2ይ ዜና 11 FHB Father's Heart Bible™

11 ¹ሮብዓም ናብ ኢየሩሳሌም መፀ፤ ምስ እስራኤል ተዋጊኡ ነታ መንግስቲ ናብ ሮብዓም ክመልሳ፥ ካብ ቤት ይሁዳን ብንያምን ሚእትን ሰማንያን ሽሕ ሕሩያት ተዋጋእቲ ኣከበ። ²ግና ናብቲ ናይ ኣቦና ሰብ ዝኾነ ሳማያ ከምዙይ ዝብል ቃል ኣቦና መፀ፦

³“ንሮብዓም ወዲ ሰሎሞን ንጉስ ይሁዳን ነቶም ኣብ ይሁዳን ብንያምን ዘለዉ ኵሎም እስራኤልን ከምዙይ በሎም፦ ⁴ኣቦና ከምዙይ ይብል፦ ኣይትደይቡ፤ ንኣሕዋትኩምውን ኣይትዋግኡ። ነፍሲ ወከፍኩም ናብ ቤቱ ይመለስ፤ እዙይ ካባይ ኮይኑ እዩሞ።” ንሳቶም ድማ ቃላት ኣቦና ሰሚዖም፥ ካብ ናብ ኢዮርብዓም ምኻድ ተመለሱ።

ሮብዓም ንይሁዳ ኣፅንዐ

⁵ሮብዓም ኣብ ኢየሩሳሌም ተቐመጠ፤ ኣብ ይሁዳ ድማ ንምክልኻል ዝኾና ከተማታት ሰርሐ። ⁶ንቤተ ልሔም፥ ንዔጣም፥ ንቴቁሔ ሰርሐ፥ ⁷ንቤትፁርን ሶኮትን ዓዱላምን፥ ⁸ንጌትን ማሪሳን ዚፍን፥ ⁹ንኣዶራይምን ለኪሶን ዓዜቃን፥ ¹⁰ንፆርዓን ኤሎንን ኬብሮንን፥ እዘን ኣብ ይሁዳን ብንያምን ዘለዋ ዝተዓረዳ ከተማታት ሰርሐ። ¹¹ነተን ዕርድታት ኣፅንዐ፤ ኣሕሉቕ ድማ ኣብተን ኣንበረ፤ ምስኡ ኸዓ ዕቋር ምግብን ዘይትን ወይንን ኣንበረ። ¹²ኣብ ነፍሲ ወከፍ ከተማ ዋልታን ኲናትን ኣንበረ፤ የመና ኸዓ ኣፅንዐ። ይሁዳን ብንያምን ድማ ናቱ ኾይኖም ተረፉ።

¹³እቶም ኣብ ኵሉ እስራኤል ዝነበሩ ካህናትን ሌዋውያንን ከዓ ካብ ኵሉ ግዝኣቶም ናብኡ መፁ፥ ¹⁴እቶም ሌዋውያን፥ ኢዮርብዓምን ደቁን ካህናት ኣቦና ኾይኖም ከየገልግሉ ስለ ዝኸልከሉዎም፥ መዋፈሪኦምን ርስቶምን ሓዲጎም ናብ ይሁዳን ኢየሩሳሌምን ከዱ። ¹⁵ንሱ ድማ ነቶም ዀረብታታትን፥ ነቶም ኣጣልን ነቶም ዝሰርሖም ምራኽ ጣዖታት፥ ባዕሉ ካህናት ሸመ። ¹⁶ካብ ኵሎም ነገዳት እስራኤል ድማ፥ እቶም ንኣቦና፥ ኣምላኽ እስራኤል፥ ክደልይዎ ልቦም ዘቕንዑ፥ ንኣቦና፥ ኣምላኽ ኣቦታቶም፥ ክስውኡ ንሌዋውያን ስዒቦም ናብ ኢየሩሳሌም መፁ። ¹⁷ንመንግስቲ ይሁዳ ኣፅንዑ፤ ንሮብዓም ወዲ ሰሎሞን ድማ ንሰለስተ ዓመት ደገፉ፤ ብመንገዲ ዳዊትን ሰሎሞንን ንሰለስተ ዓመት ተመላለሱ እዮም።

ቤተ ሰብ ሮብዓም

¹⁸ሮብዓም ድማ ንማሓላት፥ ጓል የሪሞት ወዲ ዳዊትን ጓል ዓቢካኢል ጓል ኤልያብ ወዲ እሴይን፥ ኣእተዋ። ¹⁹ንሳ ኸዓ፥ የዑስን ሸማርያን ዛሃምን ዝበሃሉ ኣወዳት ወለደትሉ። ²⁰ድሕሪኣ ድማ ንማዓካ ጓል ኣቤሴሎም ኣእተዋ፤ ንሳ ኸዓ ንኣብያን ዓታይን ዚዛን ሸሎሚትን ወለደትሉ። ²¹ሮብዓም ድማ ዓሰርተ ሸሞንተ ኣንስትን ስሳ ኣንስቲ ወሰንን ዕስራን ሸሞንተን ኣወዳትን ስሳ ኣዋልድን ነበርዎ እሞ፥ ንማዓካ ጓል ኣቤሴሎም ካብ ኵለን ኣንስቱን ኣንስቲ ወሰኑን ኣብሊፁ ኣፍቀራ። ²²ሮብዓም ድማ ነቲ ወዲ ማዓካ ዝኾነ ኣብያ ከንግሶ ስለ ዝሓሰበ፥ ኣብ መንጎ ኣሕዋቱ ሓለቓ ገበሮ። ²³ብጥበብ ድማ ገበረ፤ ካብ ደቁ ኣብ ኵሉ ክፍላተ ሃገር ይሁዳን ብንያምን፥ ኣብ ነፍሲ ወከፍ ዝተዓረደት ከተማ፥ በተኖም፤ ብዙሕ ስንቂ ድማ ሃቦም፤ ብዙሓት ኣንስቲ ኸዓ ደለየሎም።