Saamu 116

116 ¹Mo fẹ́ràn Baba mi, nítorí ó ń gbọ́ ohùn mi, igbe àánú mi. ²Nítorí tí ó tẹ́ etí rẹ̀ sí mi, èmi yóò máa ké pè é níwọ̀n ìgbà tí mo bá wà láàyè. ³Okùn ikú yí mi ká; ìrora isà òkú dì mí mú; ìpọ́njú àti ìbànújẹ́ bò mí mọ́lẹ̀. ⁴Nígbà náà ni mo ké pe orúkọ Baba mi pé: “Baba mi, mo bẹ̀ ọ́, gba ọkàn mi là!” ⁵Olóore ni Baba wa, àti olódodo; Baba wa kún fún àánú. ⁶Baba mi ń ṣọ́ àwọn òpè; nígbà tí a rẹ̀ mí sílẹ̀, ó gbà mí là. ⁷Padà, ìwọ ọkàn mi, sí ibi ìsinmi rẹ, nítorí Baba mi ti ṣoore fún ọ gidigidi. ⁸Nítorí ìwọ ti gba ọkàn mi là kúrò nínú ikú, ojú mi kúrò nínú omijé, ẹsẹ̀ mi kúrò nínú ìkọsẹ̀. ⁹Èmi yóò máa rìn níwájú Baba mi ní ilẹ̀ alààyè. ¹⁰Mo gbàgbọ́, àní nígbà tí mo wí pé, “A pọ́n mi lójú gidigidi”; ¹¹Nínú ìjayà mi, mo wí pé, “Gbogbo ènìyàn ni òpùrọ́.” ¹²Kí ni èmi yóò fi san padà fún Baba mi fún gbogbo oore rẹ̀ sí mi? ¹³Èmi yóò gbé ago ìgbàlà sókè, èmi yóò sì ké pe orúkọ Baba mi. ¹⁴Èmi yóò mú ẹ̀jẹ́ mi ṣẹ fún Baba mi níwájú gbogbo àwọn ènìyàn rẹ̀. ¹⁵Iyebíye ní ojú Baba mi ni ikú àwọn olóòótọ́ rẹ̀. ¹⁶Baba mi, nítòótọ́ ìránṣẹ́ rẹ ni èmi; ìránṣẹ́ rẹ ni mí, ọmọ ìránṣẹ́bìnrin rẹ. Ìwọ ti tú ẹ̀wọ̀n mi sílẹ̀. ¹⁷Èmi yóò rú ẹbọ ọpẹ́ sí ọ, èmi yóò sì ké pe orúkọ Baba mi. ¹⁸Èmi yóò mú ẹ̀jẹ́ mi ṣẹ fún Baba mi níwájú gbogbo àwọn ènìyàn rẹ̀, ¹⁹ní àgbàlá ilé Baba mi, láàrin yín, ìwọ Jerusalemu. Haleluyah!