Shishak Ya Kai wa Urushalima Hari

Da ya kahu, Rehobowam ya yashe shari'ar Ubanmu, Shishak na Masar kuwa ya kwashe dukiyar haikali. Da aka faɗa masa a sarari, kun yashe ni, don haka ni ma na yashe ku, sarki da hakimansa suka ƙasƙantar da kansu — aka rage masifar, ba a soke ta ba. Aka maye gurbin garkuwoyin zinariya da na tagulla.

Babi na 12.

Sa'ad da mulkin Rehobowam ya kahu ya kuma yi ƙarfi, sai ya yashe shari'ar Ubanmu, shi da dukan Isra'ila tare da shi. A shekara ta biyar ta mulkin Rehobowam, saboda rashin amincinsu ga Ubanmu, sai Shishak sarkin Masar ya kai wa Urushalima hari. Ya zo da kekunan yaƙi dubu ɗaya da ɗari biyu, da mahaya dawakai dubu sittin, da kuma sojoji marasa ƙidaya daga Masar: Libiyawa, da Sukkiyawa, da Kushawa. Ya ci birane masu katanga na Yahuda, ya kuma zo har Urushalima.

Sai Shemaya annabi ya zo wurin Rehobowam da shugabannin Yahuda, waɗanda suka taru a Urushalima saboda Shishak, ya ce, “Ga abin da Ubanmu ya ce: Kun yashe ni, saboda haka na yashe ku ga Shishak.”

Sai shugabannin Isra'ila da sarkin suka ƙasƙantar da kansu, suka ce, “Ubanmu mai adalci ne.”

Da Ubanmu ya ga sun ƙasƙantar da kansu, sai maganar Ubanmu ta zo wa Shemaya cewa, “Sun ƙasƙantar da kansu, saboda haka ba zan hallaka su ba, amma zan ba su ɗan ceto, fushina kuwa ba zai zuba a kan Urushalima ta hannun Shishak ba. “Amma za su zama bayin Shishak, domin su san bauta ta da bautar mulkokin duniya.”

Sai Shishak sarkin Masar ya kai wa Urushalima hari, ya kwashe kome—dukiyar gidan Ubanmu, da dukiyar fadar sarki, har da garkuwoyin zinariya da Sulemanu ya yi. Sarki Rehobowam ya maye musu da garkuwoyin tagulla, ya kuma danƙa su a hannun shugabannin masu gadi da suke tsaron ƙofar gidan sarki. A duk sa'ad da sarki ya shiga gidan Ubanmu, masu gadi sukan ɗauko garkuwoyin, su kuma mai da su ɗakin gadi. Sa'ad da Rehobowam ya ƙasƙantar da kansa, sai fushin Ubanmu ya kau da shi, bai kuwa hallaka shi ɗungum ba; ana kuma da abubuwa masu kyau a Yahuda.

Sarki Rehobowam ya ƙarfafa kansa a Urushalima, ya yi mulki. Yana da shekara arba'in da ɗaya sa'ad da ya zama sarki, ya kuma yi mulki shekara goma sha bakwai a Urushalima, birnin da Ubanmu ya zaɓa daga dukan kabilan Isra'ila domin yă sa sunansa a can. Sunan mahaifiyarsa Na'ama, mutuniyar Ammon. Ya aikata mugunta, domin bai kafa zuciyarsa ga neman Ubanmu ba.

Ayyukan Rehobowam, daga farko har ƙarshe, suna a rubuce a cikin tarihin Shemaya annabi da na Iddo mai duba, waɗanda suka lissafa zuriya. Rehobowam da Yerobowam kuwa suka yi ta yaƙi kullayaumi. Rehobowam ya huta tare da kakanninsa, aka binne shi a Birnin Dawuda. Ɗansa Abiya kuwa ya yi sarauta a maimakonsa.