzük—aser tesamatsüji pungbadaki, raksatet makok. Hon talungtsütem yongmenyin agi tanaben ayu.
12 1Rehoboam yimli kümzüka aser tashi tait akümdang, pai aser Israel ajaki asen Tebu ozüng senzüka toktsü. 2Rehoboam chuba küm pungububa nung, kechiaser parnoki asen Tebu anema temenen mena, Ijip chuba Shishaki Yirusalem anema rara. 3Pai Ijip nungi kor talungtsü meyirijang ka noklang ana, kor nung amenertem meyirijang trok külen, aser mezüngdangteti temeranger telok—Libia nunger, Sukkot nunger, aser Kus nunger—den atu. 4Pai Yihuda jara yimtitem agi, aser Yirusalem amak tashi atu.
5Ainkar Shemia, Shishak agi Yirusalem nung sentepa aliba Rehoboam o Yihuda lenirtem dangi arua ashi, “Yamai asen Tebui ashir, ‘Nenoki ni senzüka toktsü, anungji ni nenok Shishak ket nung bendanga agütsü.’”
6Idangji Israel lenirtem o chubai pei sasa temzüka, aser ashi, “Asen Tebu temeshi lir.”
7Tebui parnok pei sasa temzüka ta angudang, Tebu O Shemia dangi arua ashi, “Parnoki pei sasa temzükaogo; ni parnok mesamatsütsü, saka parnok nem kümzükba tila ka agütsü, aser kü ain Shishak ajanga Yirusalem anema madoktsütsü. 8Saka parnok, kü tenzükba aser alima yimlitem tenzükba metetdaktsü asoshi, Shishak tenzükertem alitsü.”
9Ijip chuba Shishaki Yirusalem anema rara, aser oset ajak bener ao—Tebu ki rongsen aser chuba ki rongsen, aser Solomoni hon agi yangluba jong ajak dena. 10Item melena, Rehoboam chubai yongmenyin jong yanglua; aser chuba ki kikümdang anükba temeranger arkotongtem nem iba jongtem bendanga agütsü. 11Kodangsa chubai Tebu kidangi ao, temerangertemi jong aben, aser aji tanükdak kong nung meyipa ayu. 12Rehoboam pei sasa temzüka yong, Tebu ain pa nungi pila, aser pa meshimeshia mesamatsü; aser Yihuda nungbo tajung indang rema.
13Rehoboam chubai Yirusalem nung pa sasa tashi ittsü aser chuba; pa chubatsü tenzükdang, küm lirka liasü, aser pai Tebui Israel kin ajak asoshi shimtetba, pei tenüng ayutsü asoshi, Yirusalem nung küm tertenet chuba. Aser pa tetsü tenüng Ammontsür Naama liasü. 14Pai tamajung inyak, kechiaser pai Tebu bushitsü asoshi pei mulung meshija.
15Rehoboam mapatem, tama nungi tatembang tashi, ainkar Shemia o tangur Iddo putipuyang kaket nung, kidong otsütem den zülua lir. Aser Rehoboam o Yeroboam na tsüngda nung maneni rara liasü. 16Rehoboam pei tsüraburtem den mejang, aser Dawid yimti nung arem; pa melena par chir Abijami chuba.