1 Johanu 3

3 ¹Ẹ wo irú ìfẹ́ tí Baba wa ti fi fún wa, pé kí a lè pè wá ní àwọn ọmọ Baba wa! Bẹ́ẹ̀ sì ni àwa jẹ́. Ayé kò mọ̀ wá nítorí tí kò mọ̀ ọ́n. ^a a v1 Ìfẹ́ Baba wa kì í ṣe ohun àfòyemọ̀ lásán — ó sọ wá di àwọn ọmọ rẹ̀, tí ó sì jẹ́ ìdánimọ̀ wa tòótọ́ jùlọ. ²Ẹ̀yin olùfẹ́, àwọn ọmọ Baba wa ni àwa jẹ́ nísinsìnyí; ohun tí a óò di kò tíì farahàn. Ṣùgbọ́n àwa mọ̀ pé nígbà tí ó bá farahàn, àwa yóò dàbí rẹ̀, nítorí àwa yóò rí i gẹ́gẹ́ bí ó ti rí. ³Olúkúlùkù ẹni tí ó ní ìrètí yìí nínú rẹ̀ a máa wẹ ara rẹ̀ mọ́, gẹ́gẹ́ bí òun náà ti mọ́.

⁴Olúkúlùkù ẹni tí ó ń bá a lọ ní dídẹ́ṣẹ̀ tún ń rú òfin pẹ̀lú; ẹ̀ṣẹ̀ sì ni rírú òfin. ⁵Ẹ̀yin sì mọ̀ pé ó farahàn láti mú ẹ̀ṣẹ̀ wa kúrò, kò sì sí ẹ̀ṣẹ̀ nínú rẹ̀. ⁶Ẹnikẹ́ni tí ó bá dúró nínú rẹ̀ kì í bá a lọ ní dídẹ́ṣẹ̀; ẹnikẹ́ni tí ó ń bá a lọ ní dídẹ́ṣẹ̀ kò rí i, bẹ́ẹ̀ ni kò mọ̀ ọ́n.

⁷Ẹ̀yin ọmọ mi kékeré, ẹ má ṣe jẹ́ kí ẹnikẹ́ni tàn yín jẹ. Ẹnikẹ́ni tí ó bá ń ṣe òdodo, olódodo ni, gẹ́gẹ́ bí òun náà ti jẹ́ olódodo. ⁸Ẹnikẹ́ni tí ó ń bá a lọ ní dídẹ́ṣẹ̀ ti ọ̀dọ̀ Èṣù wá, nítorí Èṣù ti ń dẹ́ṣẹ̀ láti ìbẹ̀rẹ̀. Ìdí tí Ọmọ Baba wa fi farahàn ni láti pa iṣẹ́ Èṣù run. ⁹Ẹnikẹ́ni tí a bí láti ọ̀dọ̀ Baba wa kì í bá a lọ ní dídẹ́ṣẹ̀, nítorí irúgbìn rẹ̀ ń gbé inú rẹ̀; kò sì lè máa dẹ́ṣẹ̀ lọ, nítorí a bí i láti ọ̀dọ̀ Baba wa. ¹⁰Nípa èyí ni a ṣe mọ àwọn ọmọ Baba wa àti àwọn ọmọ Èṣù: ẹnikẹ́ni tí kò bá ṣe ohun tí ó tọ́ kì í ṣe ti Baba wa, bẹ́ẹ̀ ni ẹnikẹ́ni tí kò fẹ́ràn arákùnrin tàbí arábìnrin rẹ̀.

Ẹ Fẹ́ràn Ara Yín bí Ẹbí

¹¹Nítorí èyí ni ìhìn tí ẹ ti gbọ́ láti ìbẹ̀rẹ̀: pé kí a fẹ́ràn ara wa lẹ́nì kìíní-kejì. ¹²Kì í ṣe bí Kaini, tí ó jẹ́ ti ẹni ibi náà, tí ó sì pa arákùnrin rẹ̀. Èéṣe tí ó fi pa á? Nítorí pé iṣẹ́ òun fúnra rẹ̀ burú, ti arákùnrin rẹ̀ sì jẹ́ òdodo. ¹³Ẹ má ṣe yà yín lẹ́nu, ẹ̀yin arákùnrin àti arábìnrin, bí ayé bá kórìíra yín. ¹⁴Àwa mọ̀ pé àwa ti kọjá láti ikú sí ìyè, nítorí àwa fẹ́ràn ara wa. Ẹnikẹ́ni tí kò fẹ́ràn ń gbé inú ikú. ¹⁵Olúkúlùkù ẹni tí ó kórìíra arákùnrin tàbí arábìnrin rẹ̀ jẹ́ apànìyàn, ẹ sì mọ̀ pé kò sí apànìyàn tí ó ní ìyè àìnípẹ̀kun tí ó dúró nínú rẹ̀.

¹⁶Báyìí ni àwa ṣe mọ ìfẹ́: Kristi fi ẹ̀mí rẹ̀ lélẹ̀ fún wa; àwa pẹ̀lú sì ní láti fi ẹ̀mí wa lélẹ̀ fún ara wa. ¹⁷Ṣùgbọ́n bí ẹnikẹ́ni bá ní ọrọ̀ ayé yìí, tí ó sì rí arákùnrin tàbí arábìnrin rẹ̀ nínú àìní, tí ó sì ti ọkàn rẹ̀ pa mọ́ fún wọn, báwo ni ìfẹ́ Baba wa yóò ṣe dúró nínú rẹ̀?

¹⁸Ẹ̀yin ọmọ mi kékeré, ẹ jẹ́ kí a má ṣe fi ọ̀rọ̀ ẹnu tàbí àsọyé fẹ́ràn, bí kò ṣe nínú iṣẹ́ àti nínú òtítọ́. ¹⁹Nípa èyí ni àwa yóò fi mọ̀ pé àwa ti inú òtítọ́ wá, àwa yóò sì fi ọkàn wa balẹ̀ níwájú rẹ̀, ²⁰nígbàkigbà tí ọkàn wa bá dá wa lẹ́bi; nítorí Baba wa tóbi ju ọkàn wa lọ, ó sì mọ ohun gbogbo. ²¹Ẹ̀yin olùfẹ́, bí ọkàn wa kò bá dá wa lẹ́bi, àwa ní ìgbẹ́kẹ̀lé níwájú Baba wa; ²²ohunkóhun tí a bá béèrè, àwa yóò rí gbà lọ́wọ́ rẹ̀, nítorí àwa ń pa àṣẹ rẹ̀ mọ́, a sì ń ṣe ohun tí ó wù ú. ²³Èyí sì ni àṣẹ rẹ̀: pé kí a gba orúkọ Jesu Kristi Ọmọ rẹ̀ gbọ́, kí a sì fẹ́ràn ara wa gẹ́gẹ́ bí ó ti pàṣẹ fún wa. ²⁴Ẹnikẹ́ni tí ó bá pa àṣẹ rẹ̀ mọ́ ń gbé inú Baba wa, Baba wa sì ń gbé inú rẹ̀. Báyìí ni àwa ṣe mọ̀ pé ó ń gbé inú wa: nípa Ẹ̀mí Mímọ́ tí ó fi fún wa.