2 John 1

1 ¹Ararra, kapangkhui kahai sha̱naova kala awui naongarāli kagapina—athumli khamashung eina ina leishi; ina maningla, kha khamashung theibing saikorana leishi. ^a a v1 "Kapangkhui kahai sha̱naova̱ kala awui naongarā" chi apam church akha kala awui mibingli mayāra da phaningkapai. ²Kaja khamashung china ithumli ngasomida lei, kala katang makhavai ithumli ngasomichingra. ³Ithumwui Avā kala ithumwui Avāwui Naomayara Jishu Khristawui eina lukhamashan, phaningkhami kala chingri kahai china khamashung kala leikashi eina ithumli ngasomira.

⁴Nawui naongarā kaikha ithumwui Avāna ithumli kaso kahai thada khamashungli kazata samphangda ina ringphālakhaowa. ⁵Ara, leikashe sha̱naova, ina nali ngakaowa: kadhara ningkhami maningmana, kha haokaphokwui eina ithumna samphang kahai kachama ningkhami chi hina: akha eina akha leishi ngaroklu. ⁶Leikashi chi hina: ithumna awui ningkhamibing eina ringa. Haokaphokwui eina nathumna shākahai thada, ningkhami chi hina: nathumna leikashi eina ringra.

⁷Kaja Jishu Khrista phasā eina rai kaji mamayāmada, kakapika kachungkhana okathuili shokhaira. Hi chi kakapika kala Khristali makhamayāna. ⁸Ithumna ot sākahai chi nathumna mashimān khavai, kha sāman kākashung samphang khavai, nathum khalatta nganātitkhuilu. ⁹Khristawui tamchithei eina mangasola khalāngli zanga mi china ithumwui Avāli makhuikasangna; kha tamchitheili ngasoda khalei mi china ithumwui Avā kala Anaomayara khanini khuikasanga. ^b b v9 Anaomayarali mamayā hi Avāli shimān ngasakna. Athum khani chi ngakheikhang khararmana da Johnwui chithina panglāk eina hānga—Jishuwui tamchitheili ngasola khalei hi ithumwui Avā kala awui Naomayara khanini samsoda khuikasangna. ¹⁰Kachikathāna aja tamchithei masola nathumli raakha, ali nathumwui shimli mazang ngasakalu, kala shālamla masālu; ¹¹kaja ali shālam sāa mi china awui makaphā ot sākahaili zanga.

¹²Ina nathumli kapikhavai tārakha lei, kha lairik kala muk eina makapingaimana. Nathumwui vāk rālaga mashā eina ngazek khavai ina chihānda lei; chieina ithumwui khamathān kāshungmeira. ¹³Nawui kapangkhui kahai azarva̱wui naongarāna nali shālam mili.