1 ዮሐንስ 2

2 ¹ልጆቼ ሆይ፣ ኀጢአት እንዳታደርጉ ይህን እጽፍላችኋለሁ። ነገር ግን ማንም ኀጢአት ቢያደርግ፣ በአብ ፊት ጠበቃ አለን፤ እርሱም ጻድቁ ኢየሱስ ክርስቶስ ነው። ²እርሱ ራሱ ለኀጢአታችን ማስተሰሪያ መሥዋዕት ነው፤ ይህም ለእኛ ብቻ ሳይሆን ለመላው ዓለም ጭምር ነው። ^a a v2 ኢየሱስ ኀጢአታችንን የሚሸፍንና ፍርድን የሚመልስ መሥዋዕት ነው፤ ለአማኞች ብቻ ሳይሆን ለመላው ዓለም የቀረበ ነው። ³እርሱን እንዳወቅነው በዚህ እናውቃለን፤ ይኸውም ትእዛዛቱን ብንጠብቅ ነው። ⁴“አውቀዋለሁ” የሚል፣ ትእዛዛቱን ግን የማይጠብቅ ሰው ውሸታም ነው፤ እውነትም በእርሱ ውስጥ የለም። ⁵ቃሉን የሚጠብቅ ሰው ግን፣ የአባታችን ፍቅር በእርሱ ውስጥ በእውነት ፍጹም ሆኗል። በእርሱ ውስጥ መሆናችንን የምናውቀው በዚህ ነው፤ ⁶በእርሱ ውስጥ እኖራለሁ የሚል ሰው፣ እርሱ በተመላለሰበት መንገድ ራሱ ሊመላለስ ይገባዋል።

⁷ወዳጆች ሆይ፣ አዲስ ትእዛዝ ሳይሆን ከመጀመሪያ ጀምሮ የነበረውን አሮጌ ትእዛዝ እጽፍላችኋለሁ፤ ይህም አሮጌ ትእዛዝ የሰማችሁት ቃል ነው። ⁸ደግሞም አዲስ ትእዛዝ እጽፍላችኋለሁ፤ ይህም በእርሱና በእናንተ ውስጥ እውነት ነው፤ ጨለማው እያለፈ እውነተኛው ብርሃንም አሁን ስለሚያበራ ነው። ⁹በብርሃን ውስጥ ነኝ እያለ ወንድሙን ወይም እኅቱን የሚጠላ ሰው እስከ አሁን በጨለማ ውስጥ ነው። ¹⁰ወንድሙን ወይም እኅቱን የሚወድ ሰው በብርሃን ውስጥ ይኖራል፤ በእርሱም ውስጥ ማሰናከያ የለም። ¹¹ወንድሙን ወይም እኅቱን የሚጠላ ሰው ግን በጨለማ ውስጥ ነው፤ በጨለማ ይመላለሳል፤ ወዴት እንደሚሄድም አያውቅም፤ ጨለማው ዓይኖቹን አሳውሯልና።

¹²ልጆች ሆይ፣ ኀጢአታችሁ ስለ ስሙ ተሰርዮላችኋልና እጽፍላችኋለሁ።

¹³አባቶች ሆይ፣ ከመጀመሪያ የነበረውን አውቃችኋልና እጽፍላችኋለሁ። ጎበዛዝት ሆይ፣ ክፉውን ድል ነሥታችኋልና እጽፍላችኋለሁ።

¹⁴ልጆች ሆይ፣ አብን አውቃችኋልና እጽፍላችኋለሁ። አባቶች ሆይ፣ ከመጀመሪያ የነበረውን አውቃችኋልና እጽፍላችኋለሁ። ጎበዛዝት ሆይ፣ ብርቱዎች ናችሁና፣ የአባታችንም ቃል በእናንተ ውስጥ ይኖራልና፣ ክፉውንም ድል ነሥታችኋልና እጽፍላችኋለሁ።

ዓለምን አትውደዱ

¹⁵ዓለምን ወይም በዓለም ውስጥ ያለውን ነገር አትውደዱ። ዓለምን የሚወድ ሰው፣ የአብ ፍቅር በእርሱ ውስጥ የለም። ¹⁶በዓለም ውስጥ ያለው ሁሉ፣ ማለትም የሥጋ ምኞት፣ የዓይን ምኞትና የኑሮ ትምክሕት፣ ከዓለም እንጂ ከአብ አይደለም። ¹⁷ዓለም ከምኞቱ ጋር ያልፋል፤ የአባታችንን ፈቃድ የሚያደርግ ሰው ግን ለዘላለም ይኖራል።

ወልድን የሚክዱትን ተጠንቀቁ

¹⁸ልጆች ሆይ፣ ይህ የመጨረሻው ሰዓት ነው። የክርስቶስ ተቃዋሚ እንደሚመጣ እንደ ሰማችሁ፣ አሁን ብዙ የክርስቶስ ተቃዋሚዎች መጥተዋል፤ የመጨረሻው ሰዓት እንደ ሆነ በዚህ እናውቃለን። ^b b v18 “የክርስቶስ ተቃዋሚ” ማለት ክርስቶስን “መቃወም” ወይም “በክርስቶስ ፋንታ መሆን” ማለት ነው። ዮሐንስ ኢየሱስ ክርስቶስ መሆኑን የሚክድ ማንኛውም ሰው እንደ ሆነ ይገልጻል (2፥22)፤ “በክርስቶስ ተቃዋሚ መንፈስ” ተነሣሥተው አስቀድመው “ብዙዎች” መጥተዋል (4፥3)። ¹⁹ከእኛ ዘንድ ወጡ፤ ነገር ግን ከእኛ አልነበሩም፤ ከእኛ ቢሆኑ ኖሮ ከእኛ ጋር በኖሩ ነበር። ነገር ግን ከእነርሱ አንዱም የእኛ እንዳልሆነ ይገለጥ ዘንድ ወጡ። ²⁰እናንተ ግን ከቅዱሱ የተቀበላችሁት ቅባት አላችሁ፤ ሁላችሁም እውነትን ታውቃላችሁ። ²¹እውነትን ስለማታውቁ ሳይሆን ስለምታውቁ፣ ከእውነትም ዘንድ ውሸት ስለማይወጣ እጽፍላችኋለሁ። ²²ኢየሱስ ክርስቶስ መሆኑን ከሚክደው በቀር ውሸታሙ ማን ነው? አብንና ወልድን የሚክድ ይህ የክርስቶስ ተቃዋሚ ነው። ²³ወልድን የሚክድ ሁሉ አብ የለውም፤ ወልድን የሚመሰክር አብ ደግሞ አለው።

²⁴እናንተ፣ ከመጀመሪያ የሰማችሁት በእናንተ ውስጥ ይኑር። ከመጀመሪያ የሰማችሁት በእናንተ ውስጥ ቢኖር፣ እናንተ ደግሞ በወልድና በአብ ውስጥ ትኖራላችሁ። ²⁵እርሱ ራሱ ለእኛ የሰጠን ተስፋ ይህ ነው፤ እርሱም የዘላለም ሕይወት ነው።

²⁶ሊያስቱአችሁ ስለሚሞክሩት ይህን እጽፍላችኋለሁ። ²⁷እናንተ ግን፣ ከእርሱ የተቀበላችሁት ቅባት በእናንተ ውስጥ ይኖራል፤ ማንም ሊያስተምራችሁ አያስፈልጋችሁም። ቅባቱ ስለ ሁሉም ነገር ስለሚያስተምራችሁ፣ ይህም እውነት እንጂ ውሸት ስላልሆነ፣ እንዳስተማራችሁ በእርሱ ውስጥ ኑሩ።

²⁸አሁንም ልጆች ሆይ፣ በእርሱ ውስጥ ኑሩ፤ ይኸውም በሚገለጥበት ጊዜ ድፍረት እንዲኖረን፣ በመምጣቱም ጊዜ ከእርሱ ዘንድ በእፍረት እንዳናፍር ነው። ²⁹እርሱ ጻድቅ እንደ ሆነ ብታውቁ፣ ጽድቅን የሚያደርግ ሁሉ ከእርሱ እንደ ተወለደ ደግሞ ታውቃላችሁ።