Abiya Wákituka Kinga
Abiya wákalunga mambu mandi ku ndambu ya mongu: Yuta dyenina hika yi banganga Nzambi ba Loni, bimenga bya kosu kilumbu yi mwinda, kaasi Kiseledi dyenina yi bana ba bangombi yi banganga Nzambi ba bawu meni básya. Bámulwekwa ku thwala yi ku manima, Yuta dyákalunga kwena Tata wetu amana dyánunga, mukuma básila mbundu mwena yandi.
13 1Muna mvula ya kumi yi nana ya kinga Yelobowami, Abiya wákituka kinga wa Yuta. 2Wáyala mvula zitatu ku Yelusalemi; ngudi wandi wákala Mikaya, mwana ndumba wa Wudiyeli wa ku Ngibeya. Amana Abiya yi Yelobowami bánwana mvita. 3Abiya wáyandika mvita yi kibuka kya basuta mafunda makama maya, basolwa, bakwa ngolu mu mvita; amana Yelobowami wáyidika mvita kwena yandi yi basuta mafunda makama nana, basolwa, bakwa ngolu.
4Abiya wátelama ha thandu ya mongu wa Zemalayimi, muna malondi ma Efalayimi, amana wuzimbudi: «Luyukilenu meni, Yelobowami yi Kiseledi kyosu! 5Luzayibwoku ni Tata wetu, Nzambi wa Kiseledi, káhana Tavidi yi bana bandi kiti kya kipfumu kya Kiseledi mu mvula yi mvula, mu bulunda bwa mungwa? a a v5 Bulunda bwa mungwa bwákala kibingu kya luzitu, kya makulu; mungwa wátaninanga madya amana wákala kidimbu kya kikhanunu kyazinga, kyafwaniku budika. 6Kaasi Yelobowami mwana wa Nebati, musadi wa Solumoni mwana wa Tavidi, wátelama amana wáhakuka kwena pfumu wandi. 7Batu bakonda mupfunu bákutakana kwena yandi amana bázyandama kwena Lobuwami, mwana wa Solumoni, wuna wákala nleke amana kakala konda ngolu, bwabuna kalendaku kubazyandamina.
8Buthwena lwisi banza ni lulenda kuzyandamina Kipfumu kya Tata wetu, kina kenina mu moku ma bana ba Tavidi, kikuma benu lwenina mulumba-lumba wambuta wa batu yi bana ba bangombi ba wolu, mana káyidika Yelobowami hanga banzambi benu. 9Lwálubulaku ni banganga Nzambi ba Tata wetu, bana ba Loni, yi balefi, amana lwáyidika banganga Nzambi ba benu-benu hanga nati zahika? Kosu mutu wuna wisa yi mwana ngombi yi mameme nsambwadi kalenda kukituka nganga Nzambi wa bima bina byákalaku banzambi.
10Kaasi Tata wetu wenina wetu, amana tumusisaku. Banganga Nzambi bana bisi musadila bawu bana ba Loni, amana balefi benina mu kisalu kya bawu. 11Kosu suka yi kosu masika, bisi yokila Tata wetu bimenga bya kuyoka yi pfwabidi ya mananasi; bisi tula mapha mu milongo ha mesa ma wolu dyatoma amana bisi keba muzanga wa mwinda wa wolu, wuna wisi lema kosu masika. Betu tusi lunda mukuku wa Tata wetu, kaasi benu lwámusisa. 12Talenu, Tata wetu wenina yi betu ku thwala yetu, amana banganga Nzambi bandi benina yi phungi mu kusika kindanda kya mvita kikuma kya benu. Bisi Kiseledi, lunwanaku yi Tata wetu, Nzambi wa bakhulu benu, mukuma lulendaku kununga.»
13Yelobowami wáleka kifwandu mu nzunga, hanga bakwisa ku nima bawu; basuta bandi bakala ku thwala ya Yuta, amana kifwandu kyakala ku nima bawu. 14Yuta wábaluka, wámona mvita yakala ku thwala yi ku nima bawu, bábokila kwena Tata wetu; banganga Nzambi básika phungi. 15Bayakala ba Yuta báthuta ndinga ya mvita, amana bwosu bakala yamikina, Tata wetu wábeta Yelobowami yi Kiseledi kyosu ku thwala ya Abiya yi Yuta. 16Batu ba Kiseledi bátina ku thwala ya Yuta, amana Tata wetu wábahingisa kwena Yuta. 17Abiya yi kibuka kyandi kya basuta bábabeta mbeta yazitu; batu basolwa ba Kiseledi, mafunda makama matanu, bábwa, bafwa. 18Bwabuna Kiseledi kyákulumunwa muna tangwa dina, amana Yuta wánunga mukuma báyekamina kwena Tata wetu, Nzambi wa bakhulu bawu. 19Abiya wálanda Yelobowami, amana wábaka mbanza kwena yandi: Betele yi mahata mandi, Yesana yi mahata mandi, yi Efeloni yi mahata mandi.
20Yelobowami kavutwakilaku ngolu mu bilumbu bya luzingu lwa Abiya; amana Tata wetu wámubeta, amana wáfwa. 21Kaasi Abiya wávutwakila ngolu. Wákwela bakhetu kumi yi baya, amana wábuta bana ba bayakala makumodi yi bodi, yi bana ba bakhetu kumi yi sambanu. 22Mambu mahika ma Abiya, nzila zandi yi ndinga zandi, masonama mu mukanda wa nsamunu wa Ido, mbikudi.
