1 John 2

2 ¹Iwui leikashe inaongarā, nathumna morei masā khavai hi kagapina. Kha mi akhana morei sāakha, ithumli Avāwui mangāli nganingkhame akha lei; ana khamashung khangaronga Jishu Khristana. ²Ava akhalatta ithumwui morei pheomi khavaiwui vang maseimi khavaina. Ithumwui vangmāng maningla, okathui katongawui vangla ana maseimi khavaina. ^a a v2 Jishuva ithumwui morei pheomihai kala bichar mai ngareimi khavai pha̱kaphayāna—shitkasangbingwui vang maningla, kha okathui katongawui vang chigatmi kahaina. ³Ithumna awui ningkhami mayonakha, ithumna a theihaira kaji theikhuishapa. ⁴Kachikathāna, "I ali thei," da jilaga awui ningkhami makhamayonakha, a kakapikna, kala khamashung chi awuili maleimana. ⁵Kha kachikathāna awui tui mayonakha, ithumwui Avāwui leikashi chi awuili kachangkhat kashungmeihaira. Ithumna awuili lei kaji hi eina theikhuishapa: ⁶Awuili leichinga da kahānga a china ana zatkahai apong chithada zatphalungra.

⁷Leikashebing, ina nathumli ningkhami kadhar kapi maningmana, kha nathumna haokaphok eina singkahai achālakha ningkhami akhana. Achālakha ningkhami chi nathumna shākahai tui china. ⁸Latluida, ina nathumli ningkhami kadhar akha kapi. Chi awuili kala nathumli khamashungna, kaja tangkhamang chi kānhaida lei kala akachanga kahor chi arui shinihaira. ⁹Kahorli lei da hānglaga avānao achināli yangkharinga a china arui eina tangda tangkhamangli lei. ¹⁰Kachikathāna avānao achināli leikashe a china kahorli leichinga, kala awuili phei ngaphok khavai khikha maleimana. ¹¹Kha avānao achināli yangkharinga a china tangkhamangli lei. Ana tangkhamangli zatta, kachishong varakhala kaji matheimana, kaja tangkhamangna awui mik latshokmihaowa.

¹²Inaongarā, ina nathumli kagapina, kaja nathumwui morei chi awui mingwui vang eina pheomihaira.

¹³Ina nathumli kagapina, avāngarā, kaja nathumna haokaphokwui eina khalei A chi thei. Yaronnaobing, ina nathumli kagapina, kaja nathumna makaphā a chi yuihaira.

¹⁴Naoshinaobing, ina kagapina, kaja nathumna Avā chi thei. Ina kagapina, avāngarā, kaja nathumna haokaphokwui eina khalei A chi thei. Yaronnaobing, ina kagapina, kaja nathum pangmeida lei, kala ithumwui Avāwui tui chi nathumli lei, kala nathumna makaphā a chi yuihaira.

Okathuili Maleishialu

¹⁵Okathui kala okathuili khalei ot saikorali maleishialu. Kachikathāna okathuili leishiakha, Avāwui leikashi chi awuili maleimana. ¹⁶Phasāwui ningkachāng, mikwui ningkachāng, kala mirinwui langkaso, okathuili khalei ot saikora hi Avāwui eina kharā maningla okathuiwui eina kharāna. ¹⁷Okathui kala chiwui ningkachāng chi kānhaida lei, kha ithumwui Avāwui kaphaning kasā a china katang mavaila leichingra.

Anaomayarali Kahatabingli Ning Ngasharlu

¹⁸Naoshinaobing, hi khanaowa pung china. Khristali Makhamayā rāra da nathumna shākahai thada, ara Khristali Makhamayā kachungkha rāhaira; hi eina hi khanaowa pung china da ithumna thei. ^b b v18 "Khristali Makhamayā" kajiwui kakhalat hi Khristali "mangakaikashe" lah Khristawui "apamli" jina. Johnna hi Jishu hi Khrista china da kahata mi kachiva̱ da hānga (2:22); arui "kachungkha" rāhaira, "Khristali Makhamayāwui manglā"na thannguihaira (4:3). ¹⁹Athum ithumwui eina shokhaowa, kha athum ithumwui maningmana; athum ithumwui jiakha, ithum ngasoda leichingra. Kha athum akhalala ithumwui maningmana da chithei khavai athum thuihaowa. ²⁰Kha nathumli Kathara chiwui eina neo lei, kala nathum saikorana khamashung chi thei. ²¹Ina nathumli hi kapi hi nathumna khamashung makatheiwui vang maningmana, kha nathumna katheiwui vangna. Kala khamashungwui eina kakapik akhala marāmana. ²²Jishu hi Khrista china da kahata mi chi maningakha, kakapika mi chi khipākhala? Avā kala Anaomayarali kahata hi china Khristali Makhamayāna. ²³Anaomayarali kahata mi akhalala Avā maleimana. Anaomayarali hāngkaphata mi china Avāla lei.

²⁴Nathum, haokaphok eina nathumna shākahai chi nathumli leichingranu. Haokaphok eina nathumna shākahai chi nathumli leichinga jiakha, nathumla Anaomayara kala Avāli leichingra. ²⁵Kala ana khalattana ithumli ngashit kahai chi katang makhavai kharingna.

²⁶Ina nathumli thannguikhavai hotna kahaibingwui pongli hi kagapina. ²⁷Nathumwui vanga, awui eina nathumna samphangkahai neo chi nathumli leichinga, kala nathumli tamchithei khavai mi akhala darkar maleimana. Kha awui neona ot saikorawui pongli nathumli tamchithei, kala chi khamashungna, kakapik maningmana. Chi nathumli tamchithei thada awuili leichingranu.

²⁸Kala ara, naoshinaobing, awuili leichingranu, chieina ana latkharā tharan ithumli ning khanganung leira, kala awui kharāla khayā khamalā eina awui mangāwui eina mangalanmara. ²⁹Ana khamashungana da nathumna thei jiakha, khamashung khangarong kasā mi saikora awui eina pharākhui da nathumnala thei.