ውሉድ ኣቦና ተባሂልና ተፀዊዕና

ኣቦና ሕዚ ውሉዱ ኢሉ ይፅውዖም፥ እንታይ ክንከውን ምዃንና ግና ገና ኣይተገለፀን። ቃየል መጠንቀቕታ እዩ፦ ፅልኢ ድሮ ቕትለት እዩ። ፍቕሪ፥ ክርስቶስ ህይወቱ ምሃብ እዩ፥ ንዘድልዮ ሓውውን ኢድካ ምዝርጋሕ እዩ። ልቢ ምስ ዝኹንን፥ ኣቦና ይዓቢ።

ምዕራፍ 3።

ውሉድ ኣቦና ክንብሃል፥ ኣቦና ከመይ ዝበለ ፍቕሪ ከም ዝሃበና ርኣዩ! ንሕናውን ውሉዱ ኢና። ንእኡ ስለ ዘይፈለጠቶ፥ ዓለም ንዓና ኣይትፈልጠናን እያ። ^a ኣቱም ፍቑራተይ፥ ሕዚ ውሉድ ኣቦና ኢና፤ እንታይ ክንኸውን ምዃንና ግና ገና ኣይተገለፀን። ግና ንሱ ምስ ተገለፀ፥ ከምቲ ዘለዎ ኽንርእዮ ኢና እሞ፥ ከምኡ ኸም እንኸውን ንፈልጥ ኢና። እዝ ተስፋ እዙይ ብእኡ ዘለዎ ኵሉ ድማ፥ ከምቲ ንሱ ንፁህ ዝኾነ፥ ንርእሱ የንፅህ።

ሓጢኣት ዝገብር ኵሉ፥ ኣበሳ ድማ ይገብር፤ ሓጢኣት ኣበሳ እዩ። ንሱ ሓጢኣትና ከርሕቕ ከም ዝተገለፀ ትፈልጡ ኢኹም፤ ኣብኡ ኸዓ ሓጢኣት የለን። ኣብኡ ዝነብር ኵሉ፥ ሓጢኣት ኣይገብርን፤ ሓጢኣት ዝገብር ኵሉ ግና፥ ኣይረአዮን፥ ኣይፈለጦንውን።

ኣቱም ደቀይ፥ ሓደ እኳ ኣይተታልልኩም። ፅድቂ ዝገብር ኵሉ፥ ከምቲ ንሱ ፃድቕ ዝኾነ፥ ፃድቕ እዩ። ሓጢኣት ዝገብር ኵሉ ካብ ድያብሎስ እዩ፤ ድያብሎስ ካብ መጀመርታ ጀሚሩ ሓጢኣት ይገብር ኣሎ እሞ። ወዲ ኣቦና ዝተገለፀሉ ምኽንያት ከዓ፥ ግብሪ ድያብሎስ ምእንቲ ኸፍርስ እዩ። ካብ ኣቦና ዝተወለደ ኵሉ ሓጢኣት ኣይገብርን፤ ዘርኡ ኣብኡ ይነብር እዩ እሞ። ካብ ኣቦና ስለ ዝተወለደ ድማ፥ ሓጢኣት ክገብር ኣይኽእልን። ውሉድ ኣቦናን ውሉድ ድያብሎስን መን ምዃኖም በዙይ ይግለፅ፦ ፅድቂ ዘይገብር ኵሉ ካብ ኣቦና ኣይኮነን፤ ንሓዉ ዘየፍቅርውን ከምኡ እዩ።

ከም ስድራ ቤት ንስንሳትኩም ተፋቐሩ

እቲ ኻብ መጀመርታ ዝሰማዕኹምዎ መልእኽቲ እዙይ እዩ እሞ፦ ንስንሳትና ኽንፋቐር። ከምቲ ናይ እቲ እኩይ ዝነበረ፥ ንሓዉ ድማ ዝቐተለ ቃየል ኣይንኹን። ስለ ምንታይከ ቐተሎ? ግብሩ ክፉእ፥ ናይ ሓዉ ግና ፃድቕ ስለ ዝነበረ እዩ። ኣቱም ኣሕዋተይ፥ ዓለም እንተ ፀልኣትኩም ኣይትገረሙ። ንስንሳትና ነፍቅር ስለ ዘለና፥ ካብ ሞት ናብ ህይወት ከም ዝሓለፍና ንፈልጥ ኢና። ዘየፍቅር ኵሉ ኣብ ሞት ይነብር። ንሓዉ ዝፀልኦ ኵሉ ቀታሊ ሰብ እዩ፤ ዝኾነ ቐታሊ ሰብ ናይ ዘለኣለም ህይወት ኣብኡ ኸም ዘይነብር ድማ ትፈልጡ ኢኹም።

ፍቕሪ ብኸምዙይ ንፈልጥ፦ ክርስቶስ ህይወቱ ምእንታና ኣሕለፈ፤ ንሕናውን ህይወትና ምእንቲ ንስንሳትና ከነሕልፍ ይግብአና። ሃብቲ ዓለም ዘለዎ ሰብ ግና፥ ሓዉ ዘድልዮ ከሎ እናረአየ፥ ልቡ ኻብኡ እንተ ዓፀወ፥ ፍቕሪ ኣቦና ኣብኡ ከመይ ጌሩ ይነብር?

ኣቱም ደቀይ፥ ብቓል ወይ ብዘረባ ዘይኮነስ፥ ብግብርን ብሓቅን ደኣ ንፋቐር። ካብ ሓቂ ምዃንና ብኸምዙይ ክንፈልጥ፥ ልብናውን ኣብ ቅድሚኡ ከነህድእ ኢና፥ ልብና ኣብ ዝዅንነና ዘበለ፤ ኣቦና ኻብ ልብና ዝዓቢ እዩ እሞ፥ ንዅሉ ነገርውን ይፈልጥ እዩ። ኣቱም ፍቑራተይ፥ ልብና እንተ ዘይኰነነና፥ ኣብ ቅድሚ ኣቦና ትብዓት ኣለና፤ ትእዛዛቱ ስለ እንሕሉ፥ ነቲ ባህ ዘብሎ ድማ ስለ እንገብሮ፥ ዝለመናዮ ዅሉ ኻብኡ ንቕበል ኢና። ትእዛዙ ድማ እዙይ እዩ፦ ብስም ወዱ ኢየሱስ ክርስቶስ ክንኣምን፥ ከምቲ ዝኣዘዘና ኸዓ ንስንሳትና ኽንፋቐር። ትእዛዛቱ ዝሕሉ ኵሉ ኣብ ኣቦና ይነብር፥ ኣቦናውን ኣብኡ ይነብር። ኣባና ኸም ዝነብር ድማ፥ በቲ ዝሃበና መንፈስ ቅዱስ ንፈልጥ ኢና።