Muna da Mai Roƙonmu

Yahaya yana rubutu domin masu karatunsa kada su yi zunubi, ya kuma nuna Yesu a matsayin mai taimakonsu a gaban Uba. Duk wanda ya ce ya san shi alhali yana ƙin ɗan'uwansa yana cikin duhu har yanzu. Duniya tana shuɗewa, waɗanda suka fita kuma suna bayyana kansu ta wurin musun Ɗan.

Babi na 2.

'Ya'yana ƙaunatattu, ina rubuta muku wannan ne domin kada ku yi zunubi. Amma in wani ya yi zunubi, muna da mai roƙonmu a wurin Uba—Yesu Almasihu, mai adalcin nan. Shi kansa shi ne hadayar kafara saboda zunubanmu, ba kuwa namu kaɗai ba, har ma na dukan duniya. ^a Ta haka ne muka san mun san shi: in muna kiyaye umarnansa. Duk wanda ya ce, “Na san shi,” amma ba ya kiyaye umarnansa, maƙaryaci ne—gaskiya kuwa ba ta cikinsa. Amma duk wanda yake kiyaye maganarsa, ƙaunar Ubanmu ta cika sosai a cikinsa. Ta haka ne muka tabbatar muna cikinsa: Duk wanda ya ce yana zaune a cikinsa, ya kamata yă yi tafiya kamar yadda shi ya yi tafiya.

Ƙaunatattu, ba sabon umarni nake rubuta muku ba, sai dai tsohon umarni, wanda kuke da shi tun daga farko—tsohon umarnin nan kuwa shi ne maganar da kuka ji. Duk da haka, sabon umarni nake rubuta muku—wanda yake gaskiya a cikinsa da kuma a cikinku—domin duhu yana shūɗewa, hasken gaskiya kuwa ya riga ya haskaka. Duk wanda ya ce yana cikin haske amma yana ƙin ɗan'uwansa, yana cikin duhu har yanzu. Duk wanda yake ƙaunar ɗan'uwansa yana zaune cikin haske, babu kuma abin tuntuɓe a cikinsa. Amma duk wanda yake ƙin ɗan'uwansa yana cikin duhu, yana tafiya cikin duhu, bai kuwa san inda za shi ba—duhu ya makanta masa idanu.

Ina rubuta muku, 'ya'ya ƙanana, domin an gafarta muku zunubanku saboda sunansa.

Ina rubuta muku, ubanni, domin kun san shi wanda yake tun daga farko. Ina rubuta muku, samari, domin kun ci mugun nan da yaƙi.

'Ya'ya, ina rubutawa domin kun san Uba. Ubanni, ina rubutawa domin kun san shi wanda yake tun daga farko. Samari, ina rubutawa domin kuna da ƙarfi, maganar Ubanmu kuma tana zaune a cikinku, kun kuma rinjayi mugun nan.

Kada Ku Ƙaunaci Duniya

Kada ku ƙaunaci duniya, ko wani abin da yake cikin duniya. Duk wanda yake ƙaunar duniya, ƙaunar Uba ba ta cikinsa. Dukan abin da yake cikin duniya—sha'awar jiki, da sha'awar idanu, da taƙaman rayuwa—ba daga wurin Uba yake ba, sai dai daga duniya. Duniya da sha'awoyinta suna shūɗewa, amma duk wanda yake aikata nufin Ubanmu yana nan har abada.

Ku Yi Hankali da Masu Mūsun Ɗa

'Ya'ya, sa'a ta ƙarshe ce yanzu. Kamar yadda kuka ji cewa magabcin Almasihu zai zo, haka ma yanzu magabtan Almasihu da yawa sun bayyana; ta haka ne muka san sa'a ta ƙarshe ce. ^b Sun fito ne daga cikinmu, amma ba namu ba ne; da sun kasance namu ne, da sun tsaya tare da mu. Sun tafi dai, domin a nuna cewa babu ko ɗaya a cikinsu da yake namu. Amma ku, kuna da shafawa daga wurin Mai Tsarki, dukanku kuwa kun san gaskiya. Ban rubuta muku domin ba ku san gaskiya ba, sai dai domin kun santa—kuma babu wata ƙarya da take fitowa daga gaskiya. Wane ne maƙaryaci, in ba wanda yake mūsun cewa Yesu shi ne Almasihu ba? Wannan shi ne magabcin Almasihu, mai mūsun Uba da Ɗa. Duk wanda ya mūsunci Ɗa, ba shi da Uba. Duk wanda ya shaida Ɗa, yana da Uba kuma.

Ku kuwa, abin da kuka ji tun daga farko, bari yă tabbata a cikinku. In abin da kuka ji tun daga farko ya tabbata a cikinku, ku ma za ku tabbata a cikin Ɗa da Uba. Wannan kuwa shi ne alkawarin da shi kansa ya yi mana—rai madawwami.

Na rubuta muku waɗannan abubuwa game da waɗanda suke ƙoƙarin ɓatar da ku. Amma ku, shafawar da kuka karɓa daga wurinsa tana nan a cikinku, ba kwa kuma bukatar wani yă koya muku kome. Amma da yake shafawarsa tana koya muku kome—gaskiya ce, ba ƙarya ba—ku tabbata a cikinsa, kamar yadda ta koya muku.

Yanzu kuwa, 'ya'ya ƙanana, ku tabbata a cikinsa, domin sa'ad da ya bayyana mu kasance da ƙarfin hali, kada kuma mu ji kunya a gabansa a lokacin zuwansa. In kun san shi mai adalci ne, kun kuma sani cewa duk masu aikata adalci daga gare shi aka haife su.