Abijah pora Singhason Loise

Abijah pora upotyoka paar te tar kotha chilai kene koi: Judah logot etiya bhi Aaron laga purohit khan, hodai din laga bolidan aru saki ase, kintu Israel logot goru-murti aru nijor bonai diya purohit khan ase. Age aru piche pora lukai kene hamla kora hoi, Judah amar Pitri ke chilai mate aru jiti jai, kilemane tarkhan Tai uporte bhorsa rakhise.

Adhyay 13.

Jeroboam Raja laga athharo saal te, Abijah tu Judah laga raja hoise. Tar pora Jerusalem te tin saal raj korise; tar laga ama Micaiah thakise, jun Gibeah laga Uriel laga chukri asile. Abijah aru Jeroboam majot te lorai hoise. Abijah pora lorai te basi luwa char lakh bahadur sipahi khan logote lorai shuru korise, jun khan lorai te takotiya asile; Jeroboam pora tar bipokkhe basi luwa, takotiya ath lakh sipahi khan ke khara korai dise.

Abijah pora Ephraim laga pahar desh te thaka Zemaraim Pahar te khara hoi kene koise, “Jeroboam aru sob Israel, moi laga kotha huni bi! Israel laga Isor, amar Pitri pora, David aru tar laga bacha khan ke Israel laga singhason tu nimok laga vachan pora hodai nimite dise, eitu tumikhan najane naki? ^a Kintu Nebat laga chokra Jeroboam—David laga chokra Solomon laga ekjon noukor—uthi kene tar laga malik bipokkhe bidroho korise. Kaam nathaka manuh khan tar logote joma hoi kene, Solomon laga chokra Rehoboam ke birodh korise, jun jawan aru mon komjur asile, aru tarkhan ke rukhabole napari asile.

Etiya David laga bacha khan laga hath te thaka amar Pitri laga rajyo ke tumikhan rukhabole pare koi kene bhabe, kilemane tumikhan dangor bhir ase aru Jeroboam pora tumikhan laga isor hobole bonai diya suna laga bachcha goru khan tumikhan logote ase. Tumikhan amar Pitri laga purohit khan, Aaron laga bacha khan aru Levi manuh khan ke khedai dise nohoi, aru dusra desh khan nisena nijor purohit khan bonai loise nohoi? Jun manuh ekta jawan goru aru sat-ta mer loi kene ahe, tai isor nohua jinis khan laga purohit hobo pare.

Kintu amar Pitri amar ase, aru amikhan Tar ke chari diya nai. Tar sewa kora purohit khan Aaron laga bacha khan ase, aru Levi manuh khan tarkhan laga kaam te ase. Hodai phojur aru saanjh te tarkhan pora amar Pitri ke jolai diya boli aru mitha gundh dhoop julai diye; tarkhan pora sapha suna laga mez te roti khan sari sari rakhe aru suna laga deepdan tu sai rakhe, jun hodai saanjh te julai diye. Amikhan amar Pitri laga hukum mani thake, kintu tumikhan Tar ke chari dise. Sabi, amar Pitri amikhan laga age te amikhan logote ase, aru Tar laga purohit khan logote tumikhan bipokkhe bajabole bigul khan ase. He Israel manuh khan, tumikhan laga baba-pokhi khan laga Isor, amar Pitri bipokkhe lorai nakoribi, kilemane tumikhan jiti bo naparibo.”

Jeroboam pora tarkhan laga pichete pora ahibole, chari phale gupt sipahi khan ke pathai disile; tar laga sena khan Judah laga age te thakise, aru gupt sipahi khan tarkhan laga pichete thakise. Judah ghuri sa-a somoite, age aru piche duita phale lorai thaka dikhise, aru amar Pitri ke mati kene kandise; aru purohit khan bigul khan bojaise. Judah laga manuh khan lorai laga awaj hikkise, aru jitia tarkhan hikkise, amar Pitri pora Abijah aru Judah laga age te Jeroboam aru sob Israel ke marise. Israel laga manuh khan Judah laga age pora polaise, aru amar Pitri pora tarkhan ke Judah laga hath te di dise. Abijah aru tar laga sena pora tarkhan ke bisi marise; aru Israel laga basi luwa panch lakh manuh khan mori kene girise. Eneka Israel tetiya niche hoi jaise, aru Judah jitise, kilemane tarkhan tarkhan laga baba-pokhi khan laga Isor, amar Pitri uporte bhorosa korise. Abijah pora Jeroboam ke piche khedise, aru tar pora sheher khan dhori loise—Bethel aru tar gaon khan, Jeshanah aru tar gaon khan, Ephron aru tar gaon khan.

Abijah jinda thaka somoite Jeroboam pora arubi takot pa-a nai, aru amar Pitri pora tar ke mari dise, aru tai mori jaise. Kintu Abijah takotiya hoise. Tai chouda maiki ke shadi korise aru tar bais-ta chokra aru solo-ta chukri hoise. Abijah laga baki kaam khan, tar laga chalchalan aru kotha khan, bhabobadi Iddo laga kitab te likha ase.