Choba penyi Jerusalem khulimbo haukei
Choba penyiei Jerusalem khulimbo wapyola haukei hoba Ahazeibü mütkong yei thedanga yam bunyu tegü shoongkei. Isaiaei seneibü Bou ngüh loukei, ho khulimbo kho alolabü dogo, hoba haoei wanthungbü den che la ngabü to kukei. Ahazei saopobü kümbü tegü lenan den ngala athükkei, khoei den kho khünei toutham loukei—Imanuel.
7 1Jihuda Choba Uziaeibü shisi Jothameibü shou Ahazeibü salang ka, Aram Choba Rezin hoba Israel Choba Remaliaeibü shou Pekahei Jerusalem khulimbo wapyola haukei, lausikei kho athüklangkei. 2Ladang Dawid chemdangei, “Aram Efraim yoa yoshaikei,” dogo ditkei, Ahaz hoba haoeibü mütshuongeibü maangpon yei thedanga yam bunyu tegü shoongko kikei.
3Hobaje Bouei Isaia to lenkei, “No hoba kaibü shou Shearjashub, thükkabü deikük shumang thon ka, neisimei sakan apbü yam to kibü lamnyua, Ahaz to joyola hauashi, a a v3 Shear-jashub laobou tetlabü, ‘ongbü shuong ngailabü.’ Nashoueibü nyen kho lolo hatbü Choba la ukabü maanglem ngüh che kikei. 4hoba hao to lenashi: Damanchühashi, maangpon sinngaia kiashi, ho wankhük longbü wan penyi shanga, Rezin, Aram hoba Remaliaeibü shou hatlamoklabü khauang shanga, tehüt hoba temok. 5Aishanga Aram, Efraim hoba Remaliaeibü shou yoan, no shanga amaibü huon takkei, laukei,
6‘Kün Jihuda khulimbo angtikai, kho hatsangtikai, hoba sen shanga kho paknyinkai, hoba kho thüka Tabeeleibü shou Choba la yeitikai,’ 7Thükenbou Bouei hai lauda: Kho alolabü, hoba kho aloushadlabü. 8Aishanga Aram khu kho Damaska ki, hoba Damaska khu kho Rezin ki. Po 65 khünei Efraim phetnyinlabü—touje mütli akilabü. 9Efraim khu kho Samaria ki, hoba Samaria khu kho Remaliaeibü shou ki. Kanei mailema ashaüdelonga, kan tükde ashaülabü.”
Bouei Ahaz to nyibou lenkei
10Hobaje Bouei Ahaz to nyibou laukei,
11“Kaibü Bou to amaaphilabü che hishi; kho Sheol tegü haübü ayingsi khuthük thüka tegü thükkabü kümashi.”
12Lausikei Ahazei laukei, “Ngei ahilabü, hoba ngei Bou atakteilabü.”
13Isaiaei laukei, “Ditashi, Dawid chemdang! Kanei müt semthetsangbü peisilei asoulabü lo? Kanei kü Bou kei semthetsangtikulabü lo? 14Kheijinei Thükenbou Bou lolokei kan la amaaphilabü che kulabü: Chühashi, saosüngbü medei che mang akongko aplabü hoba bousushou che buklabü, hoba saoei hao la Imanuel nyenkulabü. b b v14 Matthewei ho thuseibü ngüh Jisu to tangshaitham phokei, saosüngbü medei Mari ka bukbou (Mat 1:22-23). ‘Imanuel’ tetlabü, ‘Mühghaü sen yoa ki’ — seneibü Bou hao Shoua sen nyangto loubou kho ki. 15Hao amaibü mangsenla hoba maibü pienla ngela chalou sühko, haoei makon hoba naodei shaulabü. 16Nashoubouei amaibü mangsenla hoba maibü pienla ngejinei, no hatbü Choba penyi kibü kaonyek kho apyolabü.
17Bouei no thüka, kaibü mütshuong hoba kaibü bou chemdang thüka, Efraim Jihuda ka janyinbü chalou ka ladangkei aloubü chalou ongshaikulabü—Assiria Choba.
18Ho chaloua Bouei Ijep saabü shumang kabü yangnyu hoba Assiria kaodaka kibü aaunyu ngalabü, 19hoba haoen pendou louan maang pholi shuong ka, laang khünnyet ka, sang si jak pendou thüka hoba dei khushang pendou ka settilabü.
20Ho chaloua Thükenbou Bouei Eufrates danjung ka mulambü khujinei, kho Assiria Choba ki, khu hoba you wi shuan aplabü, hoba sembung wi kei shuan aptikulabü. 21Ho chaloua müt cheei masu saoen nashou che hoba sanlon nyi lang pholabü, 22hoba sendei phenganyengbüei haoei makon shaulabü; kaonyeka ongbü pendouei makon hoba naodei shaulabü.
23Ho chaloua, semlüh hajar che kibü chandinam hajar che lei kishang pendou sang si jak yemtikulabü. 24Müt shuongei khünei laujin hoba lau yoan loulabü, aishanga kaonyek pendou sang si jak kilabü. 25Shangla moubü shongh shuong to nyi ahaulabü, sang si jak to hatbüei; haoen kho masu shanga lamshaushang hoba sanlon nyemtishang kaonyek kilabü.”
