ናብ ፍቑር ጋይዮስ

ንጋይዮስ ብኣቀባብላኡን ብተኣማንነቱን ዘመጉስ፥ ኣንፃር ክዕብለል ዝደሊ መራሒ ኸዓ ዘጠንቅቕ ውልቃዊ መልእኽቲ።

ምዕራፍ 1።

እቲ ሽማግለ፥ ናብቲ ብሓቂ ዘፍቅሮ ፍቑር ጋይዮስ።

ኣታ ፍቑረይ፥ ከምቲ ነፍስኻ እትሰልጥ፥ በብዅሉ ኽትሰልጥ ጥዑይውን ክትከውን እልምን ኣለኹ። ኣሕዋት መፂኦም፥ ብዛዕባ ተኣማንነትካ ንሓቂ ምስ መስከሩ፥ የመና ተሓጐስኩ፤ ንስኻ ብሓቂ ብእኣ ትመላለስ ኣለኻ እሞ። ደቀይ ብሓቂ ኸም ዝመላለሱ ኻብ ምስማዕ ዝዓቢ ሓጐስ የብለይን።

ኣታ ፍቑረይ፥ ነሕዋት፥ ነቶም ጓኖት እውን፥ ኣብ እትገብረሎም ዅሉ ብእሙንነት ትዓዪ ኣለኻ። ንሳቶም ኣብ ቅድሚ ቤተ ክርስቲያን ብዛዕባ ፍቕርኻ መስከሩ። ንኣቦና ዝግባእ መገዲ ኣፋንዎም። ካብ ኣህዛብ ሓንቲ እኳ እንተይተቐበሉ፥ ምእንቲ እቲ ስም ወፂኦም እዮም እሞ። ^a ስለዙይ ንሓቂ መዓይይቲ ምእንቲ ኽንከውን፥ ነምሳሎም ዝበሉ ሰባት ክንድግፎም ይግብአና እዩ።

ናብ ቤተ ክርስቲያን ገለ ነገር ፅሒፈ ነይረ፤ ዲዮጥራጥስ ግና፥ እቲ ኣብ ማእኸሎም ቀዳማይ ክኸውን ዝፈቱ፥ ኣይተቐበለናን። ስለዙይ እንተ መፃእኹ፥ እቲ ዝገብሮ ዘሎ፥ ማለት ብኽፉእ ዘረባ ኸም ዘሕምየና ኽቃልዖ እየ። በዙይ እኳ እንተይዓገበ፥ ነሕዋት ምቕባል ኣብዩ፥ ነቶም ክቕበሉ ዝደልዩ ይኽልክሎም፥ ካብ ቤተ ክርስቲያንውን የውፅኦም።

ኣታ ፍቑረይ፥ ሰናይ ደኣ እምበር ክፉእ ኣይትቕዳሕ። እቲ ሰናይ ዝገብር ካብ ኣቦና እዩ፤ እቲ ክፉእ ዝገብር ግና ንኣቦና ኣይረአዮን። ብዛዕባ ዲሜጥሮስ ኵሉ ፅቡቕ ይዛረብ፥ ሓቂ ባዕላ እውን ትምስክረሉ። ንሕናውን ንምስክር ኢና፤ ምስክርነትና ሓቂ ምዃኑ ኸዓ ንስኻ ትፈልጥ ኢኻ።

ናባኻ ዝፅሕፎ ብዙሕ ነይሩኒ፥ ግና ብብርዕን ብቐለምን ክፅሕፈልካ ኣይደልን። ቀልጢፈ ኽርእየካ ተስፋ እገብር ኣለኹ፥ ገፅ ንገፅ ከዓ ክንዛረብ ኢና። ሰላም ንኣኻ ይኹን። እቶም ኣዕሩኽ ሰላም ይብሉኻ ኣለዉ። ነቶም ኣዕሩኽ በብስሞም ሰላም በሎም።