Mi eng' bukuit

2 Ateptap Peetuusyek 13 FHB Father's Heart Bible™

Kiistoi 15% eng' kiy ne iale korook →
Bukuit

Koek Abijah Laitoryat

Ki guur Abijah ng'olyootanyi kolanda atebweet: ta kotinyei Judah tisiigap Aron, kagoochinoik che po peetuusyek ak taiyat, ago ko tinyei Israel kanamonik ak tisiik che wai icheegei. Kingo kiimen icheek eng' tai ak let, ki riir Judah eng' Kwandanyo ak koiboor, amu kiga koimgei ineendet.

Sura 13.

Eng' kenyiitap taman ak sisiit ne po Laitoryat Jeroboam, ki toi kolaitoran Abijah eng' Judah. Ki laitorane kenyiisyek somok eng' Jerusalem; kainetap kamennyi ko ki Mikaia, cheptap Uriel ne po Gibea. Ki piit lugeet eng' kwenutap Abijah ak Jeroboam. Ki toi Abijah lugeet kobooto lugeet ne po murenik eliphuusyek pogol ang'wan che ki kilewen, che kiimeen che nyigoonen eng' lugeet; ki tetkei Jeroboam kotokyigei ineendet kobooto murenik eliphuusyek pogol sisiit che ki kilewen, che nyigoonen.

Ki tonon Abijah tulweetap Zemaraim ne mi tulweetap Ephraim, ak koleenji, “Ogasa, Jeroboam ak Israel tugul! Tos ma ongen Kwandanyo, Kamuktaindetap Israel, ki koochi Daudi ak weeriikyik laitornatetap Israel koigeny, eng' arorutyet ne po munyuk? a a v5 Arorutyet ne po munyuk ko ki kayomiset ne nyolu ne mi koigeny; ki riibei munyuk amitwogik si ma kobiiygei, ak ki iborunei kayomiset ne mi koigeny ne ma kimuuchi kibetis. Ago ki ng'eet Jeroboam weeriitap Nebat, otwogindetap Solomon weeriitap Daudi, ak ki ingelelji mastanyi. Ki iyumgei kingelelik koyiem ineendet, kobargei ak Rehoboam weeriitap Solomon, ne kita koming ak koiywei muge, ne ma muuchi kotononi icheek.

Ara nguno obwaati ile omuuchi otononchi laitornatetap Kwandanyo ne mi eutap weeriigap Daudi, amu o tuiyet ne oo kobooto itoonwek che po thahabu che ki yai Jeroboam koek kanamonikwok. Tos ma kagoon tisiigap Kwandanyo, weeriigap Aron ak Lawiik, ak oyai tisiikwok inegei ko uu pororyosyek alak? Age tugul ne nyoonei kobooto mogoryongindet ak mengichik tisap, komuuchi koek tisiindet ne po tuguuk che ma kanamonik.

Ago Kwandanyo ko nyoon, ak ma kiginyemto ineendet. Tisiik che boisyenji ineendet ko weeriigap Aron, ak mi Lawiik poisyekwak. Kibeelchinii Kwandanyo tulootik ak nyamdutik che kibeelei che ng'uu ne anyiny eng' mornet age tugul ak karon age tugul; itetei magatiinik ortinwek eng' meset ne po thahabu ne tiliil, ak tendenii keldap tait ne po thahabu kobooto taisyekyik, che inomei eng' karon age tugul. Kiriibei riipseetap Kwandanyo, ago kagonyemto okweek ineendet. Keero, mi Kwandanyo kobootech eng' metonyo, ak tinyei tisiikyik igondisyek che kiguutei po waagaat agobo okweek. Okweek piigap Israel, amogarbei ak Kwandanyo, Kamuktaindetap kwanisyekwok, amu ma obelis.”

Ki yooktoi Jeroboam ribiseet koyiem, si konyo eng' letenywa; ki tokyingei lugeennyi Judah, ak mi ribiseet eng' letenywa. Ki guskong' Judah, ak kogeer kole kagetet lugeet eng' tai ak let, ak kowaakyo Kwandanyo; ki kuut tisiik igondisyek. Ki waakyo murenigap Judah waagaatap lugeet, ak ye kiwaakyo, ko par Kwandanyo Jeroboam ak Israel tugul eng' taitap Abijah ak Judah. Ki mwei piigap Israel eng' taitap Judah, ak ki inde Kwandanyo icheek eutap Judah. Ki par Abijah ak lugeennyi icheek pareet ne oo; ki pek murenik eliphuusyek pogol muut che ki kilewen che po Israel. Ki ming'inegei anyun Israel eng' peetuunooto, ak ki belis Judah amu ki tononjin Kwandanyo, Kamuktaindetap kwanisyekwak. Ki oon Abijah Jeroboam, ak konam nganasook eng' ineendet—Bethel kobooto kokwotinwekyik, Jeshanah kobooto kokwotinwekyik, Epron kobooto kokwotinwekyik.

Ma tagai konyoor Jeroboam kimnateennyi eng' peetuusyegap Abijah, ak ki par Kwandanyo ineendet, ak kome. Ago ki kimnotyo Abijah. Ki itun kwonyiik taman ak ang'wan, ak ki tinyei weeriik tiptem ak aeng', ak tiibiik taman ak lo. Poisyonik che ng'etunot che po Abijah, ortinwekyik ak ng'aleekyik, kisiraatiin eng' kitabuutap ng'alaalutik che po maotindet Ido.