Avāwui Nao Ngasā, Yui Khavai Pharā
Jishu chi Anao da shitsanhai, chiwui eina kazingram ngakhui, kala awui ngashit chi kahāng maleiya. Manglā, tarā kala athui kharakhat eina ngasanghai. Ithumwui Avāwui ngasangkha: ana awui Anaoli kharing kahaolakhavai shamkhui, chieina Anao kalei mili kharing lei.
5 1Jishu hi Khrista china da shitkasanga mi kachiva̱ ithumwui Avāwui nao ngasā kahaina, kala nao pharā ngasakkhame Avāli leikashe mi kachiva̱na awui eina pharā kahai chilila leishiya. 2Ithumna ithumwui Avāli leishida awui ningkhami mayonakha, ithumna ithumwui Avāwui naongarāli leishi kaji theishapa. 3Ithumna awui ningkhami khamayona hi ithumwui Avāli leikashina, kala awui ningkhami hi kakhanang maningmana. 4Ithumwui Avāwui nao ngasā kahai mi kachiva̱na okathuili yuiya. Okathuili yuihaida khayui chi hina: ithumwui shitkasangna. 5Jishu hi ithumwui Avāwui Naomayara china da shitkasanga a maningla khipāna okathuili yuirakhala? 6Jishu Khrista hi tara̱ kala ashee eina kharāna. Tara̱māng eina maningla, tara̱ kala ashee eina kharāna. Manglā Katharana hili shākhi mi, kaja Manglā Kathara hi khamashungana. 7Kaja shākhi mikhame kathum leili: a a v7 Kharethangwui lairik akhavābingna hi tuili kazingramli khalei Avā, Tui, kala Manglā Kathara da mataisangda pisanghai. Chi tuibing chi haokaphokwui Greek lairik akhalala maleimana, kala Johnna kapihaiwui khikha maningmana. 8Manglā, tara̱, kala asheena; kala hi kathum china ngaruma.
9Ithumna mikumowui shākhi khuisangakha, ithumwui Avāwui shākhi hi hakmeiya, kaja hi ithumwui Avāwui shākhina: awui Naomayarawui pongli ana shākhi sai kaji china. 10Ithumwui Avāwui Naomayarali shitkasanga a china hi shākhi chi awui lungli khuida lei. Mashitkasanga a china ali kakapika sākahaina, kaja awui Naomayarawui pongli ithumwui Avāna mikahai shākhi chi ana mashitsangmana. 11Kala hi shākhina: ithumwui Avāna ithumli katang makhavai kharing mihaira, kala hi kharing chi awui Naomayarali lei. 12Anaomayara khaleia china kharing lei; ithumwui Avāwui Naomayara makhalei a china kharing maleimana.
Avāwui Mangāli Ning Khanganung
13Ithumwui Avāwui Naomayarawui mingli shitkasanga nathumli ina hi kakapina, chieina nathumna katang makhavai kharing lei kaji theipaira. 14Awui mangāli ithumwui ning khanganung hi hina: awui ningkachāng athishurda ithumna kapopo chi ana ithumli shāmi. 15Kala ithumna kapopo chi ana ithumli shāmi kaji theiakha, ithumna awui eina kapo chi samphanghaira kaji thei.
16Kachikathāna awui achināna kathili mathānsang morei akha sā chi theiakha, ana kapo sāranu, kala ithumwui Avāna ali kharing mira; kathili mathānsang morei kasābingli ana chithāda mira. Kathili thānzang morei akha lei; chiwui pongli seihā sāranu da ina mahāngmana. 17Khayon saikora hi moreina, kala kathili mathānsang morei akha lei.
18Ithumna thei: Avāwui eina pharā kahai mi kachiva̱na morei sālui sālui majimana, kha Avāwui eina pharā kahai A china ali phārimi, kala makaphā china ali masāza̱luipaimana. b b v18 Shitkasanga mi kachiva̱ Avāwui nao ngasā kahaina, kala Avāwuili pharāhai akhamāng Jishuna athumli makaphā chiwui eina phārimi. 19Ithumna thei kaja ithum Avāwui eina kharāna, kala okathui katonga makaphā chiwui pangshap azingli lei. 20Avāwui Naomayara rāhaira, kala khamashunga A chi theikhavai ithumli theishingkakhui mihaira kaji ithumna thei. Ithum khamashunga A chili, awui Naomayara Jishu Khristali lei. A chi khamashunga Vare kala katang makhavai kharing china. c c v20 Johnwui khanaowa tuina Jishu Khristali "khamashunga Vare kala katang makhavai kharing" da homi—hi Anaomayarana Avāwui tharkhamathengshong khalattali khangarum da matheimeikhame Varetuiwui hāngkaphat matakkhak kahaibingwui akhamāngna.
21Naoshinaobing, meoma̱ eina nathum khalatta chihochaohaolu.
