Wábalumuna Kutu Dyandi Kwena Meni
Matondu ma mutu wahuluka kwena Tata wandi. Misinga mya lufwa myánzinga tangwa kábokila amana wayukwa, buna wasola mu kulanda kumúbokila mu bilumbu byosu bya luzingu lwandi. Wisi hyula biki kafwani kuvutula, amana wisi vutula ni mbungu ya luhulusu yatombulwa yi ndefi zilungiswa ku thwala ya batu boosu.
116 1Yisi zola Tata wama, mukuma wisi yuka ndinga yama, kubokwadila kwama kwa kyadi. 2Mukuma wábalumuna kutu dyandi kwena meni, yimúbokila mu bilumbu byosu bya luzingu lwama. 3Misinga mya lufwa myánzinga; minyanga mya kalunga myánkwata; yánungwa ni phasi yi kiwayi. 4Amana yátela khumbu ya Tata wama: «A Tata wama, mbati kulomba kwena ngeyi, hulula moya wama!» 5Tata wetu kenina wa khenda, amana wa masonga; Tata wetu kenina wa kyadi. 6Tata wama kisi keba batsukami; buna yákulumuka, wánhulula. 7Vutuka, moya wama, ku kilembwadi kyaku, mukuma Tata wama wákuheka mamboti malawu. 8Mukuma wáhulula moya wama ku lufwa, mesu mama ku matsanga, malu mama ku kubwa. 9Yidyáta ku thwala ya Tata wama mu tsi ya batu ba moya. 10Yákwikila, mbatanana buna yázimbula: «Yenina mu phasi za lawu»; 11Muna kubanga kwama yázimbula: «Mutu wosu kenina kingumba.» 12Biki yifwani mu kuvutula kwena Tata wama kikuma kya mamboti mandi moosu kwena meni? 13Yitómbula mbungu ya luhulusu amana yitéla khumbu ya Tata wama. 14Yilúngisa ndefi zama kwena Tata wama ku thwala ya batu bandi boosu. 15Lufwa lwa batu bandi ba kwikama lwenina lwa thalu kwena Tata wama. 16A Tata wama, kyedika meni yenina musadi waku; yenina musadi waku, mwana wa musadi waku wa mukhetu. Wakútumuna miyololu myama. 17Yikútambika kimenga kya matondu amana yitéla khumbu ya Tata wama. 18Yilúngisa ndefi zama kwena Tata wama ku thwala ya batu bandi boosu, 19mu luphangu lwa nzu ya Tata wama, ha kati kya ngeyi, Yelusalemi. Aleluya!
