1 ዮሐንስ 3

3 ¹አባታችን የሰጠን ፍቅር ምን ዐይነት እንደ ሆነ እዩ፤ የአባታችን ልጆች ተብለን እንጠራለን! በእውነትም ነን። ዓለም እርሱን ስላላወቀ እኛን አያውቀንም። ^a a v1 የአባታችን ፍቅር ረቂቅ ሐሳብ አይደለም፤ የእርሱ ልጆች ያደርገናል፤ ይህም እውነተኛ ማንነታችን ነው። ²ወዳጆች ሆይ፣ አሁን የአባታችን ልጆች ነን፤ ወደ ፊት ምን እንደምንሆን ገና አልተገለጠም። ነገር ግን እርሱ በሚገለጥበት ጊዜ እርሱ እንዳለ ስለምናየው እንደ እርሱ እንሆናለን። ³በእርሱ ይህ ተስፋ ያለው ሁሉ፣ እርሱ ንጹሕ እንደ ሆነ ራሱን ያነጻል።

⁴ኀጢአት የሚያደርግ ሁሉ ዐመፅንም ደግሞ ያደርጋል፤ ኀጢአት ዐመፅ ነው። ⁵እርሱ ኀጢአታችንን ሊያስወግድ እንደ ተገለጠ ታውቃላችሁ፤ በእርሱም ኀጢአት የለም። ⁶በእርሱ የሚኖር ሁሉ ኀጢአት አያደርግም፤ ኀጢአት የሚያደርግ ሁሉ አላየውም ወይም አላወቀውም።

⁷ልጆች ሆይ፣ ማንም አያስታችሁ። ጽድቅን የሚያደርግ፣ እርሱ ጻድቅ እንደ ሆነ ጻድቅ ነው። ⁸ኀጢአት የሚያደርግ ሁሉ ከዲያብሎስ ነው፤ ዲያብሎስ ከመጀመሪያ ጀምሮ ኀጢአት ያደርጋልና። የአባታችን ልጅ የተገለጠበት ምክንያት የዲያብሎስን ሥራ ለማጥፋት ነው። ⁹ከአባታችን የተወለደ ማንም ኀጢአት አያደርግም፤ ዘሩ በእርሱ ይኖራልና፤ ከአባታችንም ስለ ተወለደ ኀጢአት ሊያደርግ አይችልም። ¹⁰የአባታችን ልጆች እነማን እንደ ሆኑ፣ የዲያብሎስም ልጆች እነማን እንደ ሆኑ የሚገልጠው ይህ ነው፤ ትክክል የሆነውን የማያደርግ ሁሉ ከአባታችን አይደለም፤ ወንድሙን ወይም እኅቱን የማይወድድም እንደዚሁ ነው።

እንደ ቤተ ሰብ እርስ በርስ መዋደድ

¹¹ከመጀመሪያ የሰማችሁት መልእክት ይህ ነውና፤ እርስ በርስ እንድንዋደድ ነው። ¹²ከክፉው ወገን ሆኖ ወንድሙን እንደ ገደለ እንደ ቃየን አይደለም። ለምን ገደለው? የራሱ ሥራ ክፉ፣ የወንድሙ ሥራ ግን ጻድቅ ስለ ነበረ ነው። ¹³ወንድሞችና እኅቶች ሆይ፣ ዓለም ቢጠላችሁ አትደነቁ። ¹⁴እርስ በርስ ስለምንዋደድ ከሞት ወደ ሕይወት እንዳለፍን እናውቃለን። የማይወድድ ሁሉ በሞት ይኖራል። ¹⁵ወንድሙን ወይም እኅቱን የሚጠላ ሁሉ ነፍሰ ገዳይ ነው፤ በማንም ነፍሰ ገዳይ ውስጥ የዘላለም ሕይወት እንደማይኖር ታውቃላችሁ።

¹⁶ፍቅርን የምናውቅበት ይህ ነው፤ ክርስቶስ ስለ እኛ ሕይወቱን አሳልፎ ሰጠ፤ እኛም ደግሞ ሕይወታችንን እርስ በርስ አሳልፈን ልንሰጥ ይገባናል። ¹⁷ነገር ግን ማንም የዓለም ሀብት ያለው ሰው ወንድሙ ወይም እኅቱ ሲቸገር አይቶ ልቡን ቢዘጋባቸው፣ የአባታችን ፍቅር እንዴት በእርሱ ይኖራል?

¹⁸ልጆች ሆይ፣ በሥራና በእውነት እንጂ በቃልና በአንደበት አንዋደድ። ¹⁹ከእውነት እንደ መጣን በዚህ እናውቃለን፤ ልባችንንም በፊቱ እናረጋጋለን፤ ²⁰ልባችን በሚኰንነን ጊዜ ሁሉ፤ አባታችን ከልባችን ይበልጣልና፤ ሁሉንም ያውቃል። ²¹ወዳጆች ሆይ፣ ልባችን ባይኰንነን በአባታችን ፊት ድፍረት አለን፤ ²²ትእዛዛቱን ስለምንጠብቅ ደስ የሚያሰኘውንም ስለምናደርግ የምንለምነውን ሁሉ ከእርሱ እንቀበላለን። ²³ትእዛዙም ይህ ነው፤ በልጁ በኢየሱስ ክርስቶስ ስም እንድናምን፣ እርሱም እንዳዘዘን እርስ በርስ እንድንዋደድ ነው። ²⁴ትእዛዛቱን የሚጠብቅ ሁሉ በአባታችን ይኖራል፤ አባታችንም በእርሱ ይኖራል። በእኛ እንደሚኖር የምናውቅበት ይህ ነው፤ በሰጠን በመንፈስ ቅዱስ ነው።