Shishakei Jerusalem Khulimbo Wapyoda
Rehoboam hau kijinei, haoei seneibü Bou ngühkhüm inletkei, hoba Ijepbü Choba Shishakei chem thanshang shuong lekei. Kanei ngo inletkei, khoei ngei kan inletda dogo chongchingko lenbei, kheijinei Choba hoba haoeibü leiyeibü shuongei jihaphaia yeikei — hoba haoen la shisho khümenbü kukei, maangpon amautilabü aying. Hon shieikoe lato chinam shieikoe kümetkei.
12 1Rehoboam sangle püetan hoba hau kijinei, haoei seneibü Bou ngühkhüm inletkei, hoba Israelbü pendou hao yoa inletkei. 2Rehoboam Choba po ngaoboubüa, aishanga haoenei seneibü Bou khulimbo shabü shonkei, Ijepbü Choba Shishakei Jerusalem shila longkei. 3Haoei kailong 1,200, koli sepai 60,000, hoba wela athükbü sepai tan—Libiabü, Sukkotbü hoba Kushbü—yoa Ijep ka loukei. 4Haoei Jihudaeibü laang baei kailepbü sangnyu shuong lekei, hoba Jerusalem sühko loukei.
5Thuseibou Shemaiaei, Shishak shanga Jerusalema kamshaibü Rehoboam hoba Jihudabü leiyeibü shuong jungto louan laukei, “Seneibü Bouei hai lauda, Kanei ngo inletkei, khoei ngei kan Shishak ik to inletda.”
6Kheijinei Israelbü leiyeibü shuong hoba Choba himshuong jihaphaia yeikei, hoba laukei, “Seneibü Bou saopobü ki.”
7Seneibü Bouei haoen jihaphaia yeikei dogo hapjinei, seneibü Bou ngüh Shemaia jungto louan laukei, “Haoen jihaphaia yeikei; ngei haoen amautilabü, lausikei ngei haoen la shisho khümenbü kulabü, hoba ngeibü khauang Shishak danko Jerusalem thüka alotilabü. 8Lausikei ngeibü khangenbü hoba kaodakbü sangle shuongeibü khangenbü ngela shanga, haoen Shishak khangenbü shuong kilabü.”
9Ijepbü Choba Shishakei Jerusalem khulimbo wapyokei, hoba seneibü Bou chem kabü nyaksinam, Choba chem kabü nyaksinam, hoba Solomonei kümbü hone aih pendou, khei müt pendou lekei. 10Rehoboamei khübü jeila chinamei aih kümbei, hoba Choba chem koukhün lombü shuong thüka leiyeibü shuong ik to kukei. 11Ladang ong Choba seneibü Bou chem to haukei, lombü shuongei aih kho jungkei, hoba lombü popchem to lemshanga phokei. 12Rehoboam jihaphaia yeijinei, seneibü Bou khauang hao ka sepeian satkei, hoba hao lemailela amautitei; hoba Jihudaa kei maibü peisilei joukei.
13Choba Rehoboamei Jerusalema himshuong thungetan songdakkei; songdakla khangbü chaloua hao po saoto che kikei, hoba haoei, seneibü Bouei haoeibü nyen khünei phola shanga Israel phang pendou ka pienbü sang Jerusalema, po anthüknyet songdakkei, hoba haonyu Ammonbü sao Naama nyenbü kikei. 14Haoei ai amai kho kümbei, aishanga haoei seneibü Bou lamla jembü maangpon alamleantei.
15Rehoboameibü kümsilei shuong, shaangbü ka joubü sühko, thuseibou Shemaia hoba hapbou Iddoeibü thensilen webü lüngbüdoa doan ki. Hoba Rehoboam si Jeroboam kanglanga athakko wapyo kikei. 16Rehoboam haoeibü pisibousi shuong yoa yepbei, hoba Dawid sangnyua khünkei, hoba hao jeiko hao shou Abijaei songdakkei.
