1 John 1

1 ¹Haokaphokwui eina kalei chi, ithumna kashākahai chi, ithum khalattawui mik eina theikahai chi, ithumna kayangkahai kala ithumwui pāng eina sāza̱khui chi, hi kharingwui Tui Jishuwui pongli ithumna hāshoka. ^a a v1 Johnna a khalattawui pāng eina sāza̱da kala akhanā eina shākahai mi chili chihoda haokaphoka—kharingwui Tui hi ningphanin akha maningmana, kha mi akha, Jishu china. ²Kharing chi samphanga; ithumna chi theihaira, chiwui vang shākhi mi, kala ithumwui Avā ngasoda kalei kala ithumli samphanga katang makhavai kharing chi nathumli vaosanga. ³Nathumla ithum ngasoda ngarumsak leipai khavai, ithumna theida kala shākahai chi nathumlila vaosanga. Ithumwui ngarumsak chi ithumwui Avā kala awui Naomayara Jishu Khrista ngasoda lei. ⁴Kala ithumwui ringkaphā kāshungchao khavai ithumna hi kagapina.

Ithumwui Avāwui Kahorli Kazata

⁵Ithumna awui eina shāda nathumli hāngkahai tui chi hina: ithumwui Avā hi kahorna, awuili tangkhamang khikhala maleimana. ^b b v5 Awuili tangkhamangwui aka̱lā khikhala maleila kahor katharana kalei Vare chi ithumwui Avāna—hi Jishuna khuikahai kala awui shākhibingna kachihokahai paona. ⁶Ithumna awui ngasoda ngarumsak lei da hānglaga tangkhamangli zatakha, ithumna kapika kala khamashung masāmana. ⁷Kha ana kahorli khalei thada ithumna kahorli zatakha, ithumna akha eina akha ngarumsak leichinga, kala awui Naomayara Jishuwui ashee eina ithumli morei saikorawui eina tharngasaka. ⁸Ithumna morei maleimana da hāngakha, ithumna ithum khalattali minamda kala khamashung ithumwuili maleimana. ⁹Ithumna ithumwui morei hāngphatakha, ithumwui morei pheomi kala khayonkhamāng saikorawui eina ithumli tharngasak khavai ithumwui Avā hi shitsangkapai kala khangarongna. ¹⁰Morei masāmana da ithumna hāngakha, ithumna ali kakapikna sāmi, kala awui tui ithumwuili maleimana.