ሺሻቅ ንኢየሩሳሌም ወረራ

ሮብዓም ምስ ፀንዐ፥ ሕጊ ኣቦና ሓደገ፤ ሺሻቅ ንጉስ ግብፂ ኸዓ ንመዛግብቲ ቤተ መቕደስ ገፈፎ። ‘ንስኻትኩም ሓዲግኩምኒ ኢኹም እሞ፥ ኣነውን ሓዲገኩም ኣለኹ’ ተባሂሉ ኣግሂዱ ምስ ተነግሮ፥ እቲ ንጉስን ሹመኛታቱን ርእሶም ኣትሓቱ — እቲ መዓት ድማ ተነከየ እምበር፥ ኣይተሰረዘን። ዋልታታት ወርቂ ኸዓ ብዋልታታት ነሃስ ተተክአ።

ምዕራፍ 12።

መንግስቲ ሮብዓም ፅንዕትን ብርትዕትን ምስ ኮነት፥ ንሱን ምስኡ ዝነበሩ ኵሎም እስራኤልን ሕጊ ኣቦና ሓደጉ። ኣብ መበል ሓሙሽተ ዓመት ንጉስ ሮብዓም፥ ንኣቦና ስለ ዝበደሉ፥ ሺሻቅ ንጉስ ግብፂ ንኢየሩሳሌም ወረራ። ሽሕን ክልተ ሚእትን ሰረገላታትን ስሳ ሽሕ ፈረሰኛታትን ሒዙ፥ ምስቶም ካብ ግብፂ ዝሰዓብዎ ቍፅሪ ዘይብሎም ሰራዊት፥ ሊብያውያንን ሱካውያንን ኵሳውያንን ሒዙ መፀ። ነተን ዝተዓረዳ ከተማታት ይሁዳ ሓዘን፤ ክሳዕ ኢየሩሳሌም እውን መፀ።

ሳማያ ነቢይ ድማ ናብ ሮብዓምን ናብቶም ብምኽንያት ሺሻቅ ኣብ ኢየሩሳሌም ዝተኣከቡ መራሕቲ ይሁዳን መፀ እሞ፥ “ኣቦና ከምዙይ ይብል ኣሎ፦ ንስኻትኩም ንኣይ ሓዲግኩም ኢኹም እሞ፥ ኣነ ኸዓ ኣብ ኢድ ሺሻቅ ሓዲገኩም ኣለኹ” በሎም።

ሽዑ መራሕቲ እስራኤልን እቲ ንጉስን ርእሶም ኣትሓቱ እሞ፥ “ኣቦና ፃድቕ እዩ” በሉ።

ኣቦና ርእሶም ከም ዘትሓቱ ምስ ረአየ ድማ፥ ቃል ኣቦና ናብ ሳማያ ኸምዙይ ኢሉ መፀ፦ “ርእሶም ኣትሒቶም እዮም እሞ፥ ኣየጥፍኦምን እየ፤ ቁሩብ ምድሓን ደኣ እህቦም እምበር። ቍጥዓይ ድማ ብኢድ ሺሻቅ ኣብ ልዕሊ ኢየሩሳሌም ኣይፈስስን እዩ። ግና ኣገልግሎተይን ኣገልግሎት መንግስታት ምድርን ምእንቲ ኽፈልጡ፥ ባራዩ ሺሻቅ ክኾኑ እዮም።”

ሺሻቅ ንጉስ ግብፂ ንኢየሩሳሌም ወረራ እሞ፥ ኵሉ ወሰደ፤ መዛግብቲ ቤት ኣቦናን መዛግብቲ ቤተ መንግስትን ወሰደ፤ ነቲ ሰሎሞን ዝሰርሖ ዋልታ ወርቂ እውን ወሰዶ። ሮብዓም ድማ ኣብ ክንዳኦም ዋልታታት ነሃስ ገበረ፤ ነቶም ኣብ ኣፍ ደገ ቤት ንጉስ ዝሕልዉ ኣሕሉቕ ዘብዐኛታት ኣማሕለፎም። እቲ ንጉስ ናብ ቤት ኣቦና ኣብ ዝኣትወሉ እዋን ኵሉ፥ እቶም ሓለውቲ ነቲ ዋልታ ይስከምዎ ነበሩ፤ ብድሕሪኡ ድማ ናብ ቤት ዘብዐኛታት ይመልስዎ ነበሩ። ሮብዓም ርእሱ ምስ ኣትሓተ፥ ቍጥዓ ኣቦና ካብኡ ተመለሰ፤ ፈፂሙ ኣየጥፍኦን እውን። ኣብ ይሁዳ ኸዓ ፅቡቕ ነገር ተረኽበ።

ንጉስ ሮብዓም ኣብ ኢየሩሳሌም ልቡ ኣፅኒዑ ነገሰ፤ ወዲ ኣርብዓን ሓደን ዓመት እንተሎ ድማ ነገሰ፤ ኣብታ ኣቦና ስሙ ኣብኣ ኽፅዋዕ ኢሉ ኻብ ኵለን ነገድ እስራኤል ዝሓረያ ከተማ፥ ኣብ ኢየሩሳሌም ዓሰርተ ሸውዓተ ዓመት ነገሰ። እኖኡ ድማ ናዓማ እትብሃል በዓልቲ ኣሞን ነበረት። ልቡ ንኣቦና ንምድላይ ስለ ዘየቕንዐ ድማ፥ ክፉእ ገበረ።

ናይ ሮብዓም ታሪኽ፥ ካብ መጀመርታ ኽሳዕ መወዳእታ፥ ኣብቲ ናይ ነቢዩ ሳማያን ናይ ራእይ ነጋሪ ዒዶን ዝኾነ መፅሓፍ ዛንታ፥ ምስ ትውልድታት ዝተፅሓፈ፥ ኣይኮነን ዲዩ? ኣብ መንጎ ሮብዓምን ኢዮርብዓምን ከዓ ኵልሻዕ ውግእ ነበረ። ሮብዓም ምስ ኣቦታቱ ደቀሰ፤ ኣብ ከተማ ዳዊት እውን ተቐበረ፤ ክንድኡ ኸዓ ወዱ ኣብያ ነገሰ።