3 ዮሐንስ 1

1 ¹ሽማግሌው፤ በእውነት ለምወደው ለተወደደው ጋይዮስ።

²ወዳጄ ሆይ፣ ነፍስህ እንደምትበለጽግ፣ በሁሉም ነገር እንድትበለጽግና ጤናማ ሆነህ እንድትኖር እጸልያለሁ። ³ወንድሞች መጥተው ለእውነት ስላለህ ታማኝነት በመሰከሩ ጊዜ እጅግ ደስ አለኝ፤ አንተ በእውነት በእርሱ እየተመላለስህ ነውና። ⁴ልጆቼ በእውነት እየተመላለሱ እንደ ሆነ ከመስማት የሚበልጥ ደስታ የለኝም።

⁵ወዳጄ ሆይ፣ ለወንድሞች፣ በተለይም እንግዶች ለሆኑት በምታደርገው ሁሉ በታማኝነት ትሠራለህ። ⁶በቤተ ክርስቲያን ፊት ስለ ፍቅርህ መሰከሩ። ለአባታችን በሚገባ ሁኔታ ሸኛቸው። ⁷ከአሕዛብ ምንም ሳይቀበሉ ስለ ስሙ ወጥተዋልና። ^a a v7 “ስሙ” የሚለው ኢየሱስን ያመለክታል፤ እነዚህ ሚስዮናውያን እርሱን ወክለው ወጡ፤ ከማያምኑ ሰዎችም ምንም ዐይነት የገንዘብ ድጋፍ አልተቀበሉም። ⁸ስለዚህ ለእውነት አብረን የምንሠራ እንድንሆን እንደነዚህ ያሉትን ሰዎች ልንደግፍ ይገባናል።

⁹ለቤተ ክርስቲያን አንድ ነገር ጻፍሁ፤ ነገር ግን በመካከላቸው ፊተኛ መሆንን የሚወደው ድዮጥራጢስ አይቀበለንም። ¹⁰ስለዚህ ብመጣ የሚያደርገውን አጋልጣለሁ፤ በክፉ ቃላት ይሳደብብናል። በዚህም ሳይረካ ወንድሞችን ለመቀበል እምቢ ይላል፤ ሊቀበሉ የሚፈልጉትንም ይከለክላል፤ ከቤተ ክርስቲያንም ያስወጣቸዋል።

¹¹ወዳጄ ሆይ፣ መልካሙን እንጂ ክፉውን አትምሰል። መልካም የሚያደርግ ከአባታችን ነው፤ ክፉ የሚያደርግ ግን አባታችንን አላየም። ¹²ሁሉም ስለ ድሜጥሮስ መልካም ይናገራሉ፤ እውነትም ራሷ እንዲሁ ትመሰክራለች። እኛም እንመሰክራለን፤ ምስክርነታችንም እውነት እንደ ሆነ ታውቃለህ።

¹³የምጽፍልህ ብዙ ነገር ነበረኝ፤ ነገር ግን በቀለምና በብርዕ ልጽፍልህ አልፈልግም። ¹⁴በቅርቡ ላይህ ተስፋ አደርጋለሁ፤ ፊት ለፊትም እንነጋገራለን። ¹⁵ሰላም ለአንተ ይሁን። ወዳጆች ሰላምታ ያቀርቡልሃል። ወዳጆችን እያንዳንዳቸውን በየስማቸው ሰላምታ አቅርብላቸው።