Bisi tu Tela Bana ba Tata wetu
Tata wetu wisi batela bana bandi buthwena, kaasi mana makala bawu kina mámonika. Kayina wenina ndongisila: kimenga kedi kyenina khondolo. Lungongu lwenina Kidisitu mu kulambula luzingu lwandi, yi moku mazibuka kwena phangi wenina mu mpasi. Tangwa mbundu yisi fundisa, Tata wetu wa mbuta kenina kuhita mbundu.
3 1Talenu mutindu wa lungongu luna Tata wetu káhana betu, ndangu bisi tu tela bana ba Tata wetu! Amana bwabu twenina. Tsi yisi tuzayiku, mukuma yimúzayaku yandi. a a v1 Lungongu lwa Tata wetu lwisiku lwa mameni ma phamba kaka — lwisi tukitula bana bandi, yi bwabu buna betu tuyena mu kyedika. 2Batondama bama, buthwena twenina bana ba Tata wetu; kina twakituka khaku kedi monika. Kaasi tuzayi ni tangwa kakwisa monika, twakala bwosu yandi, mukuma twamúmona bwosu kenina. 3Amana wosu wuna wenina yi kivuvu kyaki mwena yandi, kadisemisaka yandi-meni, bwosu yandi kenina wa kasemi.
4Wosu wuna wisi hola disumu, kahanga phi mambu mambi; disumu dyenina mambu mambi. 5Luzayi ni yandi wámonika mu kukatula masumu metu, amana mwena yandi mwakonda disumu. 6Wuna wisi nangina mwena yandi kisiku hola disumu; wuna wisi hola disumu kámumonaku amana kámuzayaku.
7Bana bama, ka mutu ku kaluhuna. Wuna wisi hanga masonga kenina wa masonga, bwosu yandi kenina wa masonga. 8Wuna wisi hola disumu kenina wa kiphidi-mutu, mukuma kiphidi-mutu kisi hola disumu tuka ku luyandiku. Mwana wa Tata wetu kámonika kikuma kya kuwulumuna mihangu mya kiphidi-mutu. 9Ka mutu ku wuna wábutuka mu Tata wetu kahola disumu, mukuma mbutu yandi yisi nangina mwena yandi; amana kalendaku hola disumu, mukuma wábutuka mu Tata wetu. 10Mu mama musongila bana ba Tata wetu yi bana ba kiphidi-mutu: wosu wuna wisiku hanga masonga keku wa Tata wetu, amana wuna wisiku tonda phangi wandi.
Ludizolenu Benu yi Benu Bwonu Baphangi
11Mukuma wawu wawu musamu wuna lwáyuka tuka ku luyandiku: ni tudizolenu betu yi betu. 12Tukalaku bwosu Kaini, wuna kákala wa Mbi amana wáhonda phangi wandi. Kikuma kya biki káhonda yandi? Mukuma mihangu myandi-meni myákala mya mbi, amana mihangu mya phangi wandi myákala mya masonga. 13Luyitukaku, baphangi, yuka ni tsi yalumenga. 14Tuzayi ni twáhyokila mu lufwa tii mu luzingu, mukuma tudizolaka betu yi betu. Wuna wisiku tonda, mu lufwa kisi nangina. 15Wosu wuna wisi menga phangi wandi kenina muhondi wa batu, amana luzayi ni ka muhondi wa batu ku wenina yi luzingu lwa mvula yi mvula luna lusi nangina mwena yandi.
16Mu mama tuzaya lungongu: Kidisitu wáhana luzingu lwandi mu kikuma kyetu; buna betu phi, tufweti hana luzingu lwetu betu yi betu. 17Kaasi yuka ni mutu wenina yi bima bya tsi, amana wumoni phangi wandi wukondi, kaasi kakanga mbundu yandi kwena yandi, bwe lungongu lwa Tata wetu lwalenda nangina mwena yandi?
18Bana bama, tudizolenu ka mu ndinga kondi loni mu mameni kaka ku, kaasi mu mihangu yi mu kyedika. 19Mu mama tukazaya ni betu tutuka mu kyedika, amana tukalembika mbundu yetu ku thwala ya yandi, 20muna tangwa mbundu yetu yisi tufundisa; mukuma Tata wetu kahitidini mbundu yetu, amana kazaya mambu moosu. 21Batondama bama, Ho ni mbundu yetu yisiku tufundisa, twenina yi kikumbwala ku mesu ma Tata wetu; 22amana kyosu kina twalomba, tutambula kwena yandi, mukuma twalunda mikuku myandi amana tuhanga mambu mana misi muheka. 23Wawu wawu mukuku wandi: ni twakwikila mu khumbu ya Mwana wandi Yesu Kidisitu, amana tudizolenu betu yi betu bwosu katúzimbwala betu. 24Wuna wisi lunda mikuku myandi kisi nangina mwena Tata wetu, amana Tata wetu mwena yandi. Mu mama tuzaya ni yandi kisi nangina mwena betu: mu Kitembu Kyatoma kina káhana betu.
