3 John 1

1 ¹Ararra, khamashung eina ina leishi kaje leikashe Gaiusli kagapina.

²Leikashe, nawui manglā mataisanga thada, ot saikorali na mataisang kala kazāt makhalei khavai ina seihā sāna. ³Ivānaobing vāshunglaga nawui khamashungli ningkatong chiwui vang shākhi mi tharan ina tarākha ringphai. Kaja na kachangkhat eina chili okthuichingra. ⁴Iwui naongarāna khamashung chili okthuichingra da nganā hi mataimeida reikhamei khamathān iwuili maleimana.

⁵Leikashe, kha̱mibing tangdala ivānaobingli na kasā ot saikorali ningkatong eina sāna. ⁶Athumna nawui leikashi chi churchwui mangāli shākhi mi. Ithumwui Avāwui vang kānnā thada athumli akhur chihovālu. ⁷Kaja athum Aming chiwui vang Gentilebingwui eina khikha makhuila vaihaira. ^a a v7 "Aming" chiya Jishuli hāngmi—hi kachihovābingna awui mahutli vaihaira kala mashitkasangabingwui eina pheisā khangachon khikha makhuila. ⁸Chiwui vang eina khamashungwui vang ithum otram ngatha̱kharumabing ngasā khavai, ithumna chikathā mibingli ngachonmi phalungra.

⁹Ina churchli khichānkha kapisangmi, kha athumwui lungli khare sāda ningchang kaje Diotrephesna ithumli makhuisangmana. ¹⁰Chiwui vang eina, ina raakha, mikhanam tui eina ithumli khamashāta, ana kasā chi ina phongmira. Chi eina mashungada makhuila, ana ivānaobingli zang khavai mamayāmana, zang khavai ningchangbingli khāma, kala athumli churchwui eina hortai.

¹¹Leikashe, makhayā chi matamkhuialu, kha kaphā chi tamkhuilu. Kaphā kasā a chi ithumwui Avāwui eina kharāna; makhayā kasā a chi ithumwui Avāli matheirarmana. ¹²Mi saikorana Demetriuswui kaphā matui, kala khamashung chinala chithāda matui. Ithumnala shākhi mi, kala ithumwui shākhi hi mashunga kaji nana thei.

¹³Ina nali kapikhangai kachungkha lei, kha kolom kala muk eina makapingaimana. ¹⁴Ina nali thākta theira da kachihān lei, kala ithum phasā rāhaoda ngazek ngarokra. ¹⁵Chingri kahai nali leiranu. Ngasotnaobingna nali shālam chiphunli. Ngasotnao kachiva̱li aming eina shālam hāngmilu.