2 ዜና መዋዕል 12

12 ¹የሮብዓም መንግሥት ተደላድሎ በጠነከረ ጊዜ፣ እርሱና ከእርሱ ጋር እስራኤል ሁሉ የአባታችንን ሕግ ተዉ። ²ለአባታችን ታማኝ ባለመሆናቸው፣ በሮብዓም በአምስተኛው ዓመት የግብፅ ንጉሥ ሺሻቅ ኢየሩሳሌምን አጠቃ። ³ከ1,200 ሠረገሎች፣ ከ60,000 ፈረሰኞችና ከግብፅ ከመጡ ቍጥር ከሌላቸው ሰዎች ጋር መጣ፤ እነርሱም ሊቢያውያን፣ ሱካውያንና ኢትዮጵያውያን ነበሩ። ⁴የይሁዳን የተመሸጉ ከተሞች ያዘ፤ እስከ ኢየሩሳሌምም ድረስ መጣ።

⁵ነቢዩ ሸማያ ከሺሻቅ የተነሣ በኢየሩሳሌም ወደ ተሰበሰቡት ወደ ሮብዓምና ወደ ይሁዳ አለቆች መጥቶ፣ “አባታችን እንዲህ ይላል፤ ተዋችሁኝ፤ ስለዚህ እኔም ለሺሻቅ እጅ እተዋችኋለሁ።” አለ።

⁶በዚያን ጊዜ የእስራኤል አለቆችና ንጉሡ ራሳቸውን አዋርደው፣ “አባታችን ጻድቅ ነው።” አሉ።

⁷አባታችን ራሳቸውን እንዳዋረዱ ባየ ጊዜ፣ የአባታችን ቃል ወደ ሸማያ መጥቶ እንዲህ አለ፤ “ራሳቸውን አዋርደዋል፤ አላጠፋቸውም፤ ነገር ግን ጥቂት መዳንን እሰጣቸዋለሁ፤ ቍጣዬም በሺሻቅ እጅ በኢየሩሳሌም ላይ አይፈስስም። ⁸ነገር ግን አገልግሎቴንና የምድር መንግሥታትን አገልግሎት እንዲያውቁ፣ የሺሻቅ አገልጋዮች ይሆናሉ።”

⁹የግብፅ ንጉሥ ሺሻቅ ኢየሩሳሌምን አጥቅቶ ሁሉን ነገር ወሰደ፤ የአባታችንን ቤት ገንዘብና የንጉሡን ቤተ መንግሥት ሀብት፣ ሰሎሞን የሠራቸውንም የወርቅ ጋሻዎች ጭምር ወሰደ። ¹⁰ሮብዓምም በእነዚያ ፋንታ የናስ ጋሻዎች ሠራ፤ የንጉሡን ቤት መግቢያ ለሚጠብቁ የዘቦች አለቆችም አደራ ሰጣቸው። ¹¹ንጉሡ ወደ አባታችን ቤት በገባ ቍጥር ዘቦቹ ጋሻዎቹን ይሸከሙ ነበር፤ ከዚያም ወደ ዘቦች ክፍል ይመልሷቸው ነበር። ¹²ሮብዓም ራሱን ባዋረደ ጊዜ፣ የአባታችን ቍጣ ከእርሱ ተመለሰ፤ ፈጽሞም አላጠፋውም፤ በይሁዳም መልካም ነገር ነበረ።

¹³ንጉሡ ሮብዓም በኢየሩሳሌም እየጠነከረ ነገሠ፤ በነገሠ ጊዜ ዕድሜው አርባ አንድ ዓመት ነበር፤ አባታችን ስሙን በዚያ ያኖር ዘንድ ከእስራኤል ነገዶች ሁሉ በመረጣት በኢየሩሳሌም ከተማ ዐሥራ ሰባት ዓመት ነገሠ። እናቱም ናዕማ የተባለች አሞናዊት ነበረች። ¹⁴እርሱም አባታችንን ለመፈለግ ልቡን ስላላዘጋጀ፣ ክፉ ነገር አደረገ።

¹⁵የሮብዓም ሥራ ከመጀመሪያው እስከ መጨረሻው፣ የትውልድ ሐረግን በሚዘረዝሩት በነቢዩ ሸማያና በባለ ራእዩ በአዶ ታሪክ ውስጥ ተጽፎ ይገኛል። ሮብዓምና ኢዮርብዓም ዘወትር ይዋጉ ነበር። ¹⁶ሮብዓምም ከአባቶቹ ጋር አረፈ፤ በዳዊትም ከተማ ተቀበረ፤ ልጁ አብያም በእርሱ ፋንታ ነገሠ።