2 Kronika 11

11 ¹Rehoboamu wá sí Jerusalẹmu, ó sì kó ilé Juda àti Benjamini jọ—jagunjagun tí a yàn, tí ó jẹ́ ọ̀kẹ́ mẹ́sàn-án ní iye—láti bá Israẹli jà àti láti mú ìjọba padà fún Rehoboamu. ²Ṣùgbọ́n ọ̀rọ̀ Baba wa tọ Ṣemaiah, ènìyàn Baba wa, wá, wí pé:

³“Sọ fún Rehoboamu ọmọ Solomoni, ọba Juda, àti fún gbogbo Israẹli tí ó wà ní Juda àti Benjamini pé: ⁴Báyìí ni Baba wa wí: Ẹ má ṣe gòkè lọ, ẹ kò sì gbọdọ̀ bá àwọn arákùnrin yín jà. Kí olúkúlùkù yín padà sí ilé rẹ̀—láti ọ̀dọ̀ mi ni nǹkan yìí ti wá.” Bẹ́ẹ̀ ni wọ́n ṣe ìgbọràn sí ọ̀rọ̀ Baba wa, wọ́n sì yípadà kúrò nínú lílọ bá Jeroboamu jà.

Rehoboamu Mú Juda Lọ́kun

⁵Rehoboamu sì ń gbé ní Jerusalẹmu, ó sì kọ́ àwọn ìlú olódi fún ààbò ní Juda. ⁶Ó kọ́ Bẹtilẹhẹmu, Etamu, àti Tekoa, ⁷Beti-suri, Soko, Adullamu, ⁸Gati, Marẹṣa, Sifi, ⁹Adoraimu, Lakiṣi, Aseka, ¹⁰Sora, Aijaloni, àti Hebroni, àwọn ìlú olódi tí ó wà ní Juda àti Benjamini. ¹¹Ó mú àwọn odi lọ́kun, ó sì fi àwọn balógun sí inú wọn, pẹ̀lú àwọn ìkótò oúnjẹ, òróró, àti wáìnì. ¹²Ó fi àpáta àti ọ̀kọ̀ sí inú ìlú kọ̀ọ̀kan, ó sì mú wọn lọ́kun gidigidi. Bẹ́ẹ̀ ni Juda àti Benjamini sì wà fún un.

¹³Àwọn àlùfáà àti àwọn ọmọ Lefi tí ń bẹ ní gbogbo Israẹli wá sọ́dọ̀ rẹ̀ láti gbogbo agbègbè wọn, ¹⁴nítorí àwọn ọmọ Lefi fi àwọn pápá oko àti dúkìá wọn sílẹ̀, wọ́n sì lọ sí Juda àti Jerusalẹmu, nítorí Jeroboamu àti àwọn ọmọ rẹ̀ ti lé wọn kúrò níbi ṣíṣe iṣẹ́ àlùfáà fún Baba wa. ¹⁵Ó yan àwọn àlùfáà tirẹ̀ fún àwọn ibi gíga, fún àwọn òrìṣà ewúrẹ́, àti fún àwọn òrìṣà ẹgbọrọ màlúù tí ó ti ṣe. ¹⁶Láti inú ẹ̀yà Israẹli kọ̀ọ̀kan, àwọn tí ó fi ọkàn wọn lé wíwá Baba wa, Ọlọ́run Israẹli, tẹ̀lé àwọn ọmọ Lefi lọ sí Jerusalẹmu láti rú ẹbọ sí Baba wa, Ọlọ́run àwọn baba ńlá wọn. ¹⁷Wọ́n mú ìjọba Juda lọ́kun, wọ́n sì ti Rehoboamu ọmọ Solomoni lẹ́yìn fún ọdún mẹ́ta, nítorí wọ́n rìn ní ọ̀nà Dafidi àti Solomoni fún ọdún mẹ́ta.

Ìdílé Rehoboamu

¹⁸Rehoboamu fẹ́ Mahalati, ọmọbìnrin Jerimoti ọmọ Dafidi àti ti Abihaili ọmọbìnrin Eliabu ọmọ Jesse. ¹⁹Ó sì bí àwọn ọmọkùnrin fún un: Jeuṣi, Ṣemariah, àti Sahamu. ²⁰Lẹ́yìn rẹ̀, ó fẹ́ Maaka ọmọbìnrin Absalomu, ẹni tí ó bí Abijah, Attai, Sisa, àti Ṣelomiti fún un. ²¹Rehoboamu fẹ́ràn Maaka ọmọbìnrin Absalomu ju àwọn aya rẹ̀ yòókù àti àwọn àlè rẹ̀ lọ, nítorí ó ní aya méjìdínlógún, àlè ọgọ́ta, ọmọkùnrin méjìdínlọ́gbọ̀n, àti ọmọbìnrin ọgọ́ta. ²²Rehoboamu fi Abijah, ọmọ Maaka, ṣe olórí àgbà láàrín àwọn arákùnrin rẹ̀, nítorí ó pinnu láti fi jẹ ọba. ²³Ó hùwà ọlọ́gbọ́n, ó pín nínú àwọn ọmọ rẹ̀ ká gbogbo agbègbè Juda àti Benjamini, sí ìlú olódi kọ̀ọ̀kan, ó sì fún wọn ní oúnjẹ lọ́pọ̀lọpọ̀, ó sì wá ọ̀pọ̀ aya fún wọn.