2 Maũndũ ma Matukũ ma Tene 13 FHB Father's Heart Bible™

13 ¹Mwakainĩ wa ikũmi na ĩnana wa wathani wa Mũthamaki Jeroboamu, Abija agĩtuĩka mũthamaki wa Juda. ²Aathamakire mĩaka ĩtatũ kũu Jerusalemu; nyina eetagwo Mikaia, mwarĩ wa Urieli wa Gibea. Nao Abija na Jeroboamu magĩthiĩ mbaarainĩ. ³Nake Abija agĩthiĩ mbaara arĩ na mbũtũ ya ita ya njamba 400,000 iria ciaathuurĩtwo, cia hinya mbaarainĩ; nake Jeroboamu akĩĩhaarĩria amũũkĩrĩre arĩ na njamba 800,000 iria ciaathuurĩtwo, cia hinya.

⁴Nake Abija akĩrũgama kĩrĩmainĩ gĩa Zemaraimu kũu bũrũri wa irĩma wa Efiraimu, akiuga atĩrĩ, “Ta thikĩrĩriai, wee Jeroboamu na inyuĩ Isiraeli oothe! ⁵Kaĩ mũtooĩ atĩ Ithe witũ, o we Ngai wa Isiraeli, nĩaaheire Daudi na aariũ ake gĩtĩ kĩa ũthamaki wa Isiraeli nginya tene, na ũndũ wa kĩrĩĩkanĩro kĩa cumbĩ? ^a a v5 Kĩrĩĩkanĩro kĩa cumbĩ kĩarĩ kĩrĩĩkanĩro gĩa kũrũma na gĩtegũthira; cumbĩ nĩwaigaga irio itegũthũkĩra na warĩ rũũhia rwa kĩĩranĩro gĩa gũtũũra, gĩtangĩũnĩka. ⁶No Jeroboamu mũrũ wa Nebati, ũrĩa warĩ ndungata ya Solomoni mũrũ wa Daudi, agĩũkĩra akĩremera mwathi wake. ⁷Nao andũ a tũhũ makĩũngana harĩ we, magĩĩũkĩrĩra Rehoboamu mũrũ wa Solomoni, ũrĩa warĩ mwĩĩthĩ na mwoyo, ũtaangĩahotire kũrũgamana nao.

⁸Na rĩu nĩmwĩciiragia atĩ no mũhote kũregana na ũthamaki wa Ithe witũ ũrĩa ũrĩ mookoinĩ ma aariũ a Daudi, tondũ mũrĩ kĩrĩndĩ kĩnene na mũrĩ na njaũ cia thahabu iria Jeroboamu aathondekire ituĩke ngai cianyu. ⁹Kaĩ mũtaaingatire athĩnjĩri a Ithe witũ, nĩo aariũ a Aaroni na Alawii, na mũgĩĩthondekera athĩnjĩri anyu ene o ta ndũũrĩrĩ icio ingĩ? Mũndũ o wothe ũrĩa ũũkaga na gategwa na ndũrũme mũgwanja no atuĩke mũthĩnjĩri wa indo iria itarĩ ngai.

¹⁰No ithuĩ-rĩ, Ithe witũ nĩ witũ, na tũtimũtiganĩirie. Nao athĩnjĩri arĩa mamũtungataga nĩ aariũ a Aaroni, nao Alawii marĩ wĩrainĩ wao. ¹¹O rũũciinĩ na hwaĩinĩ macinagĩra Ithe witũ magongona ma njino na ũbaani mũnungi wega; nao maigaga mĩhari ya mĩgate methainĩ ya thahabu theru na makamenyerera mũtĩ wa matawa wa thahabu, ũrĩa wakanagio o hwaĩinĩ. Ithuĩ-rĩ, nĩtũmenyagĩrĩra maũndũ ma Ithe witũ, no inyuĩ nĩmũmũtiganĩirie. ¹²Atĩrĩrĩ, Ithe witũ arĩ hamwe na ithuĩ arĩ mũtongoria witũ, nao athĩnjĩri ake marĩ na coro cia kũmũhuhĩra mbu. Inyuĩ andũ a Isiraeli, mũtikarũe na Ithe witũ, o we Ngai wa maithe manyu ma tene, nĩgũkorwo mũtikahootana.”

¹³Nake Jeroboamu nĩaatũmĩte andũ a kuohia magĩthiũrũrũka, nĩguo mokĩre na thuutha wao; nacio mbũtũ ciake ikĩangĩrĩra Juda, nao arĩa maaoheirie marĩ thuutha wao. ¹⁴Nao andũ a Juda makĩĩhũgũra, makĩona mbaara ĩmaangĩrĩire mbere na thuutha, magĩkaĩra Ithe witũ; nao athĩnjĩri makĩhuha coro. ¹⁵Nao andũ a Juda makĩanĩrĩra mbu ya mbaara, na rĩrĩa maanĩrĩire, Ithe witũ akĩhũũra Jeroboamu na andũ a Isiraeli oothe mbere ya Abija na Juda. ¹⁶Nao andũ a Isiraeli makĩũra mbere ya Juda, nake Ithe witũ akĩmaneana mookoinĩ ma Juda. ¹⁷Nake Abija na mbũtũ yake ya ita makĩmahũũra mũno; nao andũ a Isiraeli arĩa maathuurĩtwo 500,000 makĩgũa, magĩkua. ¹⁸Nĩ ũndũ ũcio andũ a Isiraeli makĩnyiihio hĩndĩ ĩyo, nao andũ a Juda makĩhootana tondũ nĩmehokete Ithe witũ, o we Ngai wa maithe mao ma tene. ¹⁹Nake Abija akĩingatithia Jeroboamu, akĩmũtunya matũũra manene—Betheli na tũtũũra twamo, na Jeshana na tũtũũra twamo, na Efironi na tũtũũra twamo.

²⁰Nake Jeroboamu ndaigana gũcookererwo nĩ hinya wake rĩngĩ matukũinĩ mothe ma muoyo wa Abija, nake Ithe witũ akĩmũgũtha, agĩkua. ²¹No Abija agĩthiĩ na mbere kũgĩa na hinya. Akĩhikia atumia ikũmi na aana, agĩciara aariũ mĩrongo ĩĩrĩ na eerĩ na airĩĩtu ikũmi na atandatũ. ²²Namo maũndũ marĩa mangĩ ma Abija, mĩthiĩre yake na ciugo ciake, nĩmandĩkĩtwo ibukuinĩ rĩa gũtaarĩria rĩa mũnabii Ido.