2 ዜና መዋዕል 11

11 ¹ሮብዓም ወደ ኢየሩሳሌም መጥቶ፣ ከእስራኤል ጋራ ተዋግቶ መንግሥቱን ለሮብዓም ለመመለስ የተመረጡ መቶ ሰማንያ ሺህ ተዋጊዎችን ከይሁዳና ከብንያም ቤት ሰበሰበ። ²ነገር ግን የአባታችን ቃል ወደ አባታችን ሰው ወደ ሳሚያስ እንዲህ ሲል መጣ፤

³“የይሁዳ ንጉሥ ለሰሎሞን ልጅ ለሮብዓም፣ በይሁዳና በብንያም ላሉ እስራኤላውያን ሁሉ እንዲህ በላቸው፤ ⁴አባታችን እንዲህ ይላል፤ ወደ ወንድሞቻችሁ አትውጡ፤ አትዋጉአቸውም። እያንዳንዳችሁ ወደየቤታችሁ ተመለሱ፤ ይህ ነገር ከእኔ ዘንድ ሆኗልና።” ስለዚህ የአባታችንን ቃል ታዘው ኢዮርብዓምን ለመውጋት ከመውጣት ተመለሱ።

ሮብዓም ይሁዳን አጸና

⁵ሮብዓም በኢየሩሳሌም ኖረ፤ በይሁዳም ለመከላከያ የሚሆኑ ከተሞችን ሠራ። ⁶ቤተ ልሔምን፣ ዔጣምን፣ ቴቁሔን፣ ⁷ቤትሱርን፣ ሶኮን፣ ዓዶላምን፣ ⁸ጌትን፣ ማሬሳን፣ ዚፍን፣ ⁹አዶራይምን፣ ለኪሶን፣ አዜቃን፣ ¹⁰ሦራን፣ ኤሎንንና ኬብሮንን ሠራ፤ እነዚህም በይሁዳና በብንያም የነበሩ የተመሸጉ ከተሞች ናቸው። ¹¹ምሽጎቹንም አጸና፤ በውስጣቸውም አዛዦችን፣ የምግብ፣ የዘይትና የወይን ጠጅ ክምችትን አኖረ። ¹²በየከተማውም ጋሻዎችንና ጦሮችን አኖረ፤ እጅግም አበረታቸው። ስለዚህ ይሁዳና ብንያም የእርሱ ሆነው ቀሩ።

¹³በእስራኤል ሁሉ የነበሩ ካህናትና ሌዋውያን ከየአውራጃቸው ወደ እርሱ መጡ፤ ¹⁴ኢዮርብዓምና ልጆቹ የአባታችን ካህናት ሆነው ከማገልገል ስላገዱአቸው፣ ሌዋውያኑ መስኮቻቸውንና ንብረታቸውን ትተው ወደ ይሁዳና ወደ ኢየሩሳሌም ሄዱ። ¹⁵ለኰረብታ መስገጃዎች፣ ለፍየል ጣዖታትና ለሠራቸው የጥጃ ጣዖታት የራሱን ካህናት ሾመ። ¹⁶ከእስራኤል ነገዶች ሁሉ፣ የእስራኤልን አምላክ አባታችንን ለመፈለግ ልባቸውን ያደረጉ ሰዎች፣ ለአባቶቻቸው አምላክ ለአባታችን መሥዋዕት ለማቅረብ ሌዋውያኑን ተከትለው ወደ ኢየሩሳሌም መጡ። ¹⁷የይሁዳንም መንግሥት አጸኑ፤ ሦስት ዓመትም የሰሎሞንን ልጅ ሮብዓምን ደገፉ፤ ሦስት ዓመት በዳዊትና በሰሎሞን መንገድ ተመላልሰዋልና።

የሮብዓም ቤተ ሰብ

¹⁸ሮብዓምም ማህላትን አገባ፤ እርሷም የዳዊት ልጅ የኢያሪሞትና የእሴይ ልጅ የኤልያብ ልጅ የአቢካይል ልጅ ነበረች። ¹⁹እርሷም ኢዩሻን፣ ሸማርያንና ዛሃምን ወለደችለት። ²⁰ከእርሷ በኋላ የአቤሴሎምን ልጅ መዓካን አገባ፤ እርሷም አብያን፣ አታይን፣ ዚዛንና ሰሎሚትን ወለደችለት። ²¹ሮብዓም ዐሥራ ስምንት ሚስቶችና ስድሳ ቁባቶች ነበሩት፤ ሃያ ስምንት ወንዶች ልጆችና ስድሳ ሴቶች ልጆችም ወለደ፤ ነገር ግን የአቤሴሎምን ልጅ መዓካን ከሌሎች ሚስቶቹና ቁባቶቹ ሁሉ አብልጦ ይወድ ነበር። ²²ሮብዓምም ሊያነግሠው አስቦ የመዓካን ልጅ አብያን በወንድሞቹ መካከል ዋና መሪ አደረገው። ²³በጥበብም ሠራ፤ ከልጆቹም አንዳንዶቹን በይሁዳና በብንያም አውራጃዎች ሁሉ፣ በየተመሸገው ከተማ በተናቸው፤ ብዙ ቀለብም ሰጣቸው፤ ብዙ ሚስቶችንም ፈለገላቸው።