Haoei Kü To Nou Sepeikei
Lang kibü mütei kü Bou to nyensang kubü ngüh. Hailabü joluhei ngo shenlepjinei ngei ngakei hoba haoei ditkei, khünei ngo lang kibü salang pendou ngala dogo janenkei. Ai kungailabü dogo haoei phekei, hoba khümenbü thung phonan hoba müt pendou thedanga theletbü loushedan jongaikei.
116 1Ngei kü Bou sanouda, aishanga haoei kü ngüh, onou shanga kü ngekbü ditda. 2Haoei kü to nou sepeikei shanga, ngo lang kibü salang pendou ngei hao to ngalabü. 3Hailabü joluhei ngo shenlepbei; hee khonkuei ngo sühkei; khonsak hoba maangmauei ngo thükena. 4Kheijinei ngei kü Bou nyena ngakei, “O kü Bou, ngei ka to sudajada, kü soushou püetshi!” 5Seneibü Bou onou ki hoba saopobü ki; seneibü Bou sanoudambüei shenakei. 6Kü Bouei maanglanbü shuong lomda; ngo naklepbü thua kijinei, haoei ngo khümenkei. 7Sepeiashi, kü soushou, kaibü hakso to, aishanga kü Bouei ka to aeibou maikukei. 8Aishanga nyi kü soushou hailabü ka püetkei, kü nyek nyeksi ka, kü you phaiyetbü ka khümenkei. 9Ngei lang kibü kaodaka kü Bou thedanga pailabü. 10Ngei mailembei, ngei laukei khünei, “Ngo aeibou khonkuda”; 11Ngo panglangjinei ngei laukei, “Müt pendou yepeijawebü ki.” 12Kü Bouei kü to maibü pendou shanga, ngei kü Bou la ai kungailabü? 13Ngei khümenbü thung phonlabü hoba kü Bou nyena ngalabü. 14Ngei haoeibü mütli pendou thedanga kü Bou shanga kü theletbü loushedlabü. 15Kü Bou thedanga haoeibü ikjaibü shuongeibü hailabü kho namsek ki. 16O kü Bou, ngo maimaitham no khangenbü ki; ngo no khangenbü, kaibü samnyueibü shou ki. Nyi kü yangmen longeikei. 17Ngei ka to nyensangkubü lembü lemlabü hoba kü Bou nyena ngalabü. 18Ngei haoeibü mütli pendou thedanga kü Bou shanga kü theletbü loushedlabü, 19Kü Bou chemdang khongaena, no yoa, O Jerusalem. Haleluya!
