Abijaei Choba Setshang Setkei
Abijaei pholi anglek baei haoeibü ngüh loan laukei: Jihuda to tat sühko Aron ungshedbou shuong, chalou lembü shuong hoba hon lanbü ki, lausikei Israel to masu hoba luluei pienbü ungshedbou ki. Süng khaang jetei wapyobüei kailepjinei, Jihudaei seneibü Bou to ngekkei hoba thükkei, aishanga haoenei hao to loan kikei.
13 1Jeroboam Choba po anthükset boubüa Abija Jihuda thüka Choba kikei. 2Haoei Jerusalema po sem songdakkei; hao nyu kho Gibea kabü Urieleibü nouyangnyu, nyen Mikaia kikei. Hobaje Abija si Jeroboam kanglanga wapyo kikei. 3Abijaei wapyoa hau kibü pienbü lakjaibü müt 400,000 yoa lason to loukei; lausikei Jeroboamei pienbü hau kibü lakjaibü müt 800,000 yoa hao khulimbo lin küman kikei.
4Hobaje Abijaei Efraim shongh kaodaka kibü Zemaraim shongh thüka loan laukei, “Jeroboam hoba Israelbü pendou, kü to ditashi! 5Seneibü Bou Israelbü Mühghaüei Dawid hoba hao shousi shuong to Israel Choba setshang jem theyolanyobü danei ponpen shanga kukei, kho kanei ange lo? a a v5 Jem theyolanyobü kho tükdebü hoba ponpen kibü ngühthang che kikei; jemei shauayung tesatkei hoba ponpen, athüken akibü theyolanyobü medei la yeikei. 6Lausikei Dawid shou Solomoneibü khangenbou che Nebateibü shou Jeroboamei loenan hao bunyu khulimbo meimeikei. 7Jim akibü mütshuong hao junga yoshaikei, hoba Solomon shou Rehoboam khulimbo meimeikei; Rehoboam younak hoba hat kibü kiteikei, khoei haoen to teshela athükkei.
8Tou kanei Dawid shousi shuong ika kibü seneibü Bou Sangle to teshela thükda dogo telau; aishanga kan mütshang yaangbü ki, hoba Jeroboamei kaneibü mühghaü shanga kümbü hon masu shoushou kan yoa ki. 9Kanei seneibü Bou ungshedbou shuong, Aron shousi shuong hoba Levibü apbü, hoba lubü phangshuong tegü kaneibü jembü shanga ungshedbou kümbü aying lo? Aoyouei masu shoushou che hoba sanlon paang pemnyet yoan loulaje, hao mühghaü akibü shuong shanga ungshedbou la yeila thükda.
10Lausikei seneibü Bou kho seneibü ki, hoba künei hao ainletei. Hao khangenbü ungshedbou shuong kho Aron shousi shuong ki, hoba Levibü haoeneibü kümsileia ki. 11Ngeyang weko hoba chasem weko haoenei seneibü Bou shanga juokbü lembü hoba ponlem hibü teibü juokda; hoba hon lanbü khümsok thüka wentek lin lin phoda, hoba hon lanbü wanthung denshang kho chasem weko wan sapan jiktian phoda. Künei seneibü Bou jungeibü jungeida, lausikei kanei hao inletkei. 12Chühashi, seneibü Bou kho sen yoa ki, hoba hao sen leiyeibou ki, hoba hao ungshedbou shuong yoa kan khulimbo la paila teklaang ki. O Israel shousi shuong, kaneibü pisibousi Mühghaü seneibü Bou khulimbo awapyojan, aishanga kanei thük ahaplabü.”
13Lausikei Jeroboamei haoen phai aenei louan wapyola shanga kaijembo la thobü mütshuong hautikei; hao lakjaibü tan Jihuda thedanga lokei, hoba la thobü shuong Jihuda phainei kikei. 14Hobaje Jihuda sepeian chühkei, hoba lason haoen thedanga hoba phainei ham kibü hapbei, hoba haoenei seneibü Bou to ngekkei; hoba ungshedbou shuongei teklaang metkei. 15Hobaje Jihudabü mütshuongei uihinkei, hoba haoen uihinjinei, seneibü Bouei Abija hoba Jihuda thedanga Jeroboam hoba Israelbü pendou to athük haikukei. 16Israel shousi shuong Jihuda thedang ka linkei, hoba seneibü Bouei haoen Jihuda ika khümbo kukei. 17Abija hoba hao lakjaibü tan haoen to juong haitikei; Israelbü pienbü müt 500,000 haian tuongkei. 18Kheijinei kho chaloua Israelbü thükkei, hoba Jihudabüei thük hapbei, aishanga haoenei seneibü Bou, haoeneibü pisibou Mühghaü thüka maian kikei. 19Hobaje Abijaei Jeroboam phaito shijung hauan, hao ka sangnyu shuong lekei—Bethel hoba khübü sang yoan, Jeshana hoba khübü sang yoan, Efron hoba khübü sang yoan.
20Abija salang sünga Jeroboameibü hau touje akitei, hoba seneibü Bouei hao to ngümbei, hoba hao haikei. 21Lausikei Abija hau kiko yeikei, hoba haoei yak anthüklei ngakei, hoba hao la bousu shou saoto nyi hoba yaksa shou anthüklak bukkukei. 22Tou Abijaeibü joubü kümsilei, haoeibü lamnyu hoba ngüh shuong, kho thuseibou Iddoeibü lea doan kia.
