Nye Gaịọs, onye a hụrụ nʼanya

Ozi onwe onye na-eto Gaịọs maka ịnabata ọbịa ya na ikwesị ntụkwasị obi ya, ma na-adọ aka ná ntị megide onye ndú na-achị achị n'ike.

Isi 1.

Mụ onwe m bụ okenye, na-edegara Gaịọs onye a hụrụ nʼanya, onye m hụrụ nʼanya nʼeziokwu.

Onye m hụrụ nʼanya, ana m ekpe ekpere ka ihe gaara gị nke ọma nʼụzọ niile, ka ahụ dịkwa gị mma, dịka mkpụrụobi gị na-aga nke ọma. Obi tọrọ m ụtọ nke ukwuu mgbe ụfọdụ ụmụnna bịara gbaa akaebe banyere ikwesị ntụkwasị obi gị nʼeziokwu ahụ—nʼihi na ị na-ejegharị nʼezie nʼime ya. O nweghị ọṅụ dị ukwuu karịa nke a nke m nwere: ịnụ na ụmụ m na-ejegharị nʼeziokwu ahụ.

Onye m hụrụ nʼanya, ị na-eji ikwesị ntụkwasị obi eme ihe niile ị na-emere ụmụnna, ọbụladị ndị ọbịa. Ha gbara akaebe banyere ịhụnanya gị nʼihu ọgbakọ ụka. Zilaga ha nʼụzọ kwesịrị Nna anyị. Nʼihi na ha pụrụ nʼihi Aha ahụ, na-anaraghị ihe ọbụla site nʼaka ndị mba ọzọ. ^a Ya mere, anyị kwesịrị ịkwado ndị dị otu a, ka anyị wee bụrụ ndị ọrụ ibe maka eziokwu ahụ.

Edere m ihe nye ọgbakọ ụka, ma Daịotrefus, onye na-achọ ịbụ onye mbụ nʼetiti ha, adịghị anabata anyị. Ya mere, ọ bụrụ na m bịa, m ga-ekpughe ihe ọ na-eme—iji okwu ọjọọ na-ekwulu anyị. Nke ahụ ezughị ya, ọ na-ajụ ịnabata ụmụnna, na-egbochikwa ndị chọrọ ịnabata ha, na-achụpụkwa ha site nʼọgbakọ ụka.

Onye m hụrụ nʼanya, eṅomila ihe ọjọọ, kama ṅomie ihe ọma. Onye ọbụla na-eme ihe ọma si na Nna anyị; onye ọbụla na-eme ihe ọjọọ ahụbeghị Nna anyị. Mmadụ niile na-ekwu okwu ọma banyere Dimetrius, eziokwu ahụ na-ekwukwa otu a. Anyị onwe anyị na-agbakwa akaebe, ị makwaara na akaebe anyị bụ eziokwu.

Enwere m ọtụtụ ihe m ga-edere gị, ma achọghị m iji mkpịsị odee na ink dee ya. Enwere m olileanya ịhụ gị nʼoge na-adịghị anya, anyị ga-ekwurịtakwa okwu ihu na ihu. Udo dịrị gị. Ndị enyi na-ekele gị. Kelee onye ọbụla nʼime ndị enyi site nʼaha ya.