Abiya Di Ade
Abiya teɛm ka ne nsɛm fa bon no so: Yuda wɔ Aaron asɔfo, da biara afɔrebɔ ne kanea no, bere a Israel wɔ nantwi mma ne asɔfo a wɔayɛ wɔn ho. Bere a atamfo betwa Yuda anim ne n'akyi ho hyia no, wosu frɛ yɛn Agya na wodi nkonim, efisɛ wɔde wɔn ho too no so.
13 1Ɔhene Yeroboam ahenni afe a ɛtɔ so dunwɔtwe mu no, Abiya bɛyɛɛ Yuda hene. 2Odii hene wɔ Yerusalem mfe abiɛsa. Ne na din de Mikaia, Uriel a ofi Gibea babea. Abiya ne Yeroboam kɔɔ ɔko. 3Abiya de asraafo 400,000 a wɔapaw wɔn, akofo a wɔyɛ den wɔ ɔko mu, kɔɔ ɔko no; Yeroboam nso de akofo 800,000 a wɔapaw wɔn a wɔyɛ den hyehyɛɛ wɔn sɛ wɔne no bɛko.
4Abiya gyinaa Semaraim Bepɔ so wɔ Efraim bepɔ asase so, na ɔkae se, “Yeroboam ne Israel nyinaa, muntie me! 5Munnim sɛ yɛn Agya, Israel Nyankopɔn, de Israel ahengua ama Dawid ne ne mma daa, wɔ nkyene apam so ana? a a v5 Nkyene apam yɛ apam kronkron a ɛtena hɔ daa; nkyene kora aduan, na ɛyɛ bɔhyɛ a ɛtena hɔ daa a obi ntumi mmu so ho sɛnkyerɛnne. 6Nanso Nebat ba Yeroboam, Dawid ba Solomon akoa no, sɔree tew atua tiaa ne wura. 7Nnipa hunu bi boaa wɔn ho ano twaa ne ho hyiae, na wɔsɔre tiaa Solomon ba Rehoboam, bere a na ɔyɛ abofra a osuro ade, na ontumi nsɔre ntia wɔn no.
8Afei mususuw sɛ mubetumi asɔre atia yɛn Agya ahenni a ɛwɔ Dawid mmabarima nsam no, efisɛ moyɛ dɔm kɛse, na sika nantwi mma a Yeroboam yɛɛ sɛ mo anyame no ka mo ho. 9Ɛnyɛ mo na mopam yɛn Agya asɔfo, Aaron mma ne Lewifo no, na moayi mo ankasa asɔfo sɛnea aman foforo yɛ no ana? Obiara a ɔde nantwinini ba ne adwennini ason ba no betumi abɛyɛ ɔsɔfo ama nneɛma a ɛnyɛ anyame.
10Nanso yɛn de, yɛn Agya ne yɛn dea, na yɛnnyaw no. Asɔfo a wɔsom no no yɛ Aaron mma, na Lewifo no wɔ wɔn adwuma so. 11Anɔpa ne anwummere biara wɔhyew ɔhyew afɔre ne aduhuam ma yɛn Agya; wɔto brodo nnidiso nnidiso wɔ ɛpono a wɔde sikakɔkɔɔ amapa ayɛ no so, na wɔhwɛ sika kanea dua a wɔsɔ no anwummere biara no so. Yɛdi yɛn Agya ahyɛde so, nanso moagyaw no. 12Hwɛ, yɛn Agya ka yɛn ho di yɛn anim, na ne asɔfo kura ntorobɛnto a wɔbɛhyɛn de abɔ ɔko dawuru atia mo. Israelfo, mo ne yɛn Agya, mo agyanom Nyankopɔn, nnko, efisɛ morenni nkonim.”
13Yeroboam asoma ahintafo atwa ahyia sɛ wɔmfi wɔn akyi mmɛtow ahyɛ wɔn so; enti ne dɔm no hyiaa Yuda anim, na ahintafo no wɔ wɔn akyi. 14Bere a Yudafo dan wɔn ho hui sɛ ɔko no wɔ wɔn anim ne wɔn akyi no, wɔteɛɛm frɛɛ yɛn Agya; na asɔfo no hyɛn ntorobɛnto no. 15Yuda mmarima bɔɔ ɔko nteɛm, na bere a wɔreteɛ mu no, yɛn Agya bɔɔ Yeroboam ne Israel nyinaa wɔ Abiya ne Yuda anim. 16Israelfo guan fii Yudafo anim, na yɛn Agya de wɔn hyɛɛ Yudafo nsa. 17Abiya ne ne dɔm kunkum wɔn denneennen; Israel mmarima 500,000 a wɔapaw wɔn hwehwee ase wuwui. 18Enti saa bere no wɔbrɛɛ Israel ase, na Yuda dii nkonim, efisɛ wɔde wɔn ho too yɛn Agya, wɔn agyanom Nyankopɔn, so. 19Abiya taa Yeroboam, na ogyee nkurow fii ne nsam—Betel ne ne nkuraa, Yesana ne ne nkuraa, ne Efron ne ne nkuraa.
20Yeroboam annya ahoɔden bio da wɔ Abiya nkwa nna mu, na yɛn Agya bɔɔ no, na owui. 21Nanso Abiya nyaa ahoɔden. Ɔwaree yerenom dunan, na ɔwoo mmabarima aduonu abien ne mmabea dunsia. 22Abiya nnwuma a aka, nʼakwan ne ne nsɛm no, wɔakyerɛw wɔ odiyifo Ido nkyerɛkyerɛmu nhoma mu.
