Abiya ya Hau Gadon Sarauta

Abaija ya ɗaga murya ya gabatar da maganarsa a hayin kwari: Yahuza har yanzu tana da firistocin Haruna, da hadayu na kowace rana da fitila, Isra'ila kuwa tana da maruƙa da firistocin da ta naɗa wa kanta. Da aka yi musu kwanto gaba da baya, Yahuza ta yi kuka ga Ubanmu ta kuma yi nasara, domin sun dogara gare shi.

Babi na 13.

A shekara ta goma sha takwas ta Sarki Yerobowam, Abiya ya zama sarkin Yahuda. Ya yi mulki shekara uku a Urushalima; mahaifiyarsa kuwa ita ce Mikaya 'yar Uriyel na Gibeya. Abiya da Yerobowam kuma suka shiga yaƙi. Abiya ya shiga fagen yaƙi da sojoji dubu ɗari huɗu zaɓaɓɓu, jarumai masu ƙarfi a yaƙi; Yerobowam kuwa ya ja dāgā gāba da shi da zaɓaɓɓu dubu ɗari takwas, jarumai masu ƙarfi.

Abiya ya tsaya a kan Dutsen Zemarayim da yake a ƙasar tuddan Ifraimu, ya ce, “Ku saurare ni, Yerobowam da dukan Isra'ila! Ashe, ba ku sani ba cewa Ubanmu, Allah na Isra'ila, ya ba Dawuda da 'ya'yansa gadon sarautar Isra'ila har abada, ta wurin alkawarin gishiri? ^a Amma Yerobowam ɗan Nebat—bawan Sulemanu ɗan Dawuda—ya tashi ya yi wa maigidansa tawaye. Mutane banzã suka taru kewaye da shi, suka tayar wa Rehobowam ɗan Sulemanu, wanda yake matashi ne kuma mai saurin tsoro, har ya kāsa tsayayya da su.

Yanzu kuna tsammani za ku iya tsayayya da Mulkin Ubanmu wanda yake a hannun 'ya'yan Dawuda, domin ku taro ne mai yawa tare da 'yan maraƙin zinariya da Yerobowam ya ƙera su su zama allolinku. Ashe, ba ku kori firistocin Ubanmu ba, 'ya'yan Haruna da Lawiyawa, kuka naɗa wa kanku firistoci kamar sauran al'ummai? Duk wanda ya zo da ƙaramin bijimi da raguna bakwai zai iya zama firist na abubuwan da ba alloli ba ne.

Amma Ubanmu, namu ne, ba mu kuwa yashe shi ba. Firistocin da suke masa hidima 'ya'yan Haruna ne, Lawiyawa kuma suna kan aikinsu. Kowace safiya da yamma suna ƙona wa Ubanmu hadayun ƙonawa da turaren ƙamshi; suna shirya jerin burodi a kan tebur na zinariya zalla, suna kuma kula da alkukin fitila na zinariya, wanda ake kunnawa kowace yamma. Muna kiyaye umarnin Ubanmu, amma ku kun yashe shi. Ku duba, Ubanmu yana tare da mu a gabanmu, firistocinsa kuma suna da ƙahoni don su busa ƙarar yaƙi gāba da ku. Ya ku Isra'ilawa, kada ku yaƙi Ubanmu, Allah na kakanninku, gama ba za ku yi nasara ba.”

Yerobowam ya riga ya aika da 'yan kwanto su kewaye, su zo daga bayansu; sojojinsa suna fuskantar Yahuda, 'yan kwanton kuwa suna a bayansu. Da mutanen Yahuda suka juya, sai suka ga yaƙi yana fuskantarsu a gaba da baya, suka yi kuka ga Ubanmu; firistoci kuwa suka busa ƙahoni. Mutanen Yahuda suka ɗaga muryar yaƙi, kuma yayinda suke ihu, sai Ubanmu ya bugi Yerobowam da dukan Isra'ila a gaban Abiya da Yahuda. Mutanen Isra'ila suka gudu a gaban Yahuda, Ubanmu kuwa ya bashe su a hannun Yahuda. Abiya da sojojinsa suka buge su bugu mai tsanani; mutane zaɓaɓɓu dubu ɗari biyar na Isra'ila suka mutu. Saboda haka a wannan lokaci aka ƙasƙantar da Isra'ila, Yahuda kuwa suka yi nasara domin sun dogara ga Ubanmu, Allah na kakanninsu. Abiya ya bi Yerobowam, ya ƙwace masa birane—Betel da ƙauyukanta, Yeshana da ƙauyukanta, da Ifron da ƙauyukanta.

Yerobowam bai ƙara samun ƙarfinsa ba a lokacin da Abiya yake da rai, Ubanmu kuwa ya buge shi har ya mutu. Amma Abiya ya ƙara ƙarfi. Ya auri mata goma sha huɗu, ya kuma haifi 'ya'ya maza ashirin da biyu da 'ya'ya mata goma sha shida. Sauran ayyukan Abiya, da halayensa da maganganunsa, a rubuce suke a cikin sharhin annabi Iddo.